लाडकी बहीण होणार 'लखपती'; बिनव्याजी कर्ज आणि व्यवसायाची संधी, मुख्यमंत्र्यांनी मांडला मेगा प्लॅन!

Ladki Bahin Yojana Interest Free Loan for Women : राज्य सरकारने महिलांच्या आर्थिक स्वातंत्र्यासाठी सुरू केलेली 'मुख्यमंत्री माझी लाडकी बहीण योजना' आता केवळ दरमहा आर्थिक मदतीपुरती मर्यादित राहणार नाही. या योजनेला अधिक व्यापक स्वरूप देत, महिलांना स्वतःच्या पायावर उभे करण्यासाठी राज्य सरकारने एक 'मास्टरप्लॅन' तयार केला आहे. मुख्यमंत्री देवेंद्र फडणवीस यांनी या योजनेच्या माध्यमातून महिलांना व्यवसायासाठी बिनव्याजी कर्ज उपलब्ध करून देण्याची मोठी घोषणा केली आहे.

महिला सक्षमीकरणाचा नवा अध्याय: 'नारी शक्ती संगम'

भाईंदर येथील रामभाऊ म्हाळगी प्रबोधिनीच्या प्रांगणात आयोजित 'विकसित भारत नारी शक्ती संगम' या दोन दिवसीय ग्रामीण महिला नेतृत्व परिषदेच्या उद्घाटनप्रसंगी मुख्यमंत्री देवेंद्र फडणवीस बोलत होते. यावेळी त्यांनी स्पष्ट केले की, जगातील विकसित देशांच्या प्रगतीचा पाया हा तिथल्या महिलांना मिळालेल्या जबाबदाऱ्या आणि संधींवर आधारलेला आहे. भारत लवकरच जगातील तिसरी मोठी अर्थव्यवस्था बनण्याचे स्वप्न पाहत असताना, त्यात महिलांचा सहभाग मोलाचा ठरणार आहे.

'लाडकी बहीण' योजनेचे इतर योजनांशी 'लिंकिंग'

केवळ १५०० रुपये महिना देऊन महिलांचे सक्षमीकरण पूर्ण होणार नाही, हे ओळखून सरकारने या योजनेला इतर शासकीय योजनांशी जोडण्याचा महत्त्वपूर्ण निर्णय घेतला आहे.

विनाहमी कर्ज: मुंबई बँकेच्या माध्यमातून महिलांना कोणताही जामीन किंवा हमी न देता विविध व्यवसायांसाठी कर्ज दिले जाईल.

बिनव्याजी योजना : हे कर्ज पूर्णपणे बिनव्याजी असणार आहे, जेणेकरून महिलांवर व्याजाचा बोजा पडणार नाही.

परतफेडीची अनोखी पद्धत : या कर्जाच्या परतफेडीसाठी महिलांना खिशातून पैसे देण्याची गरज भासणार नाही. 'लाडकी बहीण' योजनेअंतर्गत मिळणारी मासिक आर्थिक मदतच या कर्जाच्या हप्त्यांसाठी वापरली जाईल.

'उमेद' आणि 'उमेद मॉल'च्या माध्यमातून हक्काची बाजारपेठ

महिलांनी केवळ वस्तू तयार करू नयेत, तर त्या विकण्यासाठी त्यांना हक्काचे व्यासपीठ मिळावे यासाठी 'उमेद' उपक्रमाची व्याप्ती वाढवण्यात येत आहे.

जिल्हानिहाय उमेद मॉल: प्रत्येक जिल्ह्यात 'उमेद मॉल' उभारले जातील, जिथे महिला बचत गटांनी तयार केलेल्या उत्पादनांना थेट बाजारपेठ मिळेल.

कॉर्पोरेट कंपन्यांना टक्कर : महिला उद्योजिकांनी तयार केलेल्या दर्जेदार वस्तूंना योग्य ब्रँडिंग मिळाल्यास त्या मोठ्या खासगी कंपन्यांशीही यशस्वी स्पर्धा करू शकतील, असा विश्वास फडणवीस यांनी व्यक्त केला.

महिलांचा प्रामाणिकपणा : ९९% कर्ज परतफेडीचा दर

देवेंद्र फडणवीस यांनी यावेळी महिलांच्या आर्थिक शिस्तीचे विशेष कौतुक केले. ते म्हणाले की, "सर्वसाधारण कर्ज योजनांमध्ये परतफेडीचे प्रमाण साधारण ५० टक्क्यांच्या आसपास असते. मात्र, महिलांच्या बचत गटांना दिलेल्या कर्जाची परतफेड करण्याचे प्रमाण ९९ टक्क्यांपेक्षा जास्त आहे. महिलांमध्ये उत्तम आर्थिक व्यवस्थापनाची उपजत क्षमता असते, हेच यातून सिद्ध होते."

परिषदेतील उपस्थित मान्यवर

या कार्यक्रमाला माजी खासदार विनय सहस्रबुद्धे, ग्रामविकास मंत्री जयकुमार गोरे, जलसंधारण तज्ज्ञ पद्मश्री पोपटराव पवार आणि मीरा-भाईंदरच्या महापौर डिंपल मेहता यांसारखे मान्यवर उपस्थित होते. ग्रामीण भागातील महिलांच्या नेतृत्वाला वाव देणे, हा या परिषदेचा मुख्य उद्देश आहे.