अचानक गॅस संपला तरी टेन्शन नाही! मिनिटांत होईल जेवण तयार; 'या' 5 चविष्ट रेसिपींनी भागवा भूक

How to Prepare Meals Without LPG Cylinder : जागतिक घडामोडी आणि युद्धजन्य परिस्थितीमुळे एलपीजी गॅस सिलेंडरच्या पुरवठ्यावर परिणाम होण्याची शक्यता वर्तवण्यात येत आहे. अशा वेळी ऐन जेवणाच्या वेळी गॅस संपला, तर गृहिणींची मोठी ओढाताण होते. पण काळजी करू नका! स्वयंपाकासाठी नेहमीच अग्नी किंवा गॅसची गरज असते असे नाही. गॅस न पेटवताही तुम्ही पौष्टिक आणि चविष्ट पदार्थ बनवू शकता. जाणून घ्या अशा 'नो-गॅस' रेसिपीज, ज्या संकटकाळात तुमच्यासाठी 'तारणहार' ठरतील.

विना गॅस तयार होणारे ५ झटपट पदार्थ

१. स्प्राउट्स सॅलड (मोड आलेल्या कडधान्यांची भेळ)

हे अत्यंत आरोग्यदायी असून आरोग्यासाठी उत्तम आहे. मोड आलेली मूग किंवा मटकी घेऊन त्यात बारीक चिरलेला कांदा, टोमॅटो, काकडी, कोथिंबीर आणि चवीनुसार लिंबू-मीठ टाका. हे सॅलड तुमचे पोट दीर्घकाळ भरलेले ठेवते.

२. पनीर सँडविच

प्रोटीनने भरपूर असा हा नाश्ता मुलांसाठी उत्तम आहे. ब्रेडच्या स्लाइसला बटर आणि हिरवी चटणी लावा. त्यावर किसलेले पनीर, काकडी, कांदा आणि थोडा चाट मसाला टाकून दुसरा ब्रेड ठेवा. गॅसशिवाय चविष्ट सँडविच तयार!

३. दही-पोहे (दही-चूड़ा)

हा पारंपरिक आणि पचायला हलका पदार्थ आहे. पोहे स्वच्छ धुवून त्यात ताजे दही आणि चवीनुसार साखर किंवा गूळ मिसळा. काही मिनिटांतच एक तृप्त करणारी डिश तयार होते.

४. चटपटीत भेळ

घरात गॅस नसेल तर मुरमुरे, बारीक चिरलेला कांदा, टोमॅटो, फरसाण आणि चिंचेची चटणी एकत्र करून तुम्ही झटपट भेळ बनवू शकता. हा पदार्थ सर्वांचाच आवडीचा आहे.

५. फ्रूट क्रीम

काहीतरी गोड खाण्याची इच्छा असल्यास सफरचंद, केळी, डाळिंब यांसारख्या फळांच्या फोडींमध्ये फ्रेश क्रीम आणि साखर मिसळून फ्रूट क्रीम तयार करा. हे मुलांसाठी एक उत्तम डेझर्ट ठरेल.

बाजारातून इंडक्शन, गॅस स्टोव्ह गायब!

पश्चिम आशियातील युद्ध आणि होर्मुझच्या सामुद्रधुनीवरील तणावादरम्यान, भारतात अचानक एलपीजी सिलिंडरचा तुटवडा निर्माण झाला आहे. बुकिंगसाठी २०-२५ दिवसांचा प्रतीक्षा कालावधी, काळ्या बाजारात २०००-३,००० रुपयांचे सिलिंडर आणि बाजारातून इंडक्शन आणि गॅस स्टोव्ह गायब होणे, या सर्वांमुळे असा प्रश्न पडतो की एलपीजी संकट भारताला ७० वर्षे मागे घेऊन जात आहे का, जेव्हा लाकूड, शेणखत, कोळसा आणि रॉकेल स्टोव्ह हेच स्वयंपाकघरात इंधनाचे एकमेव स्रोत होते? दरम्यान, केंद्र सरकारने राज्यांना ४०,००० किलोलिटर अतिरिक्त रॉकेल वाटप करण्याचा निर्णय घेतला आहे.