भारत विरुद्ध दक्षिण आफ्रिका महिला वर्ल्डकप फायनलवर मोठ संकट?, सामना रद्द झाल्यास ट्रॉफी कोणाला?

india vs south africa womens world cup final weather update : " क्रिकेट चाहत्यांसाठी अत्यंत महत्त्वाची बातमी आहे. उद्या, रविवार, २ नोव्हेंबर रोजी नवी मुंबईतील डीवाय पाटील स्टेडियमवर होणाऱ्या महिला विश्वचषक (ODI World Cup) अंतिम सामन्यावर पावसाचे मोठे सावट आहे.

भारत आणि दक्षिण आफ्रिका यांच्यातील या ऐतिहासिक फायनलवर महाराष्ट्रातील खराब हवामानाचा गंभीर धोका आहे, ज्यामुळे सामना विस्कळीत होण्याची किंवा रद्द होण्याची शक्यता वर्तवली जात आहे.

मुंबई आणि नवी मुंबईत 'यलो अलर्ट'!

महाराष्ट्रातील हवामान खात्याने मुंबई आणि आसपासच्या भागात 'यलो अलर्ट' जारी केला आहे. याचा अर्थ या भागात हलका ते मध्यम पाऊस आणि वादळी वाऱ्यांची शक्यता आहे. हीच बाब भारत आणि दक्षिण आफ्रिका यांच्यातील वर्ल्ड कप मेगाफायनलसाठी चिंतेची ठरत आहे.

पावसाचा अंदाज!

शनिवार : ८६ टक्के दिवसभर आकाश ढगाळ, रात्री पाऊस पडण्याची शक्यता अधिक.

रविवार (अंतिम सामना) : ६३ टक्के : हवामान ढगाळ राहील, दुपारनंतर पावसाची शक्यता.

सर्वात चिंताजनक बाब म्हणजे, अंतिम सामन्याच्या वेळेत, म्हणजेच रविवारी दुपारी ४ ते ७ वाजेपर्यंत, पावसाची शक्यता ५० टक्क्यांहून अधिक आहे. यापूर्वी डीवाय पाटील स्टेडियमवर भारत आणि बांगलादेश यांच्यातील सामन्यातही पावसाने व्यत्यय आणला होता.

सामना रद्द झाल्यास काय होणार?

हा अंतिम सामना दोन्ही संघांसाठी ऐतिहासिक आहे. दोन्हीपैकी कोणत्याही संघाने यापूर्वी महिला एकदिवसीय विश्वचषक जिंकलेला नाही. दक्षिण आफ्रिका पहिल्यांदाच अंतिम फेरीत पोहोचला आहे, तर भारताने यापूर्वी दोनदा अंतिम सामने खेळले असले तरी त्यांना विजेतेपद मिळवता आले नव्हते.

दुर्दैवाने, जर पावसामुळे हा अंतिम सामना पूर्ण होऊ शकला नाही आणि तो पूर्णपणे रद्द झाला, तर क्रिकेटच्या नियमांनुसार, दोन्ही संघांना (भारत आणि दक्षिण आफ्रिका) ट्रॉफी 'वाटून' घ्यावी लागेल. अशा ऐतिहासिक क्षणी ट्रॉफी वाटून घ्यावी लागणे, ही दोन्ही संघांसाठी आणि त्यांच्या चाहत्यांसाठी अत्यंत निराशाजनक गोष्ट असेल.

राखीव दिवसाची उपलब्धता

सामना पूर्ण करण्यासाठी आयोजकांनी राखीव दिवस ठेवला आहे, म्हणजे सोमवारी (३ नोव्हेंबर) सामना खेळवला जाऊ शकतो. मात्र, सोमवारीही पावसाची शक्यता ५० टक्के वर्तवण्यात आली आहे, ज्यामुळे हा धोका कायम आहे.

त्यामुळे, पंचांचा प्रयत्न असेल की, रविवारीच खेळाचा पुरेसा वेळ मिळावा. यासाठी आवश्यक वाटल्यास, षटकांची संख्या कमी करून कालावधी कमी केला जाऊ शकतो, जेणेकरून अंतिम सामन्याचा निकाल त्याच दिवशी लागावा.

अंतिम फेरीतील संघांचा प्रवास

भारतीय संघ (India W) : उपांत्य फेरीत भारताने बलाढ्य ऑस्ट्रेलियाविरुद्ध ३३९ धावांचे मोठे लक्ष्य यशस्वीरित्या पार करून अंतिम फेरीत धडक मारली आहे. जेमिमा रोड्रिग्ज आणि हरमनप्रीत कौरच्या दमदार कामगिरीमुळे संघ आत्मविश्वासाने भरलेला आहे.

दक्षिण आफ्रिका संघ (South Africa W) : दक्षिण आफ्रिकेने उपांत्य फेरीत माजी विजेत्या इंग्लंडला आश्चर्यचकित करून पहिल्यांदाच विश्वचषकाच्या अंतिम फेरीत प्रवेश केला आहे. क्रिकेट चाहते आणि दोन्ही संघ आशा करतील की पाऊस थांबेल आणि नवी मुंबईतील डीवाय पाटील स्टेडियमवर एक रोमांचक आणि अविस्मरणीय फायनल पाहायला मिळेल.