IND vs PAK : पाकिस्तानविरुद्ध भारत का जिंकला? 'ही' आहेत विजयाची 5 कारणे; हे खेळाडू विजयाचे शिलेदार

IND vs PAK T20 World Cup 2026 : श्रीलंकेच्या आर. प्रेमदासा स्टेडियमवर रंगलेल्या टी२० विश्वचषक २०२६ च्या हाय-व्होल्टेज सामन्यात भारताने पाकिस्तानचा ६१ धावांनी धुव्वा उडवला आहे. प्रथम फलंदाजी करताना इशान किशनच्या वादळी खेळीच्या जोरावर भारताने १७५ धावांचे लक्ष्य ठेवले होते. प्रत्युत्तरात पाकिस्तानचा डाव अवघ्या ११४ धावांत आटोपला. या विजयासह भारताने विश्वचषकातील आपले वर्चस्व कायम राखत 'सुपर-८' मध्ये दिमाखात प्रवेश केला आहे.

पाकिस्तानविरुद्ध भारताच्या विजयाची ५ प्रमुख कारणे

१. इशान किशनची 'विस्फोटक' खेळी

सुरुवातीला अभिषेक शर्मा शून्यावर बाद झाल्यानंतर भारतीय संघ दडपणाखाली होता. मात्र, इशान किशनने पाकिस्तानी फिरकीपटूंचा समाचार घेत अवघ्या ४० चेंडूत ७७ धावांची खेळी केली. या खेळीमुळे भारताला सन्मानजनक धावसंख्या उभारता आली.

२. मधल्या फळीतील महत्त्वपूर्ण योगदान

खेळपट्टी फलंदाजीसाठी कठीण होत असताना कर्णधार सूर्यकुमार यादव (३२ धावा) आणि शिवम दुबे (२७ धावा) यांनी संयमी फलंदाजी केली. त्यांच्या योगदानामुळेच भारताने अपेक्षेपेक्षा २० धावा अधिक (१७५ धावा) केल्या, ज्या निर्णायक ठरल्या.

३. हार्दिक-बुमराहचा सुरुवातीचा धक्का

१७६ धावांचा पाठलाग करायला उतरलेल्या पाकिस्तानला हार्दिक पांड्या आणि जसप्रीत बुमराह यांनी पहिल्याच षटकांत धक्के दिले. यामुळे पाकिस्तानचा डाव सुरुवातीलाच कोलमडला आणि ते दबावाखालून सावरू शकले नाहीत.

४. फिरकीपटूंचे फिरकीजाळे

मधल्या षटकांमध्ये अक्षर पटेल आणि वरुण चक्रवर्ती यांनी टिच्चून गोलंदाजी केली. या दोघांनी केवळ धावांची गतीच रोखली नाही, तर प्रत्येकी २ बळी घेत पाकिस्तानच्या मधल्या फळीचे कंबरडे मोडले.

५. सांघिक कामगिरी आणि शिस्तबद्ध गोलंदाजी

कर्णधार सूर्याने नमूद केल्याप्रमाणे, हा विजय एका खेळाडूचा नसून संपूर्ण संघाचा होता. बुमराहने जगातील सर्वोत्तम गोलंदाज असल्याचे पुन्हा सिद्ध केले, तर कुलदीप आणि टिळक वर्मा यांनीही चेंडूने मोलाची साथ दिली.