"तुझ्या पोरीला आम्ही काय फुकट नांदवायचं?" म्हणून मारून टाकलं तिला ! मन व्यथित करणारी घटना

मुळशी तालुक्यातील राष्ट्रवादी काँग्रेसचे पदाधिकारी राजेंद्र हगवणे यांची सून वैष्णवी शशांक हगवणे हिचा मृत्यू १६ मे रोजी झाला. वैष्णवीच्या सासरकडून हा आत्महत्येचा प्रकार असल्याचा दावा केला जात आहे, तर तिच्या कुटुंबीयांनी तिला हुंड्यासाठी छळ करून ठार मारल्याचा गंभीर आरोप केला आहे.

पोस्टमॉर्टेम अहवालातील बाबींचा धक्का

ससून रुग्णालयात करण्यात आलेल्या शवविच्छेदन अहवालात वैष्णवीच्या शरीरावर असंख्य मारहाणीच्या खुणा आढळून आल्या असून, तिचा मृत्यू गळा आवळल्यामुळे झाल्याचं नमूद करण्यात आलं आहे. या नोंदींमुळे मृत्यूच्या कारणावर प्रश्नचिन्ह उपस्थित झाले आहेत.

कुटुंबीयांचा आरोप: हत्या, आत्महत्या नाही

वैष्णवीच्या वडिलांनी दिलेल्या तक्रारीनुसार, तिच्या सासरच्या मंडळींनी सातत्याने हुंड्यासाठी मानसिक आणि शारीरिक त्रास दिला. विवाहात ५१ तोळे सोनं, एक महागडी कार आणि इतर दागदागिने दिल्यानंतरही, हगवणे कुटुंबाकडून २ कोटी रुपयांची अतिरिक्त मागणी करण्यात आली होती. ही रक्कम न दिल्याने वैष्णवीवरचा छळ वाढत गेला, असं तिच्या कुटुंबाचं म्हणणं आहे.

जावयाचे धक्कादायक वक्तव्य

वैष्णवीच्या वडिलांनी असा दावा केला आहे की, त्यांनी तिच्या मृत्यूनंतर जेव्हा पती शशांक आणि सासरे राजेंद्र हगवणे यांच्याकडे चौकशी केली, तेव्हा त्यांनी "तुझ्या पोरीला आम्ही काय फुकट नांदवायचं? म्हणून मारलं," असं वक्तव्य केल्याचं सांगितलं. या आरोपामुळे प्रकरण अधिकच गंभीर बनलं आहे.

राजकीय आणि सामाजिक प्रतिक्रिया

या प्रकरणामुळे राज्यातील राजकारणातही खळबळ उडाली आहे. अनेक महिला संघटना आणि राजकीय नेत्यांनी या घटनेचा तीव्र निषेध केला आहे. उपमुख्यमंत्री अजित पवार यांच्यावर आरोप करणारे सवालही उपस्थित करण्यात आले आहेत. पक्षाच्या पदाधिकाऱ्याला वाचवण्याचा प्रयत्न होतो आहे का? असे सवाल उपस्थित केले जात आहेत.

पोलिस तपास सुरू, न्यायालयीन प्रक्रिया अपेक्षित

पोलिसांनी सदर प्रकरणी गुन्हा दाखल केला असून, तपास सुरू आहे. हगवणे कुटुंबीयांच्या भूमिकेची चौकशी केली जात असून, पोस्टमॉर्टेम अहवाल व कुटुंबीयांच्या तक्रारींच्या आधारे पुढील कायदेशीर कारवाई होणार आहे.

हुंड्यासाठी छळ? - कुटुंबीयांचा आरोप

वैष्णवीचे वडील आणि कुटुंबीयांनी पोलिसांत दिलेल्या तक्रारीनुसार, वैष्णवीचा विवाह झाल्यानंतर तिच्यावर सातत्याने मानसिक आणि शारीरिक छळ करण्यात येत होता. लग्नात ५१ तोळे सोनं, फॉर्च्युनर गाडी आणि साडे सात किलोच्या तांब्याच्या भांड्यांचा संच देण्यात आला होता. त्यानंतरही सासरच्या मंडळींच्या मागण्या थांबल्या नाहीत. काही महिन्यांतच पती शशांकला सोन्याची अंगठी आणि महागडं मोबाइल गिफ्ट देण्यात आला. त्यानंतर वैष्णवीच्या सासरकडून तब्बल २ कोटी रुपयांची रक्कम जमीन खरेदीसाठी मागण्यात आली होती.

परंतु कुटुंबीयांनी ही मागणी पूर्ण करण्यास नकार दिला. यानंतर वैष्णवीवरील छळ अधिक वाढल्याचे तिच्या आई-वडिलांचे म्हणणे आहे. तिच्या अंगावर सतत मारहाणीचे व्रण दिसत होते, पण ती कधी काही बोलत नसे.