ते अंध आहेत....रामभद्राचार्यांबद्दल बोलताना नाना पटोले नेमके काय म्हणाले?

काँग्रेस नेते राहुल गांधी यांच्या कार्यपद्धतीवरून सध्या महाराष्ट्राच्या राजकारणात नवे शाब्दिक युद्ध पाहायला मिळत आहे. राहुल गांधी प्रभू श्रीरामांच्या आदर्शांचे पालन करत असल्याचे वक्तव्य नाना पटोले यांनी केले होते, ज्यावर जगद्गुरु स्वामी रामभद्राचार्य यांनी तीव्र आक्षेप घेतला. आता या टीकेला प्रत्युत्तर देताना पटोले यांनी, 'काही लोकांना राहुल गांधींचे कार्य दिसत नाही कारण ते सत्याबाबत आंधळे झाले आहेत', अशा शब्दांत निशाणा साधला आहे.

या वादाची सुरुवात नाना पटोले यांच्या एका विधानापासून झाली. राहुल गांधी हे देशातील शोषित, पीडित आणि वंचित घटकांसाठी लढा देत असून त्यांचा हा संघर्ष प्रभू श्रीरामांच्या जीवनप्रवासासारखाच खडतर असल्याचे पटोले म्हणाले होते. यावर स्वामी रामभद्राचार्य यांनी कडक शब्दांत टीका करत, राहुल गांधी कधीही श्रीरामांना समजू शकत नाहीत आणि पटोले हे केवळ गांधी घराण्याची चाटुगिरी करत असल्याचा आरोप केला होता.

स्वामींच्या या टीकेला उत्तर देताना नाना पटोले यांनी आपली भूमिका अधिक स्पष्ट केली. ते म्हणाले की, स्वामी रामभद्राचार्य हे ज्येष्ठ आणि आदरणीय व्यक्ती आहेत, त्यामुळे मी त्यांच्यावर वैयक्तिक टिप्पणी करणार नाही. मात्र, राहुल गांधींची लढाई ही गोरगरीब आणि शेतकऱ्यांच्या हक्कासाठी आहे. जे लोक या कार्यावर टीका करत आहेत, त्यांना कदाचित सत्य दिसत नसावे. आपण राहुल गांधींची तुलना थेट देवाशी केली नसून, ते श्रीरामांच्या सत्याच्या मार्गावर चालत आहेत, असेच आपल्याला म्हणायचे होते, असे स्पष्टीकरणही त्यांनी दिले.

#WATCH | नागपुर, महाराष्ट्र: कांग्रेस नेता नाना पटोले ने जगद्गुरु स्वामी रामभद्राचार्य के बयान पर कहा, "...राहुल गांधी की लड़ाई शोषित, पीड़ित, वंचित वर्ग के लिए है, देश के लिए है... मैंने राहुल गांधी और भगवान श्री राम की तुलना नहीं की। मेरा मानना है कि राहुल गांधी भगवान राम के… pic.twitter.com/r4KZSzdhd2

— ANI_HindiNews (@AHindinews) January 1, 2026

पटोले यांनी पुढे रामायणाचा दाखला देत सांगितले की, ज्याप्रमाणे प्रभू श्रीरामांना सत्यासाठी १४ वर्षांचा वनवास आणि अनेक संकटे झेलावी लागली, तसेच राहुल गांधी देखील सध्या जनसेवेसाठी संघर्षाचा सामना करत आहेत. विरोधक कितीही टीका करत असले तरी राहुल गांधींचे कार्य देशहिताचे असून त्याकडे दुर्लक्ष करता येणार नाही, असा ठाम विश्वास त्यांनी व्यक्त केला. या नव्या आरोप-प्रत्यारोपामुळे आता राज्यातील राजकीय वातावरण अधिकच तापण्याची शक्यता आहे.