'सत्ता आणि तोड्यासाठी दोन भाऊ एकत्र'; नवनीत राणांचा उद्धव-राज ठाकरेंवर हल्लाबोल

Navneet Rana Uddhav and Raj Thackeray attack : नवनीत राणा यांनी राज ठाकरे आणि उद्धव ठाकरे यांच्यावर थेट निशाणा साधला. त्या म्हणाल्या, "परिवार एकत्र येणं ही आपली संस्कृती आहे आणि आपण ती जपली पाहिजे... पण आज संपूर्ण महाराष्ट्र पाहत आहे, दोन भाऊ एकत्र आले ते फक्त सत्ता आणि खुर्चीसाठी..."

या टीकेला आणखी धार देत नवनीत राणा पुढे म्हणाल्या, "सत्तेत आल्यानंतर फक्त पैशासाठी आणि तोड्या करण्यासाठी दोन भाऊ एकत्र आले आहेत." त्यांनी थेट 'ठाकरे परिवार' या नावालाच लक्ष्य करत म्हटले की, "ठाकरे परिवार हे मजबूरीचे नाव झालेले आहे." राणा यांनी ठाकरे बंधूंचे एकत्र येणे हे केवळ राजकीय आणि आर्थिक स्वार्थातून झाले आहे, असे स्पष्ट मत व्यक्त केले.

अमरावतीच्या माजी खासदार नवनीत राणा आणि आमदार रवी राणा यांनी यंदाची दिवाळी अत्यंत वेगळ्या पद्धतीने साजरी केली. त्यांनी आपल्या राहत्या घरासमोर अंध, अपंग आणि कृष्ठरोगी बांधवांसोबत दिवाळीचा आनंद साजरा केला आणि या उपक्रमाबद्दल राज्याचे मुख्यमंत्री देवेंद्र फडणवीस यांनी दूरध्वनीच्या माध्यमातून त्यांचे कौतुक केले.

या खास कार्यक्रमादरम्यान, नवनीत राणा यांनी आपल्या भाषणात राजकीय विरोधकांवर जोरदार टीकास्त्र सोडले. त्यांनी केवळ आमदार बच्चू कडू यांच्यावरच नव्हे, तर ठाकरे गटाचे प्रमुख उद्धव ठाकरे आणि मनसेप्रमुख राज ठाकरे यांच्या एकत्र येण्यावरही सडकून टीका केली.

बच्चू कडूंना 'नौटंकी लोक' म्हणत जोरदार प्रतिहल्ला

यावेळी नवनीत राणा यांनी आमदार बच्चू कडू यांच्यावरही तीव्र शाब्दिक हल्ला चढवला. त्यांनी बच्चू कडू यांना "बरेच नौटंकी लोक" असे संबोधले. राणा म्हणाल्या, "जे आज बाहेर फिरून सांगत आहेत, आमदारांना मारून टाका... तुम्ही चार वेळा आमदार होते, दोन वेळा मंत्री होते, तेव्हा शेतकऱ्यांसाठी तुमची पोटदुखी बाहेर नाही आली."

अचलपूरच्या माजी आमदारांवर संपत्तीवरून टीका

नवनीत राणा यांनी अचलपूरच्या माजी आमदारांवरही टीका केली. "आज अनेक लोक आजीचे माजी झाले कारण त्यांनी कधी खिशात हातच टाकला नाही. फक्त इनकमिंग आउटगोइंग नाही," असे त्या म्हणाल्या.

करोडोंच्या संपत्तीवरून टीका करताना त्यांनी माजी आमदारांना आव्हान दिले, "अचलपूरचे माजी आमदार त्यांच्याकडे करोडोची संपत्ती आहे. मी दहा वेळा म्हटलं तुमची संपत्ती मला द्या, माझी संपत्ती तुम्ही घ्या..." शेतकऱ्याच्या एका मुलाने त्यांना पराभूत केले कारण शेतकरी दुःखी होता, असे सांगत त्यांनी आपली टीका संपवली.

एकंदरीत, नवनीत राणा यांनी दिवाळीच्या कार्यक्रमाच्या निमित्ताने राजकीय विरोधक आणि विशेषतः ठाकरे बंधूंवर 'सत्ता आणि मजबूरी'वरून जोरदार निशाणा साधल्याचे स्पष्ट झाले.