Maratha Morcha Update :मनोज जरांगे मुंबईच्या दिशेने रवाना;शिंदे-पवारांचे कौतुक तर फडणवीसांवर हल्ला!

Manoj Jarange Patil for Maratha Moecha Latest Update : मराठा आरक्षणाच्या मागणीसाठी मनोज जरांगे पाटील यांच्या नेतृत्वाखाली मराठा समाजाचा एक भव्य मोर्चा आंतरवाली सराटी येथून मुंबईच्या दिशेने रवाना झाला आहे. या आंदोलनाने महाराष्ट्रातील राजकीय वातावरण तापले असून, विविध नेत्यांच्या प्रतिक्रिया समोर येत आहेत. गणेशोत्सवासारख्या सणासुदीच्या काळात हे आंदोलन होऊ नये म्हणून सरकारने प्रयत्न केले असले, तरी जरांगे पाटील आपल्या भूमिकेवर ठाम आहेत.

सरकारसोबत चर्चेचा प्रयत्न आणि आंदोलकांचा निर्धार

गणेशोत्सवाच्या पार्श्वभूमीवर हे आंदोलन पुढे ढकलले जावे यासाठी मुख्यमंत्री देवेंद्र फडणवीस यांनी आपले विशेष कार्यकारी अधिकारी (OSD) मनोज जरांगे यांच्याकडे पाठवले होते. मुंबईत सणासुदीच्या दिवसांत कायदा आणि सुव्यवस्थेचा प्रश्न निर्माण होऊ नये, यासाठी हा समजावण्याचा प्रयत्न होता.

मात्र, मनोज जरांगे पाटील यांनी आपला निर्धार कायम ठेवत 27 ऑगस्ट रोजीच मोर्चा निघणार असल्याचे स्पष्ट केले. दरम्यान, मुंबई उच्च न्यायालयाने आझाद मैदानावर आंदोलनाला परवानगी नाकारल्याने आता पुढील टप्प्यात आंदोलन कुठे होईल, याबाबत उत्सुकता वाढली आहे.

जरांगे पाटलांची शिंदे-पवारांवर स्तुती, फडणवीसांवर टीका

मनोज जरांगे पाटील यांनी आपल्या भाषणात उपमुख्यमंत्री एकनाथ शिंदे आणि उपमुख्यमंत्री अजित पवार यांची प्रशंसा केली. ते म्हणाले, "एकनाथ शिंदे खरा माणूस आहे. त्यांना गरिबांची व्यथा समजते. अजित पवारही चांगले नेतृत्व आहेत. त्यांच्याकडे गेले की ते गोरगरिबांची कामे करून देतात."

जरांगे यांनी भाजपमधील अनेक मंत्री चांगले काम करतात असेही सांगितले. या विधानांच्या माध्यमातून त्यांनी अप्रत्यक्षपणे मुख्यमंत्री देवेंद्र फडणवीस यांच्यावर निशाणा साधला आहे. त्यांनी फडणवीस यांच्यावर 'आडमुठे धोरण' आणि 'देवाला पुढे करून हिंदू समाजाला वेठीस धरत असल्याचा' आरोप केला आहे. 'हिंदू सणाच्या दिवशी हिंदूलाच अडवले तर हिंदू विरोधी कोण?' असा सवालही त्यांनी विचारला.

नाना पटोले आणि ज्ञानेश्वरी मुंडे यांची प्रतिक्रिया

काँग्रेस नेते नाना पटोले यांनी सरकारने जरांगे पाटलांशी चर्चा करावी, असे म्हटले आहे. 'लोकांना आंदोलनाची झळ बसणार नाही, याची काळजी सरकारने घ्यायची असते,' असे ते म्हणाले. त्यांनी या सरकारवर मराठा, ओबीसी आणि इतर मागासवर्गीयांची फसवणूक केल्याचा आरोप केला. जातनिहाय जनगणना झाल्यास आरक्षणाचे प्रश्न सुटतील, अशी काँग्रेसची भूमिका त्यांनी पुन्हा एकदा स्पष्ट केली.

दुसरीकडे, ज्ञानेश्वरी मुंडे यांनी मनोज जरांगे यांच्या आंदोलनाला आपला आणि आपल्या कुटुंबाचा पूर्ण पाठिंबा असल्याचे जाहीर केले. जरांगे पाटील शांततेच्या आणि लोकशाही मार्गाने लढा देत असून, समाजाने त्यांना पाठिंबा द्यावा, असे आवाहन त्यांनी केले.

मराठ्यांनो उद्या मुंबईला निघताना आयोजकांनी सांगितलेले सर्व नियमांचे व्यवस्थित काटेकोरपणे पालन करा व निघताना गरजेच्या वस्तू बरोबर ठेवा..!

सर्वांना विनंती गाड्या काळजीपूर्वक चालवा कोणाची गाडी बंद पडली किंवा काही अडचण आली तर लगेच थांबून एकमेकांना मदत करा…!
सर्वांनी शक्यतो… pic.twitter.com/AKFVmsRBGP

— नास्तिक पक्याभाऊ महाराष्ट्र राज्य (@nastikpakyabhau) August 26, 2025

शांततेचे आवाहन आणि पुढील दिशा

जरांगे पाटील यांनी आपल्या समर्थकांना शांततेचे आणि संयमाचे आवाहन केले आहे. 'एकानेही दगडफेक किंवा जाळपोळ करायची नाही,' असे त्यांनी स्पष्ट केले.

ते म्हणाले की, 'शांततेचे आंदोलन कोणीही अडवू शकणार नाही.' त्यांनी आपल्या आंदोलनाला 'शांततेचे' स्वरूप दिल्याने, मुंबईत दाखल झाल्यावर पुढील टप्प्यात काय घडते, याकडे सर्वांचे लक्ष लागले आहे.

या आंदोलनामुळे मराठा आरक्षणाचा प्रश्न पुन्हा एकदा ऐरणीवर आला असून, सरकार आणि आंदोलक यांच्यातील पुढील चर्चा आणि हालचाली महाराष्ट्राच्या राजकारणाला नवी दिशा देऊ शकतात.

'सरकारने मला गोळ्या घालाव्या, मी बलिदानास तयार'

आपण आंदोलनाच्या सर्व परवानग्या घेतल्या होत्या. न्यायालय आपल्याला 100 टक्के न्याय देणार आहेत असा विश्वास मनोज जरांगे पाटील यांनी व्यक्त केला आहे. मराठा आरक्षणासाठी आत्महत्या करु नका, असेही जरांगे पाटील यांनी समाज बांधवांना आवाहन केले आहे.

मी बलिदान देण्यासाठी तयार आहे, पण माघार घेणार नाही. सरकारने मला गोळ्या घालाव्या, आज पर्यंत 100 मराठा समाज बांधवांनी आत्महत्या केली हे सर्व सरकारमुळे झाले आहे, असा आरोप मनोज जरांगे यांनी केला आहे. शांततेचे आंदोलन कोणी सोडायचे नाही, असे आवाहन त्यांनी केले आहे. कुठेही कायदा-सुव्यवस्थेचा प्रश्न निर्माण होईल असे वागू नका.