"संजय राऊत, वर्षा गायकवाड, अरविंद सावंत गद्दार", भाजपने मुंबईत 'ही' पोस्टर्स का लावली? काय आहे कारण!

Sanjay Raut Varsha Gaikwad Arvind Sawant : महाराष्ट्रातील मुंबईत ठिकठिकाणी पोस्टर्स लावलेल्या पोस्टर्चची चर्चा आहे. काही भागातील पोस्टर्स तर अनेकांची लक्ष वेधून घेत आहेत, यामध्ये काँग्रेसच्या वर्षा गायकवाड, शिवसेना युबीटेचे प्रवक्ते आणि खासदार संजय राऊत आणि अरविंद सावंत यांना गद्दार म्हणत पोस्टर्सद्वारे लक्ष्य करण्यात आले आहे.

लोकसभा आणि राज्यसभेत वक्फ विधेयक मंजूर झाल्यानंतर राष्ट्रपती द्रौपदी मुर्मू यांनीही त्याला मंजुरी दिली आहे. त्यानंतर देशभरात वक्फ विधेयक लागू झाले असले तरी या विधेयकाला जोरदार विरोध होत आहे. इतकेच नाही तर या विधेयकाच्या निषेधार्थ अनेक विरोधी पक्षांनी सर्वोच्च न्यायालयात धाव घेतली आहे. वक्फ विधेयकाला विरोध करणाऱ्या नेत्यांवर टीका करण्यासाठी आता भारतीय जनता पक्षाच्या (भाजप) युवा शाखेने मुंबईत वेगळा मार्ग अवलंबला आहे.

का लागले पोस्टर्स?

वक्फ दुरुस्ती विधेयकाला विरोध करणाऱ्या नेत्यांना धर्मद्रोही ठरवण्यासाठी पोस्टर लावण्यात आले आहेत. मुंबईतील काही भागात लावलेले हे पोस्टर्स सर्वांचे लक्ष वेधून घेत आहेत. मुंबईत काँग्रेसच्या वर्षा गायकवाड आणि शिवसेनेचे (उद्धव बाळासाहेब ठाकरे गट) अरविंद सावंत आणि संजय राऊत यांना गद्दार म्हणत या पोस्टर्सद्वारे लक्ष्य करण्यात आले आहे.

कुठे लागली पोस्टर्स?

या तीन नेत्यांची पोस्टर्स वरळीतील आरजी थडानी मार्ग, चेंबूरमधील टिळक नगर सहकार टॉकीज आणि भांडुप कुंडसह अनेक ठिकाणी लावण्यात आले होते. पोस्टर्सवर या नेत्यांच्या छायाचित्रांसह 'देश, धर्म आणि पूर्वजांचे गद्दार!' असे लिहिले आहे. भाजपच्या युवा शाखेने अशाप्रकारे सार्वजनिक निदर्शनाची ही पहिलीच घटना नाही.

गद्दार कधीपासून राजकीय शब्द वापरला जात आहे?

महाराष्ट्रात शिवसेना पक्ष प्रबळ होता, 2022 मध्ये या पक्षात मोठ्या प्रमाणात फूट पडली, एकनाथ शिंदे यांनी शिवसेना पक्षात बंडखोरी केली आणि शिवसेनेवर आपला हक्क सांगितला. एवढेच नाहीतर केंद्रीय निवडणूक आयोगाने शिवसेना एकनाथ शिंदे यांचीच असल्याचा निर्णय दिला होता. दरम्यान हे प्रकरण सर्वोच्च न्यायालयात आहे. पक्षफुटीमुळे शिवसेना (UBT) अनेकदा एकनाथ शिंदे यांच्या पक्षातील नेत्यांना गद्दार म्हणून लेबल करते. या काळात अनेक आमदारांनी उद्धव ठाकरेंना सोडले, ज्यामुळे राजकारणात निष्ठा आणि विश्वासघात याबद्दल व्यापक चर्चा झाली होती.

'गद्दार'वरुन विरोधकांचे उत्तर

वक्फ विधेयकावर उद्धव ठाकरेंची शिवसेना काय भूमिका घेते यावर महाराष्ट्रातील इतर राजकीय पक्षाचे लक्ष लागले होते, त्यावरुन मुख्यमंत्री देवेंद्र फडणवीस यांनी ठाकरेंना आव्हानही दिले होते. दरम्यान वक्फ विधेयकावरुन विरोधकांच्या भूमिकेवर झालेल्या टीकेमुळे जोरदार चर्चा झाली, विरोधी सदस्यांना गद्दार संबोधल्यानंतर त्यांनीही आरोपांना उत्तर दिले. विरोधी पक्षांचे म्हणणे आहे की खोटे पसरवणारे पोस्टर प्रचाराचा अवलंब करतात. जनतेला संपूर्ण सत्य माहिती आहे.