Gauri Avahan 2025 Date : गौरी आवाहन कधी, शुभ मुहूर्त, पूजा पद्धत कशी, जाणून घ्या सर्व काही!

Gauri Avahan 2025 : गणेश चतुर्थीनंतर येणारा गौरी (महालक्ष्मी) उत्सव हा महाराष्ट्रातील एक महत्त्वाचा सण आहे. या तीन दिवसांच्या उत्सवादरम्यान घराघरात आनंदाचे आणि उत्साहाचे वातावरण असते.

भाद्रपद शुद्ध सप्तमीला गौरीचे आगमन होते आणि तीन दिवसांनी तिचे विसर्जन केले जाते. या वर्षी, गौरी आवाहन ३१ ऑगस्ट २०२५ रोजी होणार आहे.

गौरी आवाहन: कधी आणि शुभ मुहूर्त

२०२५ मध्ये, गौरी आवाहन ३१ ऑगस्ट रोजी रविवार आहे.

• गौरी आवाहन: ३१ ऑगस्ट २०२५ (रविवार)
• शुभ मुहूर्त: पहाटे ५:५९ ते संध्याकाळी ६:४३ पर्यंत
• ज्येष्ठा गौरी पूजा: १ सप्टेंबर २०२५ (सोमवार)
• गौरी विसर्जन: २ सप्टेंबर २०२५ (मंगळवार)

गौरींना काही ठिकाणी महालक्ष्मी देखील म्हणतात. लोकपरंपरेनुसार, गौरी ही गणपतीची आई पार्वती माता आणि माता लक्ष्मीची थोरली बहीण मानली जाते. माहेरवाशीण असलेल्या गौरींचा पाहुणचार मोठ्या भक्तिभावाने केला जातो.

गौरीची पूजा कशी करावी?

गौरी उत्सवाच्या तीन दिवसांत प्रत्येक दिवशी विशिष्ट पद्धतीने पूजा केली जाते.

१. गौरी आवाहन (पहिला दिवस - ३१ ऑगस्ट २०२५)

• घरात गौरीचे स्वागत करताना, ज्या स्त्रीच्या हातात गौरी असतील, तिचे पाय दूध आणि पाण्याने धुवून त्यावर कुंकवाचे स्वस्तिक काढले जाते.
• घराच्या उंबऱ्यापासून ते गौरी बसवण्याच्या जागेपर्यंत लक्ष्मीच्या पावलांचे ठसे उमटवत आणले जाते.
• काही ठिकाणी, गौरींना घरात प्रवेश देण्याआधी, त्यांना घराची समृद्धी आणि दुधदुभत्याची जागा दाखवण्याची प्रथा आहे.
• गौरींना साडी नेसवून, दागिने आणि मुखवटा घालून सजवले जाते.
• या दिवशी संध्याकाळी गौरींना भाजी-भाकरीचा नैवेद्य दाखवला जातो.

२. ज्येष्ठा गौरी पूजा (दुसरा दिवस - १ सप्टेंबर २०२५)

या दिवशी गौरींची पूजा आणि आरती केली जाते. यासाठी पुरणपोळी, ज्वारीच्या पिठाची आंबील, सोळा भाज्यांची एकत्र भाजी, वेगवेगळ्या प्रकारची भजी, पापड, लोणचे असे विविध पदार्थ बनवून केळीच्या पानावर नैवेद्य दाखवतात.

३. गौरी विसर्जन (तिसरा दिवस - २ सप्टेंबर २०२५)

• या दिवशी सकाळी सुताच्या गाठी पाडल्या जातात. या गाठींमध्ये हळदी-कुंकू, सुकामेवा, बेलफळ, रेशीम धागा अशा वस्तू टाकून त्या बांधल्या जातात.
• गौरींची पूजा-आरती करून, गोड शेवयाची खीर आणि उडीद डाळीचा भाजलेला पापड याचा नैवेद्य दाखवला जातो.
• गौरींचा पुढील वर्षी पुन्हा येण्याचे आमंत्रण देऊन निरोप घेतला जातो आणि त्यांचे पाण्यात विसर्जन केले जाते.
• विसर्जन करून परत येताना थोडी वाळू घरी आणून ती घरात सर्वत्र टाकतात, यामुळे घरात समृद्धी येते अशी लोकांची श्रद्धा आहे.

गौरी आवाहनाच्या वेळी कोणत्या चुका टाळाव्यात

• स्वच्छता : गौरी आवाहनाच्या आधी आणि उत्सवादरम्यान घराची पूर्ण स्वच्छता राखा.
• मुहूर्त : गौरी आवाहन आणि पूजेचा शुभ मुहूर्त चुकू नये.
• नियमित पूजा : उत्सवाच्या तिन्ही दिवसांत नित्यनियमाने पूजा करावी.
• पावित्र्य : पूजा करताना आणि नैवेद्य बनवताना पावित्र्याची विशेष काळजी घ्या. मांसाहार करणे टाळा.
• गौरी उत्सव हा घरातील महिलांसाठी विशेष आनंदाचा असतो. आपल्या कुलधर्म-कुळाचारानुसार प्रत्येक घरात गौरीचा पाहुणचार केला जातो. यामुळे घरात सुख, समृद्धी आणि आनंद टिकून राहतो.