लालबाग राजाच्या विसर्जनातील वाद; मंडळ कोळी बांधवास कोर्टात खेचणार, नेमकं प्रकरण काय?

Lalbaugcha Raja visarjan controversy 2025 : मुंबईच्या गणेशोत्सवाचे मानबिंदू असलेल्या लालबागच्या राजाच्या विसर्जन सोहळ्यातील विलंब यंदा वादाच्या भोवऱ्यात सापडला आहे. गणेश विसर्जनानंतर अनेक तास उलटूनही वाद शांत होत नसून, आता तर थेट कायदेशीर लढाईची वेळ आली आहे. विसर्जन सोहळ्यातील विलंबाबद्दल चुकीची माहिती पसरवल्याचा आरोप करत लालबागचा राजा मंडळाने गिरगाव चौपाटीचे नाखवा हिरालाल वाडकर यांच्यावर मानहानीचा दावा दाखल करण्याचा निर्णय घेतला आहे.

नेमका वाद काय आहे?

लालबागच्या राजाच्या विसर्जनाला यंदा ३३ तासांचा अभूतपूर्व विलंब झाला. ६ सप्टेंबर रोजी दुपारी १२ वाजता निघालेली विसर्जन मिरवणूक ७ सप्टेंबरच्या रात्री उशिरा गिरगाव चौपाटीवर विसर्जनाने पूर्ण झाली. या विलंबामुळे लाखो भाविकांना प्रचंड त्रास सहन करावा लागला. या विलंबाचे कारण समुद्रातील भरती-ओहोटीचे गणित चुकल्याचे मानले जात असताना, गिरगाव चौपाटीच्या कोळी बांधवांपैकी एक असलेल्या हिरालाल वाडकर यांनी माध्यमांसमोर एक धक्कादायक विधान केले.

वाडकर यांनी म्हटले की, "आम्ही वाडकर बंधू अनेक वर्षांपासून लालबागच्या राजाचे विसर्जन करत आलो आहोत. पण यंदा मंडळाने गुजरातमधील एका कंपनीला कंत्राट दिले. त्यामुळे भरती-ओहोटीचा अंदाज चुकल्याने हा विलंब झाला." त्यांनी मंडळावर यापुढे विसर्जनाची अधिक काळजी घेण्याचा सल्लाही दिला.

मंडळाची भूमिका आणि कारवाई

हिरालाल वाडकर यांच्या या विधानामुळे सोशल मीडियावर मोठी चर्चा सुरू झाली आणि लालबाग राजा मंडळाची प्रतिमा मलीन होत असल्याचा आरोप मंडळाने केला आहे. मंडळाचे म्हणणे आहे की, "हिरालाल वाडकर यांचा लालबाग राजा मंडळाशी कधीही संबंध नव्हता आणि त्यांनी कधीही राजाचे विसर्जन केलेले नाही. केवळ प्रसिद्धी मिळवण्यासाठी आणि मंडळाची बदनामी करण्याच्या हेतूने त्यांनी हा व्हिडिओ प्रसिद्ध केला आहे."

या आरोपानंतर, मंडळाने वाडकर यांच्याविरोधात थेट मुंबई उच्च न्यायालयात अब्रू नुकसानीचा दावा दाखल करण्याचा निर्णय घेतला आहे. मंडळाच्या मते, वाडकर यांनी दिलेली माहिती खोटी असून यामुळे मंडळाच्या प्रतिष्ठेला धक्का बसला आहे.

लालबागच्या राजाचं विसर्जन रखडलं, विसर्जनाचं कंत्राट गुजरातकडे; कोळी बांधवांचा आरोप#LalbaugchaRaja #GaneshVisarjan #MumbaiNews #Ganeshotsav2025 #VisarjanControversy #KoliCommunity pic.twitter.com/i0XGzx7FM8

— SakalMedia (@SakalMediaNews) September 7, 2025

विलंबाचे नेमके कारण

वास्तविक, यंदा लालबागच्या राजाच्या विसर्जनासाठी गुजरातमधून खास मोटराइज्ड तराफा आणला होता. मंडळाने सांगितले की, विसर्जनातील विलंब या तराफ्यावर मूर्ती योग्यरित्या बसवण्याच्या तांत्रिक प्रक्रियेमुळे झाला. मूर्ती तराफ्यावर स्थिर केल्यानंतरही समुद्रातील योग्य भरतीची वाट पाहावी लागली, ज्यामुळे विसर्जनाला जास्त वेळ लागला.

ही घटना केवळ एका विसर्जन सोहळ्यातील तांत्रिक समस्येपुरती मर्यादित नसून, ती एका प्रतिष्ठित मंडळाच्या प्रतिमेवर झालेल्या हल्ल्याची आणि त्याविरुद्ध केलेल्या कायदेशीर लढाईची आहे. यामुळे भविष्यात अशा धार्मिक आणि सामाजिक कार्यक्रमांच्या आयोजनात अधिक पारदर्शकता येण्याची शक्यता आहे.