'शरद पवार म्हणजे कट कारस्थानांचा कारखाना, देशद्रोहाचा गुन्हा...'; भाजपच्या 'या' नेत्याची जहरी टीका

BJP MLA Gopichand Padalkar attacks Sharad Pawar : महाराष्ट्राच्या राजकारणात सत्तासंघर्ष आणि आरोप-प्रत्यारोपांचे राजकारण सुरू असतानाच, भाजप आमदार गोपीचंद पडळकर यांनी राष्ट्रवादी काँग्रेस (शरदचंद्र पवार गट) पक्षाचे अध्यक्ष शरद पवार यांच्यावर अत्यंत कठोर शब्दांत टीका केली आहे. शरद पवार हे 'कट कारस्थानांचा कारखाना' असून त्यांच्यावर देशद्रोहाचा गुन्हा दाखल करावा, अशी मागणी पडळकर यांनी केली आहे.

पडळकर यांचा पवारांवर थेट हल्ला

बुधवारी पत्रकारांशी बोलताना गोपीचंद पडळकर यांनी शरद पवारांच्या राजकीय भूमिकेवर अनेक प्रश्न उपस्थित केले. ते म्हणाले, "शरद पवार हे कट कारस्थानांचा कारखाना आहेत. कारस्थान कसे रचायचे हे त्यांच्याकडून शिकावे."

मारकडवाडी प्रकरणात पवारांनी निवडणूक आयोगासारख्या संवैधानिक संस्थेवर शंका निर्माण करून देशाची दिशाभूल केली, असा आरोप पडळकर यांनी केला.

निवडणूक आयोग ही देशाची महत्त्वाची संस्था आहे. अशा संस्थेवर षडयंत्र करून लोकांमध्ये संशय निर्माण करणे हा 'देशद्रोह' आहे, त्यामुळे पवारांवर गुन्हा दाखल झाला पाहिजे, असे पडळकर म्हणाले.

'५० वर्षांपूर्वीची गोष्ट आठवते, पण ८ महिन्यांपूर्वीची नाही'

पडळकर यांनी शरद पवारांना 'आधुनिक काळातील नारदमुनी' असे संबोधले. ते म्हणाले, "एकिकडे ते मंडल यात्रा काढतात आणि दुसरीकडे त्यांचा नातू मराठा आरक्षणासाठी आंदोलन करतो. ही दुहेरी भूमिका आहे."

पडळकर यांनी एका जुन्या घटनेचा उल्लेख केला, जिथे पवारांनी एका जाहीर कार्यक्रमात सांगितले होते की, 'दोन व्यक्तींनी त्यांना भेटून आगामी विधानसभा निवडणुकीत १६० आमदार निवडून आणण्याची ऑफर दिली होती.

' यावर पडळकर यांनी प्रश्नचिन्ह उपस्थित केले, की "जर ही ऑफर खरी असेल तर त्यांनी तात्काळ गृहमंत्र्यांना याची माहिती देणे आवश्यक होते. पण त्यांनी पोलिसांकडे जाण्याऐवजी राहुल गांधींना ही गोष्ट सांगितली आणि निवडणूक झाल्यानंतर ८ महिन्यांनी ती सार्वजनिक केली. हे एक प्रकारचे कारस्थानच आहे."

पडळकर यांनी पवारांच्या स्मरणशक्तीवरही टीका केली. ते म्हणाले, "शरद पवारांना ५० वर्षांपूर्वीच्या गोष्टी आठवतात, पण ८ महिन्यांपूर्वी भेटलेले ते दोन लोक कोण होते, हे त्यांना आठवत नाही. हे कसे शक्य आहे?"

राजकीय तणावाचे इतर मुद्दे

या पत्रकार परिषदेत गोपीचंद पडळकर यांनी मुंबईतील दादर येथे मीनाताई ठाकरे यांच्या पुतळ्यावर लाल रंग फेकल्याच्या घटनेचा निषेध केला. "माँ साहेब मीनाताई ठाकरे आमच्या श्रद्धास्थानी आहेत. त्यांच्या पुतळ्यावर असा रंग फेकणे योग्य नाही. या प्रकरणी पोलीस योग्य ती कारवाई करतील," असे ते म्हणाले. या घटनेमुळे मुंबईत मोठा राजकीय तणाव निर्माण झाला आहे.