भारत-पाक महामुकाबला होणार नाही! वर्ल्डकपचे पूर्ण वेळापत्रक जाहीर, 'या' दिवशी भारताचा पहिला सामना

Published: Thursday, November 20, 2025, 8:38 [IST]

U19 WC 2026 full Schedule in marathi IND vs-PAK Match Updates : युवा क्रिकेटपटूंचे भविष्य घडवणारी सर्वात मोठी स्पर्धा म्हणजेच ICC अंडर-19 पुरुष क्रिकेट वर्ल्ड कप 2026 चे संपूर्ण वेळापत्रक आंतरराष्ट्रीय क्रिकेट परिषदेने नुकतेच घोषित केले आहे. 15 जानेवारी ते 6 फेब्रुवारी 2026 या काळात ही स्पर्धा झिम्बाब्वे आणि नामिबियामध्ये खेळली जाणार आहे. मात्र, क्रिकेटप्रेमींसाठी एक मोठी निराशाजनक बातमी आहे - स्पर्धेच्या लीग टप्प्यात भारत आणि पाकिस्तान यांच्यात कोणताही सामना होणार नाही.

युवा वर्ल्ड कपमध्ये एकूण 23 दिवसांत 41 सामने खेळवले जाणार आहेत. यात 16 संघांना चार-चारच्या गटात विभागण्यात आले आहे. मागील 2024 च्या वर्ल्ड कप प्रमाणेच यावेळेसही स्वरूप कायम ठेवण्यात आले आहे.

स्पर्धेची सुरुवात आणि भारताचे सामने

टूर्नामेंटची सुरुवात 15 जानेवारी 2026 रोजी होणार आहे आणि याच दिवशी भारताचा पहिला सामना USA (युनायटेड स्टेट्स ऑफ अमेरिका) विरुद्ध बुलावायो येथे खेळला जाईल.

भारताच्या ग्रुप स्टेजमधील महत्त्वाचे सामने

15 जानेवारी: भारत vs USA (बुलावायो)

17 जानेवारी: भारत vs बांगलादेश (बुलावायो)

24 जानेवारी: भारत vs न्यूझीलंड (बुलावायो)

भारत-पाकिस्तान मुकाबला टळला

प्रत्येक आयसीसी (ICC) स्पर्धेतील सर्वात मोठा हाय-व्होल्टेज सामना म्हणून भारत-पाकिस्तान लढतीकडे पाहिले जाते. परंतु, यावेळी लीग टप्प्यात दोन्ही कट्टर प्रतिस्पर्धी संघ एकमेकांविरुद्ध खेळणार नाहीत. 'ऑपरेशन सिंदूर' आणि 'पहलगाम आतंकी हल्ल्या' नंतर देशात पाकिस्तानविरुद्धचे सामने आयोजित करण्यावर सातत्याने विरोध होत असल्याने हा निर्णय घेण्यात आल्याचे वृत्त आहे.

स्पर्धेचे पुढील टप्पे आणि ठिकाणे

ग्रुप स्टेज संपल्यावर प्रत्येक गटातील अव्वल तीन संघ सुपर सिक्स टप्प्यात प्रवेश करतील. यानंतर सेमी-फायनल आणि 6 फेब्रुवारी रोजी हरारे येथे अंतिम सामना खेळवला जाईल. महत्त्वाचे म्हणजे, सेमी-फायनल आणि फायनल या तिन्ही मोठ्या सामन्यांसाठी राखीव दिवस ठेवण्यात आला आहे.

हरारे स्पोर्ट्स क्लब, टकाशिंगा स्पोर्ट्स क्लब (हरारे), क्वीन्स स्पोर्ट्स क्लब (बुलावायो) आणि नामीबिया क्रिकेट ग्राउंड व एचपी ओवल (विंडहोक, नामिबिया) या प्रमुख ठिकाणी सामने होणार आहेत.