अदानींचा ओडिशात धमाका; १.०८ लाख कोटींची गुंतवणूक, ५०,००० रोजगार!

अदानी समूहाने बुधवारी ओडिशा सरकारसोबत राज्यात एक एकात्मिक ॲल्युमिनियम इकोसिस्टम (एकात्मिक प्रकल्प) उभारण्यासाठी एका ऐतिहासिक सामंजस्य करारावर (MoU) स्वाक्षरी केली आहे. हा प्रकल्प संयुक्त अरब अमिराती (UAE) मधील आघाडीची गुंतवणूक कंपनी 'इंटरनॅशनल होल्डिंग कंपनी' (IHC) च्या भागीदारीत साकारला जाणार आहे. या प्रकल्पासाठी तब्बल ११.५ अब्ज अमेरिकन डॉलर्स म्हणजेच सुमारे १.०८ लाख कोटी रुपयांची गुंतवणूक प्रस्तावित असून, हा जागतिक स्तरावरील ॲल्युमिनियम क्षेत्रातील सर्वात मोठ्या गुंतवणुकींपैकी एक प्रकल्प असल्याचे म्हटले जात आहे.

या सामंजस्य करार स्वाक्षरी सोहळ्यात उपस्थितांना संबोधित करताना अदानी पोर्ट्स अँड एसईझेड (APSEZ) चे मुख्य कार्यकारी अधिकारी (CEO) करण अदानी म्हणाले की, हा प्रकल्प ओदिशाच्या आर्थिक इतिहासात "एका नवीन अध्यायाची" सुरुवात करत आहे, ज्यामुळे राज्याच्या आणि पर्यायाने देशाच्या आर्थिक विकासाच्या गतीला मोठी चालना मिळेल. या विशेष कार्यक्रमाला ओडिशाचे मुख्यमंत्री मोहन चरण माझी, राज्याचे उद्योग मंत्री संपद चरण स्वेन, ओदिशा सरकारचे वरिष्ठ अधिकारी आणि आयएचसी (IHC) अबू धाबीचे व्यवस्थापकीय संचालक (MD) व मुख्य कार्यकारी अधिकारी (CEO) सय्यद बसर शुएब प्रामुख्याने उपस्थित होते.

करण अदानी यांनी दिलेल्या माहितीनुसार, हा प्रकल्प संपूर्ण ॲल्युमिनियम मूल्य साखळीला (व्हॅल्यू चेन) एकाच ठिकाणी एकत्र आणेल. यामध्ये वार्षिक जवळपास ४ दशलक्ष टन क्षमतेची ॲल्युमिना रिफायनरी, सुमारे २ दशलक्ष टन वार्षिक क्षमतेचा ॲल्युमिनियम स्मेल्टर आणि साधारण १ दशलक्ष टन वार्षिक क्षमतेचा डाउनस्ट्रीम ॲल्युमिनियम पार्क समाविष्ट असेल. या अवाढव्य सुविधेला सक्षमपणे चालवण्यासाठी सुमारे ४,००० मेगावॅट क्षमतेचा कॅप्टिव्ह पॉवर प्लांट (स्वतःचा वीज प्रकल्प) उभारला जाईल, ज्या सोबतच अंदाजे ४०० मेगावॅटचा हरित ऊर्जा (ग्रीन एनर्जी) घटक देखील समाविष्ट असेल.

रोजगार आणि आर्थिक परिणाम

या महाप्रकल्पामुळे बांधकाम टप्प्यादरम्यान अंदाजे ३५,००० रोजगार निर्माण होण्याची अपेक्षा आहे, तर प्रकल्प पूर्णपणे कार्यान्वित झाल्यानंतर सुमारे १८,५०० लोकांना कायमस्वरूपी रोजगार मिळेल. करण अदानी यांनी स्पष्ट केले की, हे आकडे केवळ संख्या नसून स्थानिक कुटुंबे, नवीन कौशल्ये आत्मसात करणारे तरुण, स्थानिक उद्योजक आणि राज्यातील छोट्या व्यावसायिकांसाठी खऱ्या अर्थाने प्रगतीच्या मोठ्या संधी आहेत.

ओदिशाच्या साधनसंपत्तीच्या क्षमतेवर प्रकाश

आपल्या भाषणात करण अदानी यांनी ओडिशाच्या खनिज संपत्तीचा उल्लेख करत, ही संपत्ती देशाच्या औद्योगिक भविष्यासाठी एक अत्यंत महत्त्वाची आणि धोरणात्मक जमेची बाजू असल्याचे सांगितले. त्यांनी अधोरेखित केले की, ओदिशामध्ये देशातील सर्वात मोठा बॉक्साईटचा साठा आहे. तसेच भारताच्या एकूण लोहखनिजाच्या साठ्यापैकी निम्म्याहून अधिक साठा, कोळशाचे प्रचंड साठे आणि क्रोमाईट, मँगेनीज, चुनखडी व डोलोमाईटचे महत्त्वपूर्ण साठे याच राज्यात आहेत. हा समृद्ध साधनसंपत्तीचा पाया आणि राज्य सरकारचे सक्रिय धोरणात्मक सहकार्य यांमुळे ओदिशाची ओळख आता केवळ कच्चा माल पुरवणारे राज्य न राहता, ते मूल्यवर्धित उत्पादन केंद्र (व्हॅल्यू-अॅडेड मॅन्युफॅक्चरिंग हब) म्हणून वेगाने विकसित होत आहे.

'विकसित भारत' संकल्पाशी सुसंगतता

या प्रकल्पाची सांगड केंद्र सरकारच्या 'विकसित भारत २०४७' या मोहिमेशी घालताना करण अदानी म्हणाले की, विकसित भारताचे ध्येय गाठण्यासाठी ओदिशाचा विकास आणि समृद्धी अत्यंत आवश्यक आहे. आपल्या नैसर्गिक साधनसंपत्तीचे मूल्यवर्धन करणे, जागतिक दर्जाची उत्पादन क्षमता निर्माण करणे आणि तरुण पिढीसाठी मोठ्या प्रमाणावर रोजगार निर्माण करणे हे ओदिशाच्या प्रगतीसाठी गरजेचे आहे. ते पुढे म्हणाले की, अदानी समूहाचे अध्यक्ष गौतम अदानी हे नेहमीच ओदिशाला पूर्व भारताच्या आर्थिक विकासाचे मुख्य केंद्र मानतात. त्यांनी ओदिशाच्या संभाव्य क्षमतेचे वर्णन राज्याची लवचिकता, त्याचे भविष्य आणि भारताच्या औद्योगिक विस्ताराच्या पुढील टप्प्यातील नेतृत्व अशा शब्दांत केले आहे.

भाषणाचा समारोप करताना करण अदानी यांनी ओदिशा सरकारच्या दूरगामी दृष्टीकोनाबद्दल त्यांचे आभार मानले आणि राज्याच्या विकासाप्रती आपल्या समूहाची वचनबद्धता पुन्हा एकदा बोलून दाखवली. हा प्रकल्प स्थानिक समुदायांना थेट फायदा पोहोचवण्यासाठी, प्रादेशिक अर्थव्यवस्था मजबूत करण्यासाठी आणि संपूर्ण ओदिशातील नवउद्योजकांना बळकट करण्यासाठीच आखण्यात आला असल्याचे त्यांनी शेवटी आवर्जून सांगितले.