IND vs SA: 93 वर्षांच्या कसोटी इतिहासात टीम इंडियाचा पराभव; जगभरात अपमान, 2-0 ने क्लीन स्वीप!

गुवाहाटी येथे खेळल्या गेलेल्या कसोटी सामन्यात भारतीय क्रिकेट संघाला ९३ वर्षांच्या कसोटी क्रिकेट इतिहासातील सर्वात मोठ्या पराभवाला सामोरे जावे लागले आहे. टेम्बा बावुमाच्या नेतृत्वाखालील दक्षिण आफ्रिकेच्या संघाने भारताचा तब्बल ४०८ धावांनी दारूण पराभव करत, दोन सामन्यांची मालिका २-० ने जिंकून भारताला घरच्या मैदानावर क्लीन स्वीप दिला. हा पराभव केवळ आकड्यांमध्ये मोठा नाही, तर घरच्या मैदानावर भारतीय संघासाठी हा एक मोठा अपमान आणि चिंतेचा विषय आहे.

भारताची निराशाजनक कामगिरी

दक्षिण आफ्रिकेने भारतासमोर ५४९ धावांचे विशाल लक्ष्य ठेवले होते. या लक्ष्याचा पाठलाग करताना भारतीय संघ दुसऱ्या डावात केवळ १४० धावांवर गारद झाला.

• भारताचा दुसरा डाव : १४० धावा (सर्वबाद).
• सर्वाधिक धावा : रवींद्र जडेजा (५४ धावा).
• इतर फलंदाज : वॉशिंग्टन सुंदर (१६ धावा).

दक्षिण आफ्रिकेकडून अनुभवी फिरकीपटू सायमन हार्मरने भेदक गोलंदाजी करत एकट्याने दुसऱ्या डावात सहा विकेट्स घेतल्या आणि भारताचा डाव लवकर गुंडाळण्यात महत्त्वाचा वाटा उचलला.

चिंताजनक आकडेवारी

हा पराभव भारतीय संघाच्या घसरलेल्या फॉर्मकडे आणि संघ रचनेतील कमतरतांकडे लक्ष वेधून घेणारा आहे. घरच्या मैदानावर एकदा अजिंक्य मानला जाणारा भारतीय संघ आता सातत्याने संघर्ष करताना दिसत आहे:

आकडेवारी माहिती

• सर्वात मोठा पराभव ९३ वर्षांच्या कसोटी इतिहासातील सर्वात मोठा पराभव (४०८ धावांनी).
• घरच्या मैदानावर सलग दोन वर्षांत भारताने तिसऱ्यांदा घरच्या मैदानावर कसोटी मालिका गमावली.
• ६६ वर्षांत प्रथमच भारताने अवघ्या सात महिन्यांत पाच कसोटी सामने गमावले आहेत.
• २५ वर्षांत प्रथमच भारताने दोन हंगामांत पाच कसोटी सामने गमावले आहेत.

क्लीन स्वीपची मालिका!

२००० साली दक्षिण आफ्रिकेविरुद्ध ०-२ असा पराभव झाल्यानंतर, आता २०२५ मध्ये पुन्हा दक्षिण आफ्रिकेकडून ०-२ असा क्लीन स्वीप झाला आहे. यात २०२४ मध्ये न्यूझीलंडकडून झालेला ०-३ असा दणदणीत पराभव जोडल्यास, भारतीय संघाच्या नशिबाला मोठे धक्के बसले आहेत.

हा दारुण पराभव आणि घरच्या मैदानावर झालेल्या क्लीन स्वीपने भारतीय क्रिकेट संघासाठी धोक्याची घंटा वाजवली आहे. संघाला पुन्हा यशस्वी मार्गावर आणण्यासाठी व्यवस्थापनामध्ये आणि संघ रचनेत मोठे बदल करणे अत्यंत आवश्यक आहे.

गौतम गंभीरच्या काळात टीम इंडियाची परिस्थिती!

• 36 वर्षांनी भारताला घरच्या मैदानावर न्यूझीलंडविरुद्ध कसोटीत पराभवाचा धक्का.
• 19 वर्षांनी टीम इंडिया बंगलुरूच्या चिन्नास्वामीवर कसोटी हरली. कसोटी क्रिकेटच्या इतिहासात पहिल्यांदाच भारताला घरच्या मैदानावर न्यूझीलंडकडून मालिका गमवावी लागली.
• 12 वर्षांनी भारताला घरच्या कसोटी मालिकेत पराभव स्वीकारावा लागला.
• 12 वर्षांनी टीम इंडिया मुंबईच्या वानखेडेवर कसोटी हरली.
• कसोटीमध्ये पहिल्यांदाच घरच्या मैदानावर 3-0 ने क्लीन स्वीप.
• 13 वर्षांनी मेलबर्नमध्ये कसोटी पराभव.
• 10 वर्षांनी बॉर्डर-गावसकर ट्रॉफी हातची गेली.
• 12 वर्षांनी ऑस्ट्रेलियाविरुद्ध भारताने टेस्ट मालिकेत 3 सामने गमावले.
• पहिल्यांदाच टीम इंडिया WTC फायनलसाठी क्वालिफाय करू शकली नाही.
• लीड्सवर 5 शतकं करूनही कसोटी हरलेली जगातील पहिली टीम.
• लीड्समध्ये 92 वर्षांच्या कसोटी इतिहासात भारत फक्त दुसऱ्यांदा 350+ धावांचं बचाव करण्यात अपयशी.
• 124 धावांचं लक्ष्यही गाठता आलं नाही, हे भारताचं घरच्या मैदानावर सर्वात कमी लक्ष्य अपयश.
• 25 वर्षांनी भारताला घरच्या मैदानावर दक्षिण आफ्रिकेकडून पराभव.