"2014 नंतर महाराष्ट्रात मुस्लिमांना शत्रू मानले जातेय"; अबू आझमी यांचा गंभीर आरोप, व्यक्त केली चिंता

Abu Asim Azmi on Muslims : महाराष्ट्राच्या राजकारणात आपल्या रोखठोक विधानांसाठी ओळखले जाणारे समाजवादी पक्षाचे प्रदेशाध्यक्ष आणि आमदार अबू असीम आझमी यांनी राज्यातील मुस्लिमांच्या सद्यस्थितीवर मोठे विधान केले आहे. 2014 पासून देशात आणि राज्यात मुस्लिमांविरुद्ध द्वेषाचे वातावरण पद्धतशीरपणे निर्माण केले जात असल्याचा खळबळजनक आरोप त्यांनी केला आहे.

"मुस्लिम हे देशाचे शत्रू नाहीत"

अबू आझमी यांनी आपल्या भाषणात ऐतिहासिक संदर्भांचा वापर करत मुस्लिमांच्या राष्ट्रप्रेमाचा पुनरुच्चार केला. ते म्हणाले की, स्वातंत्र्याच्या लढाईत मुस्लिमांनी दिलेले बलिदान कोणालाही नाकारता येणार नाही. "सारे जहाँ से अच्छा हिंदोस्ताँ हमारा" हा नारा एका मुस्लिमानेच दिला, याची आठवण त्यांनी करून दिली.

द्वेषाचे राजकारण: सत्तेत राहण्यासाठी मुस्लिमांना देशद्रोही, हिंदूविरोधी आणि देशाचे शत्रू म्हणून रंगवले जात आहे, ज्यामुळे समाजातील सहिष्णुता संपत चालली आहे.

ओळख आणि सुरक्षा : दाढी आणि टोपी घालून रस्त्यावरून चालणे आता कठीण झाले आहे. केवळ पेहरावावरून लोकांचा छळ केला जात असल्याचा आरोप त्यांनी केला.

कायदा आणि सुव्यवस्थेवर प्रश्नचिन्ह

मुंबईतील आपल्या मतदारसंघातील एका घटनेचा उल्लेख करत आझमी यांनी राज्यातील ढासळत्या कायदा आणि सुव्यवस्थेवर ताशेरे ओढले.

गुंडगिरी आणि अत्याचार : महिलांवरील अत्याचार आणि ड्रग्सचा वाढता विळखा यांकडे दुर्लक्ष करून केवळ 'वंदे मातरम' सारख्या मुद्द्यांवरून राजकारण केले जात आहे.

प्रशासनावर अविश्वास : "म्हशीसमोर बासरी वाजवणे" अशी सरकारची स्थिती झाली असून, आता केवळ न्यायालयाकडूनच न्यायाची अपेक्षा असल्याचे त्यांनी स्पष्ट केले.

पोलिसांची भूमिका : मागील काही घटनांचा उल्लेख करत त्यांनी मंत्र्यांच्या द्वेषयुक्त भाषणांमुळे समाजात भीतीचे वातावरण पसरत असल्याचे सांगितले.

वंदे मातरम आणि देशद्रोहाची व्याख्या

मुंबईच्या महापौरांच्या विधानाचा समाचार घेताना आझमी म्हणाले की, केवळ वंदे मातरम म्हणणे म्हणजे राष्ट्रभक्ती नव्हे. "एका खोलीत बसून वंदे मातरम म्हणणे सोपे आहे, पण सीमेवर जाऊन देशासाठी रक्त सांडणे कठीण आहे. मुस्लिमांनी जेव्हा जेव्हा गरज पडली, तेव्हा देशासाठी प्राण दिले आहेत," असे ते म्हणाले.

बांगलादेशी घुसखोरी आणि सरकारची जबाबदारी

बांगलादेशी घुसखोरीच्या मुद्द्यावरून त्यांनी सरकारलाच धारेवर धरले. "जर बांगलादेशी येत असतील, तर त्यांना सीमा सुरक्षा दले का थांबवत नाहीत? जर त्यांना आधार कार्ड आणि पासपोर्ट मिळत असतील, तर ते तुमच्याच राजवटीत मिळत आहेत. मग यात विरोधकांना दोष देण्यात काय अर्थ?" असा सवाल त्यांनी उपस्थित केला.

राजपाल यादव आणि आर्थिक फसवणूक

राजकीय विषयांव्यतिरिक्त अभिनेता राजपाल यादव यांच्या प्रकरणावरही त्यांनी भाष्य केले. "लोकांचे पैसे घेऊन ते परत न करणे आणि चेक बाउंस होणे हे चुकीचे आहे. जर तुम्ही विलासी जीवन जगत असाल, तर लोकांची देणी देणे ही तुमची जबाबदारी आहे. अन्यथा साधे जीवन जगावे," असा सल्ला त्यांनी यादव यांना दिला.