शिवसेनेचं 'मिशन मुंबई'; आदित्य ठाकरेंच्या खांद्यावर मोठी जबाबदारी; अशी आखली रणनीती!

ShivSena ubt Mission Mumbai Manpa : महाराष्ट्रातील २९ महापालिकांच्या निवडणुकांचे बिगुल वाजले असून, संपूर्ण देशाचे लक्ष लागलेल्या मुंबई महानगरपालिकेसाठी (BMC) राजकीय रणधुमाळी शिगेला पोहोचली आहे. एकीकडे शिवसेना-भाजप-राष्ट्रवादी ही महायुती आपली ताकद आजमावत असताना, दुसरीकडे आपली 'सत्ता' आणि 'गड' वाचवण्यासाठी ठाकरे गटाने कंबर कसली आहे. या 'मिशन मुंबई'साठी युवा नेते आदित्य ठाकरे यांच्याकडे अत्यंत महत्त्वाची जबाबदारी सोपवण्यात आली असून, त्यांच्या रणनीतीवर शिवसेनेचे भवितव्य अवलंबून असणार आहे.

आदित्य ठाकरेंकडे नेतृत्वाची सूत्रे

मुंबई महापालिका निवडणुकीच्या प्रचाराची आणि विविध मेळाव्यांची संपूर्ण जबाबदारी आदित्य ठाकरे यांच्याकडे देण्यात आली आहे. विशेषतः युवा मतदारांना साद घालणे आणि त्यांना शिवसेनेकडे वळवणे, हा त्यांच्या रणनीतीचा मुख्य भाग असेल. पुढील आठवडाभरात उमेदवारांची यादी निश्चित करायची असल्याने मातोश्रीवर सध्या वेगवान हालचाली सुरू आहेत.

अनुभव आणि अभ्यासू रणनीती!

शिवसेनेत फूट पडण्यापूर्वीपासूनच आदित्य ठाकरे यांनी मुंबई महापालिकेच्या कामात विशेष लक्ष घातले आहे. त्यांच्या रणनीतीची काही प्रमुख वैशिष्ट्ये खालीलप्रमाणे असतील:

भ्रष्टाचाराचा मुद्दा: महापालिकेत प्रशासक नेमल्यानंतर झालेल्या कथित गोंधळावर आणि भ्रष्टाचाराच्या प्रकरणांवर आदित्य ठाकरेंनी सातत्याने आवाज उठवला आहे. हाच मुद्दा ते प्रचारात प्रकर्षाने मांडणार आहेत.

स्थानिक प्रश्नांची जाण : मुंबईतील रस्ते, पाणी, कोळीवाड्यांचे प्रश्न आणि पायाभूत सुविधांच्या कामांवर आदित्य ठाकरेंची पकड आहे. त्यामुळे मुंबईकरांच्या थेट प्रश्नांना हात घालत ते मेळावे गाजवणार आहेत.

संस्थामक लढा : राज्य निवडणूक आयोगाचा कारभार आणि मतदार यादीतील त्रुटींविरोधात त्यांनी घेतलेली आक्रमक भूमिका मतदारांना आकर्षित करण्यासाठी महत्त्वाची ठरेल.

मुंबईसह 'या' शहरांवरही विशेष लक्ष

पक्षप्रमुख उद्धव ठाकरे संपूर्ण राज्यातील निवडणुकांचे नेतृत्व करत असताना, आदित्य ठाकरे यांनी मुंबईसह इतर ३-४ मोठ्या शहरांची जबाबदारी स्वतःच्या खांद्यावर घेतली आहे. यामध्ये खालील महापालिकांचा समावेश आहे:

मुंबई: शिवसेनेचा बालेकिल्ला राखण्याचे आव्हान.

नाशिक: गेल्या काही काळापासून आदित्य ठाकरे यांनी येथे बांधणी सुरू केली आहे.

पुणे: आयटी आणि युवा वर्गापर्यंत पोहोचण्यासाठी पुण्याची जबाबदारी महत्त्वाची.

छत्रपती संभाजीनगर: मराठवाड्यातील या महत्त्वाच्या शहरात शिवसेनेची पकड घट्ट करणे.

अस्तित्वाची लढाई आणि 'ठाकरे' ब्रँड

शिवसेना पक्षासाठी ही निवडणूक केवळ सत्ता मिळवण्याची नसून अस्तित्वाची लढाई आहे. एकीकडे महायुतीचे मोठे आव्हान समोर असताना, उद्धव ठाकरेंच्या नेतृत्वात आदित्य ठाकरे मैदानात उतरणार आहेत. राज्याच्या राजकारणात 'ठाकरे' हा ब्रँड पुन्हा एकदा सिद्ध करण्याची ही मोठी संधी त्यांच्याकडे आहे.

निवडणूक वेळापत्रक

राज्यात १५ जानेवारी रोजी महापालिका निवडणुकांसाठी मतदान होणार असून, १६ जानेवारी रोजी या महायुद्धात कोण बाजी मारणार याचा निकाल स्पष्ट होईल.