पुण्यश्लोक अहिल्याबाई होळकर... पहलगाम हल्ला ते ऑपरेशन सिंदूर! PM मोदी काय म्हणाले? वाचा 5 मुद्यात

PM modi On ahilyabai holkar 5 key highlights : लोकमाता देवी अहिल्याबाई होळकर या भारतीय वारशांच्या संवर्धक आहेत, जेव्हा भारतातील मंदिरे आणि तीर्थक्षेत्रांवर हल्ले झाले तेव्हा अहिल्याबाई होळकर यांनी या तीर्थक्षेत्रांचा आणि मंदिरांचे पुर्ननिर्माण केले, असे उद्गगार पंतप्रधान नरेंद्र मोदी यांनी आज पुण्यश्लोक अहिल्याबाई होळकर यांच्या तीनशेव्या जयंतीनिमित्त काढले. भोपाळ येथे पंतप्रधान मोदी मध्यप्रदेशच्या दौऱ्यावर आहेत, तेथे ते महिला महासंमेलनाला उपस्थित होते, त्यावेळी पंतप्रधान मोदींनी हे भाष्य केले, यासह त्यांनी इंदूर मेट्रो आणि सतना आणि दातिया विमानतळांचे उद्घाटन केले.

आपल्या भाषणात पंतप्रधान मोदींनी प्रथम भारताच्या महिला शक्तीला वंदन केले. पंतप्रधान मोदींनी मुलींच्या लग्नाच्या वयाबद्दलही बोलले. पंतप्रधान मोदींनी ऑपरेशन सिंदूर आणि पहलगाम दहशतवादी हल्ल्याबद्दलही आपले परखड विचार मांडले. नेमके काय म्हणाले पंतप्रधान मोदी 5 मुद्द्यात समजून घेऊया.

1. अहिल्यादेवी होळकर यांचे धर्मकार्य

पंतप्रधान नरेंद्र मोदी म्हणाले की, आज लोकमाता देवी अहिल्याबाई होळकर यांची तिनशेवी जयंती आहे. हा 140 कोटी भारतीयांसाठी प्रेरणादायी प्रसंग आहे. राष्ट्र उभारणीसाठी केल्या जाणाऱ्या भगीरथ प्रयत्नांमध्ये योगदान देणे हा आहे. अहिल्याबाई होळकर यांनी शासनाचा अर्थ म्हणजे जनतेची सेवा करुन त्यांचे जीवन सुधारणे हे होय. आजचा कार्यक्रम त्यांच्या विचारांना पुढे घेऊन जातो. आमचे सरकारही याच अहिल्यादेवींच्या नितीमुल्यांवर चालत आहे.

2. चांद्रयान आणि नारीशक्तीवर भाष्य

पंतप्रधान नरेंद्र मोदी यांनी नारीशक्तीवर भाष्य केले. "सर्वप्रथम, मी भारतमातेला, भारताच्या महिला शक्तीला वंदन करतो. आज इतक्या मोठ्या संख्येने माता-भगिनी-मुली आपल्याला आशीर्वाद देण्यासाठी येथे आल्या आहेत. तुम्हा सर्वांना भेटून मला भाग्य लाभले आहे.'' पंतप्रधान नरेंद्र मोदी म्हणाले, "आज आमचे सरकार लोकमाता अहिल्याबाईंच्या त्याच मंत्रांवर काम करत आहे. 'नागरिक देवो भव' हा आजच्या शासनाचा मंत्र आहे. आमचे सरकार महिला नेतृत्वाखालील विकासाच्या दृष्टिकोनाला विकासाचा अक्ष बनवत आहे. सरकारच्या प्रत्येक मोठ्या योजनेच्या केंद्रस्थानी महिला आहेत. आज आमच्या सर्व प्रमुख अंतराळ मोहिमांमध्ये मोठ्या संख्येने महिला शास्त्रज्ञ काम करत आहेत. चांद्रयान-3 मध्ये 100 हून अधिक महिला शास्त्रज्ञांचा सहभाग होता."

3. पहलगाम हल्ला, सिंदूर ऑपरेशनवर भाष्य

ऑपरेशन सिंदूरवर पंतप्रधान मोदी म्हणाले, ''पहलगाममध्ये दहशतवाद्यांनी केवळ भारतीयांचे रक्त सांडले नाही, तर त्यांनी आपल्या संस्कृतीवर आणि पर्यटनावर हल्ला केला, त्यांनी आपल्या समाजात फूट पाडण्याचा प्रयत्न केला आहे. सर्वात महत्त्वाची गोष्ट म्हणजे दहशतवाद्यांनी भारताच्या महिला शक्तीला आव्हान दिले आहे. हे आव्हान दहशतवाद्यांसाठी आणि त्यांच्या मालकांसाठी मृत्युघंटा बनले आहे. ऑपरेशन सिंदूर हे दहशतवाद्यांविरुद्धच्या भारताच्या इतिहासातील सर्वात मोठे आणि यशस्वी ऑपरेशन आहे. जिथे पाकिस्तानी सैन्याने याचा विचारही केला नव्हता, तिथे आमच्या सैन्याने दहशतवाद्यांचे अड्डे उद्ध्वस्त केले. त्यांनी शेकडो किलोमीटर आत घुसून त्यांना उद्ध्वस्त केले.''

4. मुलींचे लग्न अन् धर्मनिरपेक्षतेवर भाष्य

पंतप्रधान नरेंद्र मोदी म्हणाले, ''आज जर मुलींच्या लग्नाच्या वयाची चर्चा केली तर काही लोकांना वाटते की धर्मनिरपेक्षता धोक्यात येईल. परंतु देवी अहिल्याबाईंनी वर्षानुवर्षे अशा सामाजिक दुष्कृत्यांवर चर्चा केली होती. 250 वर्षांपूर्वी त्यांनी आपल्या देशात नारी सुरक्षा दल निर्माण करण्याचे काम केले. महिलांसाठी त्यांनी त्या काळात त्यांनी हे कार्य केले आहे. माता अहिल्याबाईंनी प्रशासनाचे असे उत्कृष्ट मॉडेल स्वीकारले होते. ज्यामध्ये गरीब आणि वंचितांना सर्वोच्च प्राधान्य दिले जात असे. त्यांनी रोजगारासाठी, उद्योग वाढवण्यासाठी अनेक योजना सुरू केल्या. त्यांनी शेतीला प्रोत्साहन दिले आणि "वनोपजांवर आधारित कुटीर उद्योग आणि हस्तकला. शेतीला चालना देण्यासाठी, लहान कालव्यांचे जाळे टाकण्यात आले आणि विकसित करण्यात आले."

5. ऑपरेशन सिंदूर आणि महिला सैनिकांचा लढा

पंतप्रधान मोदी म्हणाले, "ऑपरेशन सिंदूर हे आमच्या नारी शक्तीच्या ताकदीचे प्रतीक बनले आहे. या ऑपरेशनमध्ये बीएसएफने किती मोठी भूमिका बजावली आहे हे आपल्या सर्वांना माहिती आहे. जम्मूपासून पंजाब, राजस्थान आणि गुजरातच्या सीमेपर्यंत आमच्या बीएसएफच्या मोठ्या संख्येने मुली आघाडी हाताळत होत्या. त्यांनी सीमेपलीकडून होणाऱ्या गोळीबाराला योग्य उत्तर दिले. कमांड अँड कंट्रोल सेंटरपासून ते शत्रूच्या चौक्या नष्ट करण्यापर्यंत, बीएसएफच्या मुलींनी अद्भुत शौर्य दाखवले आहे." पंतप्रधान मोदी म्हणाले की शाळेपासून ते युद्धभूमीवर, आज देशाला आपल्या मुलींच्या शौर्यावर अभूतपूर्व विश्वास आहे. नक्षलवाद्यांवर कारवाई असो किंवा सीमापार दहशतवाद असो... आज आपल्या मुली भारताच्या सुरक्षेची ढाल बनत आहेत.