नेपाळमध्ये अभूतपूर्व अराजकता; संसद आणि मंत्र्यांची घरे पेटवली, सरकार कोसळले

नेपाळमध्ये सध्या राजकीय अस्थिरतेने आणि जनतेच्या तीव्र रोषाने वातावरण पूर्णपणे ढवळून निघाले आहे. सोशल मीडियावर लादलेल्या निर्बंधांमुळे सुरू झालेल्या आंदोलनाने आता हिंसक रूप धारण केले असून, त्याचा थेट परिणाम देशाच्या राजकारणावर झाला आहे. आंदोलकांनी संसदेला आग लावली, न्यायालयांमध्ये जाळपोळ केली आणि मंत्र्यांच्या घरांवर हल्लाबोल केला. या अभूतपूर्व हिंसाचारामुळे नेपाळचे पंतप्रधान केपी शर्मा ओली यांना अखेर त्यांच्या पदाचा राजीनामा द्यावा लागला.

आंदोलनाचा उद्रेक आणि सरकारचा गोंधळ

नेपाळ सरकारने सोशल मीडियाच्या वापरांवर निर्बंध आणण्याचा प्रयत्न केला. सरकारच्या या निर्णयामुळे तरुण वर्ग कमालीचा संतप्त झाला. त्यानंतर, सोशल मीडियावरील बंदी तात्काळ मागे घेण्यात आली, तरीही आंदोलकांचा संताप शांत झाला नाही. भ्रष्टाचार, पोलीस व्यवस्थेतील त्रुटी आणि सरकारचा मनमानी कारभार यांसारख्या अनेक मुद्द्यांवरून जनतेचा संताप आधीच धुमसत होता. सोशल मीडियावरील निर्बंध हे केवळ या संतापाची ठिणगी ठरले.

आंदोलकांनी काठमांडूमधील संसदेच्या इमारतीवर मोर्चा नेऊन तिला आग लावली. त्याचसोबत, न्यायालयांच्या परिसरातही जाळपोळ करण्यात आली. हिंसेचे हे लोण केवळ सरकारी इमारतांपुरते मर्यादित राहिले नाही. आंदोलकांनी अनेक मंत्र्यांच्या घरांवरही हल्ले केले, त्यांच्या घरांना आग लावली आणि तोडफोड केली. नेपाळच्या ऊर्जामंत्र्यांच्या घराबाहेर तर आंदोलकांनी नोटा उधळून निषेध व्यक्त केला.

पंतप्रधानांचा राजीनामा आणि राजकीय पलायन

आंदोलन चिघळल्यानंतर अखेर सरकारने नमते घेत पंतप्रधान केपी शर्मा ओली यांनी आपल्या पदाचा राजीनामा दिला. त्यांच्यासोबत गृहमंत्री, आरोग्य मंत्री आणि कृषिमंत्र्यांसह इतर दहा मंत्र्यांनीही राजीनामा दिला. अनेक मंत्र्यांनी देश सोडून पळून जाण्याची तयारी सुरू केली असल्याचीही माहिती समोर येत आहे. तर, माजी पंतप्रधान केपी शर्मा ओली हे उपचाराच्या नावाखाली दुबईत पळ काढण्याच्या तयारीत असल्याचे बोलले जात आहे.

याचदरम्यान, आंदोलकांनी राष्ट्रपतींच्या घरावरही कब्जा करत तिथे मोठ्या प्रमाणावर तोडफोड आणि लुटमार केली. या सर्व परिस्थितीमुळे नेपाळमधील राजकीय व्यवस्था पूर्णपणे कोलमडली आहे.

🔥#Nepal
👉 प्रदर्शनकारियों ने राष्ट्रपति, प्रधानमंत्री व मंत्रियों के घरों को आग के हवाले किया, संसद भवन में लगी अभी भी बेकाबू
👉 काठमांडू एयरपोर्ट पर सभी उड़ानें बंद#Nepal #NepalProtests #BreakingNews‌ pic.twitter.com/VFVu7689Uy

— Madhurendra kumar मधुरेन्द्र कुमार (@Madhurendra13) September 9, 2025

रवी लामिछाने यांच्या सुटकेची मागणी

आंदोलकांनी केवळ सरकारच्या विरोधातच नव्हे, तर तुरुंगावरही हल्ला केला. नेपाळमधील तुरुंग फोडून आंदोलकांनी लोकप्रिय राजकीय नेते रवी लामिछाने यांना सोडवून आणल्याचे वृत्त आहे. लामिछाने यांच्यावर काही आरोप असल्याने त्यांना नुकतेच अटक करण्यात आली होती. लामिछाने हे एक पत्रकार आणि राजकारणी आहेत, जे नेपाळमध्ये भ्रष्टाचाराविरोधात आवाज उठवण्यासाठी ओळखले जातात. त्यांच्या अटकेमुळे जनतेचा संताप आणखी वाढला होता.

सत्तांतराचे संकेत आणि बालेन शाह यांच्याकडे नेतृत्व

केपी शर्मा ओली यांच्या राजीनाम्यानंतर नेपाळमध्ये आता सत्तांतराची शक्यता निर्माण झाली आहे. काठमांडूचे महापौर असलेले बालेन शाह यांचे नाव पंतप्रधानपदासाठी आघाडीवर आहे. बालेन शाह हे एक तरुण चेहरा असून, ते नेपाळी रॅपर आणि संगीतकार म्हणूनही प्रसिद्ध आहेत. त्यांनी तरुणाईच्या आंदोलनाला सुरुवातीपासूनच पाठिंबा दिला होता.

सध्या नेपाळमध्ये लष्कराने सूत्रे हातात घेतली असून, लष्कर बालेन शाह यांना अंतरिम पंतप्रधानपद देण्याची शक्यता वर्तवली जात आहे. बालेन शाह यांच्या नेतृत्वाखालील नवीन सरकार स्थापन करण्याचे प्रयत्न सुरू झाले आहेत. ही सर्व परिस्थिती लक्षात घेता, नेपाळमध्ये सध्या अभूतपूर्व अराजक माजले असून, यातून बाहेर पडण्यासाठी देशाला एका स्थिर नेतृत्वाची नितांत गरज आहे.