Pakistan Blast:पाकिस्तानात आत्मघातकी हल्ला, खैबर पख्तूनख्वा प्रांतात13 सैनिक ठार, किती झाले जखमी!

Pakistan Blast News in Marathi : पाकिस्तानच्या अतिशय अशांत असलेल्या भागात लष्कर आणि पोलिसांच्या ताफ्यांवर हल्ले होणे हे आता सामान्य झाले आहे. शनिवारी देखील खैबर पख्तूनख्वाच्या उत्तर वझिरीस्तान जिल्ह्यात झालेल्या आत्मघातकी हल्ल्यात 13 पाकिस्तानी सैनिक ठार झाले. या आत्मघातकी हल्ल्यात आणखी 10 सैनिक जखमी झाल्याचे वृत्त आहे.

पाकिस्तानी माध्यमांनुसार, या हल्ल्यात दोन डझनहून अधिक लोक जखमी झाले आहेत. एका स्थानिक सरकारी अधिकाऱ्याने सांगितले की, एका आत्मघातकी हल्लेखोराने स्फोटकांनी भरलेले वाहन लष्करी ताफ्यावर धडकवले.

अफगाणिस्तानला लागून असलेल्या भागात हल्ला!

खैबर पख्तूनख्वाचा हा भाग पाकिस्तान आणि अफगाणिस्तानच्या सीमेला लागून आहे. अलिकडच्या काळात येथे लष्करी ताफ्यांना लक्ष्य करण्याच्या अनेक घटना घडल्या आहेत.

स्थानिक प्रशासन आणि सुरक्षा अधिकाऱ्यांच्या मते, हा स्फोट इतका शक्तिशाली होता की जवळच्या दोन घरांच्या छतांवर पडली आणि सहा ते सात मुले जखमी झाले आहेत.

पाकिस्तान स्फोटामागे तालिबानचा हात?

आतापर्यंत कोणत्याही दहशतवादी संघटनेने या हल्ल्याची जबाबदारी स्वीकारलेली नाही. तथापि, या भागात तहरीक-ए-तालिबान पाकिस्तान (TTP) चा वाढता प्रभाव पाहता, या संघटनेची भूमिका या हल्ल्यामागे असण्याची शक्यता वर्तविली जात आहे.

पाकिस्तानी माध्यमांनी केला दावा..!

पाकिस्तानी माध्यमांनुसार, टीटीपीने हा हल्ला केला आहे, कारण उत्तर वझिरीस्तान प्रदेश हा पाकिस्तानातील सर्वात अस्थिर भागांपैकी एक मानला जातो. येथे दररोज दहशतवादी घटना घडत राहतात. या भागात तालिबानचा नेहमीच प्रभाव राहिला आहे.

स्फोटामुळे अनेक घरांचे मोठे नुकसान झाले आहे आणि संपूर्ण परिसरात दहशतीचे वातावरण आहे. हल्ल्याच्या आसपासचा परिसर सील करण्यात आला आहे.

बलुचिस्तान-खैबर पख्तूनख्वामध्ये चिंताजनक परिस्थिती

गेल्या काही महिन्यांत पाकिस्तानच्या अनेक भागात सैनिक आणि पोलिसांवर हल्ले झाले आहेत. खैबर पख्तूनख्वा आणि बलुचिस्तानमध्ये दहशतवादी हल्ल्यांच्या घटनांमध्ये वाढ झाली आहे. या वर्षी मार्चमध्ये दक्षिण वझिरीस्तानमध्ये आत्मघातकी हल्ला झाला.

• डिसेंबर २०२४ मध्ये, अफगाण सीमेजवळ झालेल्या हल्ल्यात १६ सैनिक ठार झाले होते, ज्याची जबाबदारी टीटीपीने घेतली होती.
• जानेवारीमध्ये, बलुच लिबरेशन आर्मीने केच भागात ९४ सैनिकांच्या मृत्युचा दावा केला होता.
• जून २०२५ मध्ये, ग्वादरच्या सयाबाद भागात १६ सैनिकांच्या मृत्युची बातमी आली होती.

या मालिकेतील हल्ल्यांमुळे पाकिस्तानच्या अंतर्गत सुरक्षा व्यवस्थेवर प्रश्नचिन्ह निर्माण झाले आहे. एकीकडे लष्कराने प्रत्युत्तरादाखल बोलले असताना, आर्थिक आघाडीवर संघर्ष करणाऱ्या पाकिस्तानच्या दोन प्रांतांमधील दहशतवादी कारवाया प्रादेशिक स्थिरतेसाठी मोठा धोका बनत आहेत.