राज ठाकरे सर्वात मोठ्या पराभवाचे धनी ठरतील!, फडणवीसांची भविष्यवाणी; उद्धव ठाकरेंवरही ओढले ताशेरे!

Devendra Fadnavis statement : मुंबई महानगरपालिका निवडणुकीचा बिगुल वाजल्यानंतर महाराष्ट्रातील राजकीय वातावरण आता टोकाच्या संघर्षाकडे झुकले आहे. मुख्यमंत्री देवेंद्र फडणवीस यांनी एका हिंदी वृत्तवाहिनीला दिलेल्या मुलाखतीत मनसे अध्यक्ष राज ठाकरे आणि शिवसेना (ठाकरे गट) पक्षप्रमुख उद्धव ठाकरे यांच्यावर शब्दांच्या फैरी झाडल्या आहेत.

"राज ठाकरे या निवडणुकीत केवळ पराभूत होणार नाहीत, तर ते इतिहासातील सर्वात मोठ्या पराभवाचे धनी ठरतील," अशी खळबळजनक भविष्यवाणी फडणवीस यांनी केली आहे. यामुळे युतीच्या चर्चेत असलेल्या 'ठाकरे बंधूं'च्या गोटात मोठी खळबळ उडाली आहे.

"वेळ निघून गेली": ठाकरेंच्या ताकदीवर प्रश्नचिन्ह

देवेंद्र फडणवीस यांनी राज ठाकरे आणि उद्धव ठाकरे यांच्या संभाव्य युतीवर भाष्य करताना म्हटले की, या एकत्र येण्याला आता कोणतेही राजकीय महत्त्व उरलेले नाही. त्यांच्या मते, जर शिवसेना आणि मनसे २००९ मध्ये एकत्र आले असते, तर महाराष्ट्राचा राजकीय नकाशा वेगळा असता. आज या दोन्ही नेत्यांकडे पूर्वीसारखी जनमताची ताकद उरलेली नाही.

राज ठाकरेंना फटका

या युतीचा थोडा फायदा कदाचित उद्धव ठाकरेंना होईल, पण राज ठाकरे यांना मात्र शून्य पदरी पडेल. त्यांचा हा पराभव ऐतिहासिक असेल, असे फडणवीस यांनी ठामपणे नमूद केले.

"मालमत्ता मिळते, वारसा नाही": उद्धव ठाकरेंवर बोचरी टीका

उद्धव ठाकरे यांच्यावर निशाणा साधताना फडणवीस यांनी वैचारिक वारशाचा मुद्दा उपस्थित केला. ते म्हणाले, "एखाद्याचा जन्म मोठ्या घरात झाला तर त्याला वडिलोपार्जित मालमत्ता मिळू शकते, पण विचारांचा वारसा मिळत नाही." बाळासाहेब ठाकरेंच्या प्रखर हिंदुत्वाचा वारसा उद्धव ठाकरेंनी सोडल्याचा आरोप करत त्यांनी थेट त्यांच्या विचारधारेवरच घाला घातला. या विधानामुळे ठाकरे गटाच्या कार्यकर्त्यांमध्ये तीव्र संतापाची लाट उसळली आहे.

महापौरपदावरून 'मराठी विरुद्ध हिंदू' वाद

मुंबईच्या महापौरपदाच्या मुद्द्यावरून उद्धव ठाकरे यांनी फडणवीसांच्या विधानांना चोख प्रत्युत्तर दिले आहे. मुंबईचा महापौर 'मराठी' की 'हिंदू' यावरून आता नवा वाद पेटला आहे. भाजपने मुंबईचा महापौर 'हिंदू' असेल असे म्हटले आहे. उद्धव ठाकरे यांनी यावर पलटवार करत विचारले, "भाजप मराठी माणसाला हिंदू मानत नाही का? मुंबईचा महापौर मराठीच व्हायला हवा."

फडणवीसांवर टीका करताना ठाकरेंनी संयुक्त महाराष्ट्राच्या लढ्याचा संदर्भ दिला. "मराठी माणसांवर गोळ्या झाडणारे मोरारजी देसाई हिंदू नव्हते का?" असा बोचरा सवाल करत त्यांनी भाजपच्या हिंदुत्वाच्या व्याख्येलाच आव्हान दिले आहे.

वाक्युद्ध पेटले: मुंबईच्या सत्तेसाठी 'दोस्तीत कुस्ती'

एकीकडे देवेंद्र फडणवीस यांनी राज ठाकरे यांच्या राजकीय अस्तित्वावर प्रश्नचिन्ह उपस्थित केले आहे, तर दुसरीकडे उद्धव ठाकरे यांनी भाजपला मराठी अस्मितेच्या मुद्द्यावरून घेरले आहे. 'मराठी विरुद्ध अमराठी' आणि 'हिंदुत्व' या दोन मुद्द्यांभोवती आता मुंबई महानगरपालिकेची निवडणूक फिरताना दिसत आहे.