26/11 Mumbai Attack : मुंबईवरील 26/11 हल्ल्याला 16 वर्ष पुर्ण; त्या रात्री नेमकं काय घडलं होतं? वाचा

26/11 Mumbai Attack 16 Years Since Full Timeline : भारताच्या इतिहासातील सर्वात भीषण आणि दुःखद घटनांपैकी एक म्हणजे मुंबईवरील २६/११ चा दहशतवादी हल्ला. २६ नोव्हेंबर २००८ रोजी सागरी मार्गाने आलेल्या १० सशस्त्र दहशतवाद्यांनी भारताच्या आर्थिक राजधानीला लक्ष्य केले. या हल्ल्याला आज, २६ नोव्हेंबर २०२४ रोजी, १६ वर्षे पूर्ण झाली आहेत.

या हल्ल्यात छत्रपती शिवाजी महाराज टर्मिनस (CSMT), ताज हॉटेल, ओबेरॉय ट्रायडंट आणि नरिमन हाऊससह अनेक महत्त्वाच्या ठिकाणांवर रक्तरंजित गोळीबार आणि ग्रेनेड हल्ले करण्यात आले. या भयंकर हल्ल्यात १६६ निष्पाप नागरिक आणि १८ शूर सुरक्षा कर्मचाऱ्यांनी वीरमरण पत्करले. ३०० हून अधिक लोक जखमी झाले. या हल्ल्यानंतर भारताने दहशतवादविरोधी धोरणे अधिक कडक केली, पण त्या रात्री शहीद झालेल्या नायकांचे शौर्य आणि सामान्य नागरिकांचे धैर्य आजही प्रत्येक भारतीयाला प्रेरणा देते.

दहशतवादी आणि कारवाई एकूण दहशतवादी: १० (लष्कर-ए-तोयबा संघटनेचे सदस्य)

• ठार दहशतवादी: ९
• जिवंत पकडलेला दहशतवादी: मोहम्मद अजमल अमीर कसाब
• कसाबला फाशी: २१ नोव्हेंबर २०१२ रोजी त्याला फाशी देण्यात आली.

२६/११ चा हल्ला: वेळेनुसार संपूर्ण घटनाक्रम (26/11 Mumbai Attack Timeline)

बुधवार, २६ नोव्हेंबर २००८

रात्री 8:10: दहशतवाद्यांचे आगमन: कराचीहून १० दहशतवादी बोटीने मुंबईत पोहोचले. त्यांनी भारतीय नौकेचे (कुबेर) अपहरण करून चालकाची हत्या केली.

रात्री 9:21: पहिला हल्ला (CSMT): अजमल कसाब आणि इस्माईल खान यांनी छत्रपती शिवाजी महाराज टर्मिनसवर (CSMT) अंदाधुंद गोळीबार केला. यात ५८ लोक ठार झाले.

रात्री 10:40: वीरमरण (कामा हॉस्पिटलजवळ): दहशतवाद्यांशी लढताना एटीएस प्रमुख हेमंत करकरे, अतिरिक्त पोलिस आयुक्त अशोक कामटे आणि एन्काउंटर स्पेशालिस्ट विजय साळसकर यांना वीरमरण आले.

रात्री 10:50: ताज हॉटेलवर हल्ला: लष्कर-ए-तोयबाचे ४ दहशतवादी ताजमहाल हॉटेलमध्ये घुसले (यात शाहिद उर्फ ​​साहिदुल्ला आणि अजमल कसाब चा साथीदार इस्माईल खान नंतर ठार झाला). त्यांनी गोळीबार करत ग्रेनेड फेकले, ज्यात ३१ जणांचा मृत्यू झाला.

रात्री 11:20: नरिमन हाऊस (ज्यू सेंटर): दोन दहशतवादी नरिमन हाऊसमध्ये (ज्यू सेंटर) घुसले आणि त्यांनी रब्बी गॅव्ह्रिल होल्ट्झबर्ग यांच्या कुटुंबासह ज्यू लोकांना ओलीस ठेवले.

रात्री 11:30: ओबेरॉय ट्रायडंट हॉटेलवर हल्ला: दहशतवाद्यांनी ओबेरॉय ट्रायडंट हॉटेलला लक्ष्य केले, ज्यात १४३ पाहुणे आणि कर्मचारी अडकले.

गुरुवार, २७ नोव्हेंबर २००८

पहाटे 3:00: NSG कमांडोंचे आगमन: राष्ट्रीय सुरक्षा रक्षक (NSG) कमांडो मुंबईत पोहोचले आणि त्यांनी ऑपरेशनला सुरुवात केली. दिवसभर अनेक ठिकाणी चकमकी सुरू राहिल्या.

शुक्रवार, २८ नोव्हेंबर २००८

ऑपरेशन नरिमन हाऊस: NSG कमांडोंनी नरिमन हाऊसमध्ये दहशतवाद्यांचा खात्मा केला आणि ओलिसांची सुटका केली.

शनिवार, २९ नोव्हेंबर २००८

सकाळी 8:00: ऑपरेशन समाप्त: ताजमहाल हॉटेल पूर्णपणे सुरक्षित घोषित करण्यात आले आणि शेवटचा दहशतवादी ठार मारला गेला. अशा प्रकारे ६० तासांनंतर ऑपरेशन समाप्त झाले.