आशिया कपमधून भारत माघार घेणार?, बीसीसीआयची नेमकी भूमिका काय, का बाळगते मौन, वाचा राजकारण!

Asia Cup 2025 Update News : आशिया कपचा मुद्दा सध्या चर्चेत आहे, आणि याचे मुख्य कारण म्हणजे भारत आणि पाकिस्तान यांच्यातील संबंध. यावर्षीचा आशिया कप युएईमध्ये होणार आहे, परंतु तो भारतीय क्रिकेट नियामक मंडळाच्या (BCCI) यजमानपदाखाली खेळवला जाणार आहे. याच कारणामुळे, पाकिस्तानविरुद्धच्या सामन्यावर बहिष्कार घालण्याची मागणी जोर धरत आहे.

पाकिस्तानविरोधात वाढता रोष

पाकिस्तानविरुद्ध सामना न खेळण्याची मागणी सतत वाढत आहे. जम्मू-काश्मीरमधील पहलगाम येथे झालेल्या हल्ल्यानंतर लोकांमध्ये संतापाची भावना अधिक तीव्र झाली आहे. यासोबतच, पाकिस्तानी लष्कराचे फील्ड मार्शल असीम मुनीर यांनी अमेरिकेत जाऊन भारतावर अणुहल्ल्याची धमकी दिल्याने ही मागणी आणखी वाढली आहे. सोशल मीडियावर पाकिस्तानसोबत क्रिकेट खेळू नये, अशी मागणी जोर धरत आहे. अनेक राजकीय नेते आणि सामान्य नागरिक या मागणीला पाठिंबा देत आहेत.

The Failed Marshal of Pakistan is talking about taking half the world down by launching a nuclear attack on India
And our BCCI &GoI want India team to play cricket with Pakistan team.
Junk the Aman ki Asha. Dump your revenue sharing model! ! Call off the Asia Cup!

— Priyanka Chaturvedi🇮🇳 (@priyankac19) August 10, 2025

राजकीय दबाव आणि बीसीसीआयची चुप्पी

शिवसेना उद्धव गटाच्या खासदार प्रियंका चतुर्वेदी यांनीही बीसीसीआयला आशिया कपमधून माघार घेण्याचे आवाहन केले आहे. त्यांनी म्हटले आहे की, "पाकिस्तानचे अपयशी मार्शल भारतावर अणुहल्ला करण्याची धमकी देत आहेत आणि आपले बीसीसीआय आणि सरकार पाकिस्तानसोबत खेळण्याचा विचार करत आहेत.

'अमन की आशा'सारखे नाटक थांबवा आणि आशिया कप रद्द करा." प्रियंका चतुर्वेदींच्या या भूमिकेला अनेक लोकांनी पाठिंबा दिला आहे. हे सर्व होत असताना, बीसीसीआयने मात्र यावर कोणतीही अधिकृत प्रतिक्रिया दिलेली नाही. त्यांची ही चुप्पी अनेक प्रश्न निर्माण करत आहे.

माघार घेणे सोपे आहे का?

लोक आता थेट भारत आशिया कपमधून माघार घेईल असे म्हणत आहेत, परंतु हे इतके सोपे नाही. १९९० मध्ये पाकिस्तानने सियाचीन आणि काश्मीर मुद्द्यांमुळे भारताविरुद्ध आशिया कप खेळण्यास नकार दिला होता. आता भारतासमोरही एक मजबूत कारण आहे. जरी भारत या स्पर्धेचा यजमान असला तरी, तो स्पर्धेतून माघार घेऊ शकतो.

क्रिकेट समालोचक आकाश चोप्रा यांनी एकदा सांगितले होते की, बीसीसीआय आशिया कपमधून मिळणारा महसूल इतर भागीदार देशांमध्ये वाटून देतो, ज्यामुळे तिथे खेळाचा विकास होतो. त्यामुळे, बीसीसीआयला कोणताही मोठा आर्थिक तोटा होणार नाही. जनतेच्या भावना आणि वाढता दबाव पाहता, बीसीसीआय येत्या काळात एखादा मोठा निर्णय घेऊ शकते. हे सर्व पाहता, बीसीसीआयसाठी हा एक महत्त्वाचा निर्णय ठरणार आहे. जनतेच्या भावनांचा आदर करत बोर्ड काही कठोर पाऊले उचलणार का, हे पाहणे औत्सुक्याचे ठरेल.