राज्यात पुन्हा पावसाची शक्यता; 'या' तीन जिल्ह्यांसाठी हवामान विभागाचा अलर्ट!

राज्यात थंडीचा जोर वाढलेला असतानाच आता हवामानामध्ये मोठा बदल होण्याची शक्यता आहे. भारतीय हवामान विभागाने (IMD) दिलेल्या माहितीनुसार, सध्या राज्यात पावसाला अनुकूल वातावरण तयार झाले असून, पुढील २४ तासांसाठी काही जिल्ह्यांमध्ये पावसाचा इशारा जारी करण्यात आला आहे.

दक्षिण महाराष्ट्रात पावसाची शक्यता

गारठा काहीसा कमी होऊन ढगाळ हवामान दिसत आहे. याच पार्श्वभूमीवर, आयएमडीने कोल्हापूर, सांगली आणि सिंधुदुर्ग या तीन जिल्ह्यांमध्ये हलक्या ते मध्यम स्वरूपाच्या पावसाचा अंदाज वर्तवला आहे. या जिल्ह्यांनी पुढील २४ तासांसाठी सतर्क राहणे गरजेचे आहे.

उत्तर महाराष्ट्रात कडाक्याची थंडी

गेल्या काही दिवसांपासून राज्याच्या अनेक भागांत थंडीची लाट कायम आहे. उत्तरेकडील थंड वाऱ्यांमुळे तापमानाचा पारा लक्षणीयरीत्या खाली आला आहे. धुळे येथे राज्यातील सर्वात कमी तापमान ७.५ अंश सेल्सिअस नोंदवले गेले. तसेच, परभणीमध्ये ८.९ अंश आणि निफाडमध्ये ८ अंश सेल्सिअस तापमानाची नोंद झाली आहे.

तापमान घटलेले प्रमुख शहरे: पुणे, मुंबई, नागपूर, अकोला, सोलापूर, छत्रपती संभाजीनगर, बीड, नांदेड, परभणी, हिंगोली, अहमदनगर, गडचिरोली, गोंदिया, जळगाव, भंडारा, यवतमाळ.

पुणे: शहरात पारा १० अंशांच्या खाली गेल्यामुळे कडाक्याची थंडी जाणवत आहे. थंडीपासून बचावासाठी पुण्यातील सारसबागेतील गणपती बाप्पाला परंपरेनुसार लोकरीचा स्वेटर आणि कानटोपी घालण्यात आली आहे.

मागील काही दिवसांच्या तुलनेत राज्यातील काही भागांत थंडी थोडी कमी झाली असली तरी, येत्या काही दिवसांत उत्तरेकडील थंडीचा जोर पुन्हा वाढण्याची शक्यता आहे. नागरिकांनी हवामानातील या बदलांनुसार योग्य ती काळजी घ्यावी.