पुणे महापालिका निवडणूक: भाजपमध्ये 'निष्ठावंत' विरुद्ध 'आयात' संघर्ष पेटला; उमेदवारी देताना कसोटी!

आगामी पुणे महापालिका निवडणुकीच्या पार्श्वभूमीवर राजकीय वातावरण चांगलंच तापलं आहे. विशेषतः भारतीय जनता पक्षामध्ये (भाजप) उमेदवारी मिळवण्यासाठी मोठी चुरस पाहायला मिळत आहे. मात्र, ही चुरस आता 'निष्ठावंत विरुद्ध आयात' अशा अंतर्गत संघर्षात रूपांतरित होताना दिसत आहे. पक्षासाठी अनेक वर्षं झटणाऱ्या कार्यकर्त्यांनी आता आक्रमक पवित्रा घेतल्याने, उमेदवारांची निवड करताना भाजप नेत्यांची मोठी दमछाक होणार आहे.

२५०० इच्छुकांच्या मुलाखती आणि अस्वस्थता

पुणे महापालिकेवर सत्ता राखण्यासाठी भाजपने कंबर कसली आहे. नुकत्याच पार पडलेल्या मुलाखती प्रक्रियेत तब्बल २ हजार ५०० हून अधिक इच्छुकांनी आपला दावा ठोकला आहे. इतर पक्षांच्या तुलनेत ही संख्या प्रचंड असली, तरी त्यामध्ये अन्य पक्षांतून आलेल्या 'आयात' नेत्यांची संख्या मोठी आहे. ज्या प्रभागांमध्ये भाजपची ताकद कमी आहे, तिथे बाहेरून येणाऱ्यांना संधी दिली जाण्याची शक्यता असल्याने मूळ भाजप कार्यकर्त्यांमध्ये धाकधूक वाढली आहे.

सोशल मीडियावर 'निष्ठावंतां'चा हुंकार

"पक्ष संकटात असताना आम्ही सोबत होतो, आता सत्ता आणि सुगीचे दिवस आल्यावर बाहेरच्यांना संधी का?" असा सवाल सोशल मीडियाच्या माध्यमातून उपस्थित केला जात आहे. 'निष्ठावंत कार्यकर्त्यांना न्याय द्या' अशा आशयाच्या पोस्ट सध्या पुणे भाजपच्या वर्तुळात व्हायरल होत आहेत. पक्षाशी एकनिष्ठ राहणाऱ्या कार्यकर्त्यांचा सन्मान राखला जावा आणि केवळ विजयाची खात्री म्हणून उपऱ्यांना झुकते माप देऊ नये, अशी आग्रही मागणी ही फळी करत आहे.

घराणेशाहीचा मुद्दा पुन्हा ऐरणीवर

भाजप नेहमीच 'घराणेशाही' विरुद्ध भूमिका मांडत आला आहे. मात्र, पुण्यात अनेक आजी-माजी आमदारांच्या नातेवाईकांनी उमेदवारीसाठी मोर्चेबांधणी सुरू केली आहे. जर नेत्यांच्याच घरात उमेदवाऱ्या दिल्या गेल्या, तर सामान्य कार्यकर्त्यांनी काय करायचे? असा प्रश्न विचारला जात आहे. जर घराणेशाहीला थारा दिला, तर पक्षात बंडखोरी होण्याची शक्यताही नाकारता येत नाही.

मुंबईतील बैठकीत लागणार अंतिम मोहोर

उमेदवारांच्या नावावर शिक्कामोर्तब करण्यासाठी आज मुंबईत एक महत्त्वाची बैठक पार पडणार आहे. उपमुख्यमंत्री देवेंद्र फडणवीस यांच्या उपस्थितीत पुण्यातील प्रमुख पदाधिकाऱ्यांची ही बैठक होईल. विशेष म्हणजे, याच काळात काँग्रेसचे माजी उपमहापौर आबा बागूल यांचे पुत्र हेमंत बागूल आणि शरद पवार गटाच्या माजी नगरसेविका रोहिणी चिमटे यांच्यासह सुमारे २२ जण भाजपमध्ये प्रवेश करण्याची शक्यता आहे. या 'इनकमिंग'मुळे निष्ठावंतांची अस्वस्थता अधिकच वाढली आहे.

पक्षनेतृत्वापुढील पेच

विजयासाठी 'इलेक्टिव्ह मेरिट' (निवडून येण्याची क्षमता) पाहायची की निष्ठावंतांना न्याय द्यायचा? अशा कात्रीत भाजप अडकला आहे. निष्ठावंत नाराज झाले तर निवडणुकीत फटका बसू शकतो, आणि आयात नेत्यांना डावलले तर विजयाचे गणित बिघडू शकते. या दुहेरी संकटातून मार्ग काढताना भाजप नेत्यांची मोठी कसोटी लागणार आहे.