'राष्ट्रवादी काँग्रेसचा अध्यक्ष कोण?; राज ठाकरेंनी मांडली रोखठोक भूमिका; म्हणाले- "पाटील चालेल..पण..

Raj Thackeray statement on NCP : महाराष्ट्राच्या राजकारणात गेल्या तीन दिवसांपासून सुरू असलेला सत्तासंघर्ष आणि भावनिक वळणे थांबण्याचे नाव घेत नाहीत. एकीकडे अजित पवार यांच्या निधनानंतर सुनेत्रा पवार यांनी उपमुख्यमंत्री म्हणून शपथ घेऊन सत्तेची सूत्रे हाती घेतली असतानाच, आता 'राष्ट्रवादी काँग्रेसचा अध्यक्ष कोण?' या प्रश्नावरून नवा वाद पेटण्याची चिन्हे आहेत. या वादात आता महाराष्ट्र नवनिर्माण सेनेचे अध्यक्ष राज ठाकरे यांनी उडी घेतली असून, त्यांनी मांडलेल्या रोखठोक भूमिकेने राजकीय वर्तुळात मोठी खळबळ उडाली आहे.

राज ठाकरेंची 'मराठी कार्ड' खेळी

राज ठाकरे यांनी सोशल मीडिया प्लॅटफॉर्म 'X' (ट्विटर) वर पोस्ट लिहित राष्ट्रवादीच्या नेतृत्वाबाबत आपली स्पष्ट भूमिका मांडली. राज ठाकरे म्हणाले की, "महाराष्ट्राच्या राजकारणाचा गेल्या काही काळात पार विचका झाला आहे. राष्ट्रवादी काँग्रेस हा अस्सल मराठमोळ्या मातीतला आणि रांगडा पक्ष आहे. त्यामुळे या पक्षाचा अध्यक्ष हा कोणीही मराठीच असावा; पाटील चालेल पण पटेल नको."

राज ठाकरेंच्या या विधानाचा थेट रोख पक्षाचे कार्याध्यक्ष प्रफुल्ल पटेल यांच्याकडे असल्याचे मानले जात आहे. राष्ट्रवादीच्या मूळ विचारधारेत 'मराठी' अस्मितेचा मुद्दा महत्त्वाचा असल्याचे सांगत राज ठाकरेंनी पुन्हा एकदा प्रादेशिक नेतृत्वाच्या मुद्द्याला हवा दिली आहे.

प्रफुल्ल पटेल विरुद्ध सुनेत्रा पवार: अध्यक्षपदाची शर्यत

अजितदादांच्या निधनानंतर राष्ट्रवादीमध्ये नेतृत्वाची मोठी पोकळी निर्माण झाली आहे. सध्या प्रफुल्ल पटेल हे पक्षाचे कार्याध्यक्ष म्हणून काम पाहत आहेत. मात्र, आता पूर्णवेळ अध्यक्षपदासाठी दोन नावे चर्चेत आहेत.

सुनेत्रा पवार: उपमुख्यमंत्री म्हणून शपथ घेतल्याने त्यांच्याकडे सत्तेची सूत्रे आहेत, मात्र पक्ष संघटनेला त्या कितपत वेळ देऊ शकतील, याबाबत साशंकता आहे.

प्रफुल्ल पटेल : दिल्लीच्या राजकारणातील अनुभव आणि सध्याचे कार्याध्यक्षपद यामुळे त्यांचा दावा प्रबळ मानला जात आहे.

मात्र, राज ठाकरेंनी 'पटेल' यांच्या नावावर आक्षेप घेतल्याने, राष्ट्रवादीच्या आमदारांमध्ये आणि कार्यकर्त्यांमध्ये आता अंतर्गत चर्चांना उधाण आले आहे.

काय आहेत राज ठाकरेंच्या भूमिकेचे राजकीय अर्थ?

मराठी अस्मिता : राष्ट्रवादी हा महाराष्ट्रातील ग्रामीण भागाशी जोडलेला पक्ष आहे. अशा पक्षाचे नेतृत्व 'बिगर मराठी' व्यक्तीकडे गेल्यास जनमानसात काय संदेश जाईल, असा सवाल राज ठाकरेंनी उपस्थित केला आहे.

विलीनीकरणाची टांगती तलवार : जयंत पाटील आणि शरद पवार गट सध्या विलीनीकरणासाठी सकारात्मक आहेत. अशावेळी जर प्रफुल्ल पटेल अध्यक्ष झाले, तर विलीनीकरणाच्या प्रक्रियेत अडथळे येऊ शकतात का? असाही प्रश्न विचारला जात आहे.

शरद पवारांची भूमिका : राज ठाकरेंनी 'पाटील' असावा असे म्हणत अप्रत्यक्षपणे जयंत पाटील किंवा अन्य मराठी नेत्यांना पाठबळ दिले आहे का? याकडे सर्वांचे लक्ष लागले आहे.

राष्ट्रवादीच्या गोटात शांतता की वादळ?

सुनेत्रा पवारांच्या शपथविधीनंतर राष्ट्रवादी काँग्रेसमध्ये आनंदाचे वातावरण असले तरी, राज ठाकरेंच्या या विधानाने पक्षात दोन गट पडण्याची शक्यता आहे. प्रफुल्ल पटेल हे अजितदादांचे अत्यंत विश्वासू सहकारी राहिले आहेत, त्यामुळे पक्ष संघटना त्यांच्यावर नाराज होणार की राज ठाकरेंच्या 'मराठी कार्ड'ला साथ देणार, हे पाहणे औत्सुक्याचे ठरेल.