Navratri Day 3 : आज नवरात्रीचा तिसरा दिवस: वाचा माता चंद्रघंटाची अद्भुत कथा अन् आदिशक्तीचा महिमा

Navratri Day 3, Maa Chandraghanta story in marathi : आज २४ सप्टेंबर! नवरात्रीचा तिसरा दिवस, जो आदिशक्तीच्या तिसऱ्या रूपात, म्हणजेच माता चंद्रघंटा यांच्या पूजेसाठी समर्पित आहे. देवी चंद्रघंटा हे सौंदर्य, धैर्य आणि शौर्याचे एक अनोखे प्रतीक आहे. त्यांच्या कपाळावर चंद्रकोर आणि हातात घंटा असल्याने त्यांना हे नाव मिळाले आहे. चला जाणून घेऊया, त्यांच्या अद्भुत कथेबद्दल आणि त्यांच्या पूजनाचे महत्त्व.

देवी चंद्रघंटा आणि राक्षसांचा संहार

पौराणिक कथेनुसार,अतिप्राचीन काळी, जेव्हा पृथ्वीवर आणि देवलोकावर महिषासुर नावाच्या एका महाकाय राक्षसाने आपले अमानुष अत्याचार सुरू केले, तेव्हा सर्वत्र हाहाकार माजला. त्याच्या वाढत्या सामर्थ्याने देवही भयभीत झाले आणि त्यांनी या संकटातून मार्ग काढण्यासाठी भगवान ब्रह्मा, विष्णू आणि महेश यांच्याकडे धाव घेतली. देवांच्या तळमळीच्या प्रार्थनेने त्या तिन्ही देवतांचे तेज एकत्र आले आणि त्यातूनच माता दुर्गेचे अत्यंत तेजस्वी आणि भव्य रूप प्रकट झाले.

माता दुर्गा, आपल्या चंद्रघंटा रूपात, सर्वांना मोहित करणाऱ्या सौन्दर्यासह अवतरल्या, पण त्यांचे हे रूप दुष्टांचा नाश करण्यासाठी अत्यंत क्रूर आणि प्रभावी होते. त्यांच्या कपाळावर चंद्रकोर शोभत होती, हातात त्रिशूल, कमळ आणि घंटेने युक्त असलेली आयुधे होती. जेव्हा त्यांनी राक्षसांसोबत युद्ध सुरू केले, तेव्हा त्यांच्या हातातील घंटेचा नाद इतका भयानक होता की तो ऐकून महिषासुराच्या सैन्यात एकच गोंधळ उडाला आणि त्यांची शक्ती आपोआप क्षीण झाली.

आपल्या असीम शक्ती आणि अतुलनीय पराक्रमाने माता चंद्रघंटा यांनी एका क्षणात सर्व दुष्ट राक्षसांचा संहार केला. अशाप्रकारे, त्यांनी विश्वातील असत्याचा आणि अधर्माचा अंत करून पुन्हा एकदा शांतता आणि धर्म प्रस्थापित केला.

पूजनाचे महत्त्व

देवी चंद्रघंटाची उपासना केल्याने भक्तांच्या मनात धैर्य, शक्ती आणि आत्मविश्वास निर्माण होतो. त्यांच्या भक्तांना सर्व प्रकारच्या भीती आणि संकटांपासून मुक्ती मिळते. अशी श्रद्धा आहे की, ज्या घरात माता चंद्रघंटाची पूजा होते, तिथे सुख-समृद्धी आणि शांतीचा वास असतो. त्यांची पूजा केल्याने ग्रहबाधा दूर होते आणि भक्तांचे जीवन आनंदाने परिपूर्ण होते.

विजया दशमी का साजरी करतात..?

दुर्गा माता आणि राक्षस महिषासुराचे नऊ दिवस युद्ध चालले. या अथक आणि भयंकर युद्धानंतर, दहाव्या दिवशी देवी दुर्गा सिंहावर आरूढ झाली. महिषासुर वेगवेगळ्या रूपांत येऊन देवीला फसवण्याचा प्रयत्न करत होता, पण देवीच्या त्रिशूलासमोर त्याचे सर्व प्रयत्न विफल ठरले. अखेर देवीने त्रिशूलाने महिषासुराचा वध केला आणि विश्वातील असत्याचा, पापाचा अंत केला. हाच तो दिवस, ज्याला आपण विजयादशमी किंवा दसरा म्हणून साजरा करतो. नवरात्रीनंतर दसरा साजरा करण्याची हीच खरी कथा आहे. हा सण केवळ एका विजयाचा उत्सव नसून, वाईट प्रवृत्तीवर चांगल्या विचारांच्या आणि धर्मावर अधर्माच्या विजयाचे प्रतीक आहे.

हेही वाचा : Shardiya Navratri 2025 wishes messages marathi : नवरात्रीसाठी 'या' मराठमोळ्या शुभेच्छा-कोट! शेअर करा