उपमुख्यमंत्री पदावर सुनेत्रा पवारच का?; राजकीय वारसा, महिला सक्षमीकरण ते पवार ब्रँड; वाचा कारकीर्द!

Why Sunetra Pawar Deputy Chief Minister : उपमुख्यमंत्री अजित पवार यांच्या अपघाती निधनाने महाराष्ट्राच्या राजकारणात निर्माण झालेली पोकळी भरून काढण्यासाठी आता त्यांच्या पत्नी आणि राज्यसभा खासदार सुनेत्रा पवार सज्ज झाल्या आहेत.

राष्ट्रवादी काँग्रेसच्या (अजित पवार गट) आमदारांनी आणि ज्येष्ठ नेत्यांनी सुनेत्रा पवार यांच्या नावावर शिक्कामोर्तब केल्याची माहिती समोर येत असून, उद्या सायंकाळी ५ वाजता त्यांचा राज्याच्या पहिल्या महिला उपमुख्यमंत्री म्हणून शपथविधी होण्याची शक्यता आहे.

पक्षात अनुभवी नेत्यांची फळी असतानाही सुनेत्रा पवार यांचीच निवड का केली जात आहे? यामागील प्रमुख कारणे आणि त्यांची राजकीय कारकीर्द या सर्व बाबींची चर्चा होऊ लागली आहे. या लेखातून सुनेत्रा पवार यांच्या कार्याविषयी जाणून घेऊया..!

सुनेत्रा पवारच का? पक्षांतर्गत संतुलन आणि 'पवार' ब्रँड

राष्ट्रवादी काँग्रेसमध्ये छगन भुजबळ, प्रफुल्ल पटेल आणि सुनील तटकरे यांसारखे अनेक ज्येष्ठ व अनुभवी नेते आहेत. मात्र, अजित पवार यांच्या निधनानंतर पक्षावर आणि कार्यकर्त्यांवर पकड मजबूत ठेवण्यासाठी एका 'पवार' चेहऱ्याची आवश्यकता होती.

असंतोष टाळण्यासाठी : इतर कोणत्याही नेत्याला ही संधी दिल्यास पक्षांतर्गत नाराजी वाढण्याची शक्यता होती. सुनेत्रा पवार यांच्या नावामुळे सर्व गट एकत्र राहण्यास मदत होईल.

कार्यकर्त्यांची मागणी : दादांच्या पश्चात त्यांच्या कार्याची धुरा 'वहिनी' म्हणजेच सुनेत्रा पवार यांनीच सांभाळावी, असा मोठा आग्रह कार्यकर्त्यांकडून धरला गेला होता.

दांडगा राजकीय वारसा

सुनेत्रा पवार यांना राजकारणाचे बाळकडू माहेरूनच मिळाले आहे. त्या धाराशिवचे दिग्गज नेते पद्मसिंह पाटील यांच्या भगिनी आहेत. त्यांचे वडील स्वातंत्र्यसैनिक होते, ज्यांच्याकडून त्यांना लोकसेवेची प्रेरणा मिळाली. पवार घराण्यात आल्यानंतर गेल्या तीन दशकांपासून त्यांनी राजकारण आणि समाजकारण अगदी जवळून अनुभवले आहे. विशेषतः बारामतीमधील विकासकामांमध्ये पडद्यामागून त्यांची महत्त्वाची भूमिका राहिली आहे.

महिला सक्षमीकरण आणि सामाजिक कार्य

सुनेत्रा पवार केवळ राजकीय वारसा लाभलेल्या व्यक्ती नाहीत, तर त्यांनी स्वतःची एक वेगळी ओळख निर्माण केली आहे:

टेक्सटाइल पार्क : बारामती येथे महिलांच्या हाताला काम मिळावे यासाठी त्यांनी टेक्सटाइल पार्कची उभारणी केली. या माध्यमातून हजारो महिलांना शाश्वत रोजगार मिळाला आहे.

पर्यावरण संवर्धन : 'एन्व्हायरनमेंटल फोरम ऑफ इंडिया' या संस्थेच्या माध्यमातून त्यांनी स्वच्छता आणि पर्यावरणासाठी मोठे काम केले आहे.

शिक्षण क्षेत्र : विद्या प्रतिष्ठान या नामांकित शिक्षण संस्थेवर त्या विश्वस्त म्हणून कार्यरत आहेत.

राजकीय कसोटी आणि राज्यसभेतील एन्ट्री

२०२४ च्या लोकसभा निवडणुकीत त्यांनी बारामतीतून सुप्रिया सुळे यांच्या विरोधात निवडणूक लढवली होती. जरी या निवडणुकीत त्यांचा पराभव झाला असला, तरी त्यांनी अत्यंत खंबीरपणे अजित दादांना साथ दिली आणि संपूर्ण मतदारसंघ पिंजून काढला. त्यानंतर पक्षाने त्यांची राज्यसभेवर निवड करून त्यांच्यावर विश्वास व्यक्त केला.

महाराष्ट्राच्या पहिल्या महिला उपमुख्यमंत्री

जर सुनेत्रा पवार उद्या उपमुख्यमंत्री पदाची शपथ घेतील, तर त्या महाराष्ट्राच्या इतिहासातील पहिल्या महिला उपमुख्यमंत्री ठरतील. राज्याच्या राजकारणात महिलांना उच्च पदावर संधी मिळणे, हे महाराष्ट्राच्या पुरोगामी विचारांना बळकटी देणारे पाऊल ठरेल.

शैक्षणिक पात्रता: औरंगाबादशी जुने नाते

अनेकांना सुनेत्रा पवार यांच्या शिक्षणाबद्दल उत्सुकता असते. मीडिया रिपोर्ट्स आणि निवडणूक प्रतिज्ञापत्रांनुसार, सुनेत्रा पवार या उच्चशिक्षित आहेत.

• पदवी : त्यांनी बी.कॉम (Bachelor of Commerce) पर्यंतचे शिक्षण पूर्ण केले आहे.
• महाविद्यालय: १९८३ मध्ये त्यांनी औरंगाबाद (आताचे छत्रपती संभाजीनगर) येथील प्रसिद्ध एस.बी. आर्ट्स अँड कॉमर्स कॉलेज (S.B. Arts & Commerce College) मधून पदवी संपादन केली.
• विद्यापीठ: हे महाविद्यालय मराठवाड्यातील डॉ. बाबासाहेब आंबेडकर मराठवाडा विद्यापीठाशी संलग्न आहे.

सुनेत्रा पवार यांना "ब्युटी विथ ब्रेन" का म्हटले जाते?

सुनेत्रा पवार यांच्या व्यक्तिमत्वात शालीनता आणि बुद्धिमत्ता यांचा सुरेख संगम पाहायला मिळतो. त्यांना "ब्युटी विथ ब्रेन" संबोधण्यामागे त्यांची केवळ राजकीय पार्श्वभूमी नसून त्यांनी विविध क्षेत्रांत गाजवलेले यश आहे:

यशस्वी उद्योजिका आणि रोजगार निर्मिती

त्या केवळ घर सांभाळणाऱ्या गृहिणी राहिल्या नाहीत, तर त्यांनी व्यावसायिक क्षेत्रातही ठसा उमटवला आहे. त्या बारामती हायटेक टेक्सटाईल पार्कच्या अध्यक्षा आहेत. या माध्यमातून त्यांनी हजारो ग्रामीण महिलांना हक्काचा रोजगार मिळवून दिला आहे, ज्यामुळे महिलांच्या आर्थिक सक्षमीकरणाला मोठी चालना मिळाली.

पर्यावरण संवर्धनाच्या 'ग्रीन वॉरियर'

पर्यावरण रक्षणासाठी त्यांनी 'एन्व्हायर्नमेंटल फोरम ऑफ इंडिया' (EFOI) या संस्थेची स्थापना केली.

सेंद्रिय शेती: सेंद्रिय शेतीचा प्रसार आणि जलसंधारणाच्या कामात त्यांचे मोठे योगदान आहे.

पुरस्कार: त्यांच्या या कार्याची दखल घेत त्यांना मानाच्या 'ग्रीन वॉरियर' पुरस्काराने सन्मानित करण्यात आले आहे.

जागतिक व्यासपीठ : २०११ पासून त्या फ्रान्समधील 'वर्ल्ड एंटरप्रेन्योरशिप फोरम' (World Entrepreneurship Forum) च्या थिंक टँक सदस्य म्हणून कार्यरत आहेत.