'पाकिस्तानला शांतता नकोय, भारत योग्य उत्तर देण्यास सज्ज'; RSS चीफ मोहन भागवतांचा कडक इशारा!

RSS Chief Mohan Bhagwat slammed Pakistan : भारत आणि पाकिस्तान यांच्यातील संबंधांमध्ये सुरू असलेल्या तणावाच्या पार्श्वभूमीवर, राष्ट्रीय स्वयंसेवक संघाचे (RSS) प्रमुख मोहन भागवत यांनी पाकिस्तानच्या वृत्तीबद्दल आणि भारताच्या तयारीबद्दल अत्यंत कडक संदेश दिला आहे.

त्यांनी स्पष्ट केले की भारत नेहमीच शांततेसाठी उत्सुक असतो, परंतु पाकिस्तान वारंवार शांतता भंग करण्याचा प्रयत्न करत आहे. बेंगळुरू येथील एका कार्यक्रमात बोलताना भागवत यांनी शेजारील देशाला कठोर इशारा देत, भारत कोणत्याही परिस्थितीला तोंड देण्यास पूर्णपणे तयार असल्याचे सांगितले.

पाकिस्तान शांततेवर समाधानी नाही!

बेंगळुरूमधील "संघ यात्रेची १०० वर्षे - नवीन क्षितिज" या कार्यक्रमात रविवारी (९ नोव्हेंबर २०२५) बोलताना मोहन भागवत यांनी पाकिस्तानच्या भूमिकेवर तीव्र टीका केली. भागवत म्हणाले की, भारताला नेहमीच शांतता हवी असते आणि शांततेसाठी आम्ही नेहमीच प्रयत्न करतो. ते म्हणाले की, "पाकिस्तान यावर समाधानी नाही... जोपर्यंत त्याला भारताचे नुकसान करण्यात आनंद मिळतो तोपर्यंत तो असेच करत राहील.

भागवत यांनी इशारा दिला की, "जर पाकिस्तानने करार मोडला, तर ते यशस्वी होणार नाही. जितके प्रयत्न करेल, तितकेच ते स्वतःचे नुकसान करेल."

"त्यांना समजणारी भाषा बोला"

भागवत यांनी स्पष्ट केले की, पाकिस्तानला भारताची शांततेची भाषा समजत नाही. त्यामुळे त्याला त्याच भाषेत उत्तर दिले पाहिजे, जे त्यांना समजू शकेल. पाकिस्तान भारताचे काहीही करू शकत नाहीत हे त्यांना समजत नाही. म्हणून, आपण त्यांना समजणारी भाषा बोलली पाहिजे."

१९७१च्या युद्धाची आठवण

पाकिस्तानच्या कुरापतींच्या पार्श्वभूमीवर बोलताना भागवत यांनी १९७१ च्या भारत-पाकिस्तान युद्धाचे उदाहरण दिले. भागवत म्हणाले की, त्यावेळी पाकिस्तानने ९०,००० सैनिकांची संपूर्ण सेना गमावली. त्यांनी स्पष्ट केले की, जर पाकिस्तानने अशा कृती सुरूच ठेवल्या, तर त्यांना पुन्हा धडा शिकवला जाईल.

भारताला सतर्क राहण्याचा सल्ला

पाकिस्तानच्या प्रत्येक प्रयत्नासाठी आपण तयार राहिले पाहिजे," असे त्यांनी सांगितले. भागवत यांच्या मते, प्रत्येक वेळी पाकिस्तानला अशा कडक प्रत्युत्तराने उत्तर दिले पाहिजे, ज्यामुळे त्याला पश्चात्ताप होईल. अखेरीस, एके दिवशी पाकिस्तानला हे नक्कीच समजेल की सहकार्य करणे हेच त्याच्या हिताचे आहे.