बिहारच्या राजकारणात मोठा भूकंप?, नितीश कुमार CMपदाचा राजीनामा देणार?, नेमकं काय घडलं!

Bihar Politics Nitish Kumar Latest News : बिहारच्या राजकारणात पुन्हा एकदा मोठी उलथापालथ होण्याचे संकेत मिळत आहेत. मुख्यमंत्री नितीश कुमार आपल्या पदाचा राजीनामा देऊन केंद्रात म्हणजेच राज्यसभेत जाऊ शकतात, अशी जोरदार चर्चा राजकीय वर्तुळात सुरू झाली आहे. बुधवारी संध्याकाळी मुख्यमंत्र्यांच्या निवासस्थानी झालेल्या एका उच्चस्तरीय बैठकीनंतर या चर्चांना उधाण आले आहे.

मुख्यमंत्री निवासातील 'ती' महत्त्वाची बैठक

मिळालेल्या माहितीनुसार, बुधवारी संध्याकाळी नितीश कुमार यांच्या निवासस्थानी एक महत्त्वाची बैठक पार पडली. या बैठकीला त्यांचे विश्वासू सहकारी संजय झा आणि विजय चौधरी उपस्थित होते. जरी जेडीयूचे ज्येष्ठ नेते नितीश कुमार यांनी दिल्लीला जावे या मताचे नसले, तरी खुद्द मुख्यमंत्री स्वतःच्या आणि आपला मुलगा निशांत कुमार याच्या नावावर गंभीरपणे विचार करत असल्याचे समजते.

निशांत कुमार यांचे राजकारणात पदार्पण?

या संपूर्ण नाट्यात सर्वात लक्षवेधी बाब म्हणजे नितीश कुमार यांचा मुलगा निशांत कुमार यांच्या नावाची चर्चा. आतापर्यंत राजकारणापासून दूर राहिलेले निशांत कुमार सक्रिय राजकारणात प्रवेश करू शकतात. याबाबत सध्या तीन मुख्य शक्यता वर्तवण्यात येत आहेत:

पहिली शक्यता : नितीश कुमार स्वतः राज्यसभेत जातील आणि मुलाला बिहारचे उपमुख्यमंत्री बनवून भाजपचा मुख्यमंत्री स्वीकारतील.

दुसरी शक्यता: नितीश कुमार बिहारमध्येच राहतील आणि निशांत कुमार यांना राजकीय श्रीगणेशा करण्यासाठी राज्यसभेत पाठवतील.

तिसरी शक्यता : पक्षांतर्गत इतर नावांवर एकमत होत नसल्याने केवळ दबाव तंत्र म्हणून ही नावे पुढे केली जात आहेत.

विरोधी पक्षाचा 'ऑपरेशन लोटस'चा आरोप

राजद (RJD) प्रवक्ते शक्ती सिंह यादव यांनी या परिस्थितीवर कडाडून टीका केली आहे. त्यांनी 'X' वर पोस्ट करत म्हटले की, "हा भाजपचा सर्वात घृणास्पद कट आहे. नितीश कुमार आज पूर्णपणे असहाय्य झाले असून 'ऑपरेशन लोटस'च्या माध्यमातून त्यांना कोंडीत पकडले जात आहे. त्यांना जबरदस्तीने राज्यसभेची उमेदवारी भरण्यास भाग पाडले जात आहे." राजदने याला "बिहारच्या इतिहासातील सर्वात लज्जास्पद राजकीय अपहरण" असे संबोधले आहे.

चिराग पासवान यांनी अफवा फेटाळल्या

दुसरीकडे, एनडीएचा मित्रपक्ष असलेल्या लोक जनशक्ती पक्षाचे (रामविलास) नेते चिराग पासवान यांनी हे सर्व दावे फेटाळून लावले आहेत. ते म्हणाले, "नितीश कुमार कुठेही जात नाहीत. बिहारमध्ये मुख्यमंत्री बदलण्याबाबत कोणतीही चर्चा नाही. आमचे डबल इंजिन सरकार पूर्ण ताकदीने काम करत राहील."

जेडीयूची भूमिका: "नितीश हेच आमचे नेते"

सोशल मीडियावरील चर्चांवर पडदा टाकण्याचा प्रयत्न करत जेडीयूने (JDU) स्पष्ट केले की, "नितीश कुमार हे बिहारचे सर्वमान्य नेते आहेत. लोकांचा त्यांना असलेला प्रचंड पाठिंबा हीच त्यांची खरी ओळख आहे." दरम्यान, पक्षाचे कार्यवाहक अध्यक्ष संजय झा दिल्लीहून पाटण्यात पोहोचल्याने हालचालींना वेग आला आहे.

नेमके काय घडणार? (महत्त्वाचे मुद्दे)

केंद्रीय मंत्री रामनाथ ठाकूर यांची राज्यसभेची उमेदवारी जवळपास निश्चित मानली जात आहे.

नितीश कुमार यांच्या दिल्लीवारीमुळे बिहारमध्ये भाजपचा मुख्यमंत्री बसण्याचा मार्ग मोकळा होऊ शकतो.

निशांत कुमार यांच्या एन्ट्रीमुळे जेडीयूमध्ये घराणेशाहीच्या मुद्द्यावरून वाद होण्याची शक्यता आहे.

बिहारच्या या राजकीय नाट्याचा पुढचा अंक काय असेल, याकडे आता संपूर्ण देशाचे लक्ष लागले आहे.