मुंबईचा महापौर उत्तर भारतीय होईल; कृपाशंकर सिंहांच्या विधानाने राजकारण पेटले; मनसेचा कडाडून प्रहार!

Mumbai Mayor controversy : महाराष्ट्राच्या राजकारणात 'मराठी अस्मिता' आणि 'उत्तर भारतीय मतपेढी' हा वाद पुन्हा एकदा ऐन निवडणुकीच्या तोंडावर उफाळून आला आहे. भाजप नेते कृपाशंकर सिंह यांनी मुंबई आणि मीरा-भाईंदरमध्ये उत्तर भारतीय महापौर बसवण्याचे केलेले विधान राजकीय वर्तुळात चर्चेचा आणि वादाचा केंद्रबिंदू ठरले आहे. या विधानामुळे शिवसेना (ठाकरे गट) आणि मनसे या मराठी केंद्रित पक्षांना थेट आव्हान मिळाले असून, मनसेने 'मराठी माणसा जागा हो' अशी साद घालत जोरदार पलटवार केला आहे.

नेमके प्रकरण काय?

भाजपचे नेते कृपाशंकर सिंह यांनी एका कार्यक्रमात बोलताना आगामी महानगरपालिका निवडणुकांसाठी मोठा दावा केला. ते म्हणाले की, "येणाऱ्या काळात मुंबई आणि विशेषतः मीरा-भाईंदर महानगरपालिकेत उत्तर भारतीय समाजातील व्यक्ती महापौरपदी विराजमान होईल. या ठिकाणी उत्तर भारतीय महापौर बसेल इतके नगरसेवक आम्ही निवडून आणू."

उत्तर भारतीय मतदारांची वाढती संख्या आणि त्यांचा राजकीय प्रभाव पाहता, हा समाज आता केवळ 'किंगमेकर' न राहता थेट 'किंग' बनण्याच्या तयारीत असल्याचा संकेत सिंह यांनी दिला आहे. स्थानिक पातळीवर उत्तर भारतीयांचे संघटन मजबूत करून सत्तेची सूत्रे आपल्या हातात घेण्याचा निर्धार त्यांनी बोलून दाखवला.

महाराष्ट्र व्यापण्याचा महायुतीचा 'प्लॅन २९'

कृपाशंकर सिंह यांनी केवळ मुंबईपुरते मर्यादित न राहता संपूर्ण राज्याबाबत मोठा दावा केला आहे. राज्यातील एकूण २९ महानगरपालिकांमध्ये आगामी निवडणुकीत महायुतीची सत्ता स्थापन होईल, असा विश्वास त्यांनी व्यक्त केला.

भाजप, शिवसेना (शिंदे गट) आणि राष्ट्रवादी काँग्रेस (अजित पवार गट) यांची एकत्रित ताकद राज्याच्या शहरी भागात विरोधकांचा सुपडा साफ करेल, असे संकेत त्यांच्या विधानातून मिळत आहेत.

निवडणूक रणनीती की मतांचे ध्रुवीकरण?

राजकीय विश्लेषकांच्या मते, कृपाशंकर सिंह यांचे हे विधान म्हणजे एक सुनियोजित निवडणूक रणनीती आहे. मुंबई आणि परिसरात उत्तर भारतीय मतदारांचा टक्का मोठा आहे. या मतदारांना आपल्याकडे वळवण्यासाठी आणि त्यांना राजकीय सत्तेत मोठ्या भागीदारीचे गाजर दाखवण्यासाठी हा मुद्दा पुढे रेटला जात आहे. मात्र, यामुळे मुंबईतील 'मराठी विरुद्ध उत्तर भारतीय' हा जुना संघर्ष पुन्हा पेटण्याची चिन्हे दिसत आहेत.

मनसेचा पलटवार: "आश्रय दिला, आता डोक्यावर नाचताय?"

कृपाशंकर सिंह यांच्या या दाव्यावर राज ठाकरे यांच्या महाराष्ट्र नवनिर्माण सेनेने अत्यंत आक्रमक भूमिका घेतली आहे. मनसेने सोशल मीडिया आणि पत्रकांच्या माध्यमातून मराठी माणसांना सतर्क होण्याचे आवाहन केले आहे.

मनसेने आपल्या प्रत्युत्तरात म्हटले आहे की, "मुंबईसह सर्वत्र आम्ही इतके उत्तर भारतीय नगरसेवक निवडून आणू की, महापौर उत्तर भारतीयच असेल... हे विधान कृपाशंकर सिंह यांचे आहे. चरितार्थासाठी आलेल्या उत्तर भारतीयांना मराठी माणसाने आश्रय दिला आणि आज हेच लोक मराठी माणसाच्या डोक्यावर थयथय नाचायला सुरुवात करत आहेत. मराठी माणसा, आतातरी जागा हो!"

मनसेने या विधानाचा संबंध थेट मराठी अस्मितेशी जोडला असून, मुंबईवर मराठी माणसाचाच अधिकार असल्याचे पुन्हा एकदा ठासून सांगितले आहे.

मुंबईत पुन्हा 'मराठी कार्ड' चालणार?

शिवसेना आणि मनसे या दोन्ही पक्षांची मुळे 'मराठी द्वेषाला' विरोध आणि उत्तर भारतीयांच्या लोंढ्यांना अटकाव करण्यावर आधारित आहेत. कृपाशंकर सिंह यांच्या विधानामुळे उद्धव ठाकरे आणि राज ठाकरे या दोन्ही भावांच्या पक्षांना पुन्हा एकदा आक्रमक होण्याची संधी मिळाली आहे. येणाऱ्या स्थानिक स्वराज्य संस्थांच्या निवडणुकीत विकासकामांपेक्षा 'मराठी अस्मिता' विरुद्ध 'उत्तर भारतीय वर्चस्व' हाच प्रचाराचा मुख्य मुद्दा राहण्याची शक्यता आहे. अशा परिस्थितीत मुंबईचा मतदार कुणाच्या पारड्यात आपले वजन टाकतो, हे पाहणे औत्सुक्याचे ठरेल.