अमेरिकेला दे धक्का! डोनाल्ड ट्रम्प यांच्या टॅरिफ धमक्यांना न जुमानता भारत अन् रशियामध्ये मोठी डील

India Russia energy cooperation : अमेरिका राष्ट्राध्यक्ष डोनाल्ड ट्रम्प यांच्या टॅरिफ धमक्यांमुळे आंतरराष्ट्रीय राजकारणात मोठी उलथापालथ सुरू असताना, भारत आणि रशिया यांनी आपल्या संबंधांना आणखी मजबूत करणारा एक महत्त्वपूर्ण करार केला आहे. या करारामुळे, तेल आणि ऊर्जा संसाधनांच्या पुरवठ्याबाबत दोन्ही देशांमधील सहकार्य अधिक वृद्धिंगत होणार आहे.

ऊर्जा क्षेत्रातील वाढते सहकार्य

रशियाचे पहिले उपपंतप्रधान डेनिस मंटुरोव्ह यांनी नुकतेच सांगितले की, रशियाकडून भारताला तेल आणि ऊर्जा संसाधनांचा पुरवठा सुरू राहणार आहे. मॉस्कोला तर LNG (लिक्विफाइड नॅचरल गॅस) निर्यात करण्याचीही मोठी संधी दिसत आहे.

भारत-रशिया व्यापार, आर्थिक, वैज्ञानिक-तांत्रिक आणि सांस्कृतिक सहकार्यावरच्या आंतर-सरकारी आयोगाच्या (IRIGC-TEC) २६ व्या सत्रात मंटुरोव्ह यांनी हे वक्तव्य केले.

ते म्हणाले की, "आम्ही कच्चे तेल, तेल उत्पादन आणि कोळसा यांसारख्या इंधनाची निर्यात करत आहोत, आणि आता LNG निर्यातीची शक्यताही आम्ही पाहत आहोत." अमेरिकेने रशियाकडून तेल खरेदी करणाऱ्या देशांवर २५ टक्के टॅरिफ लावण्याची धमकी दिल्यानंतरही हा करार होणे विशेष महत्त्वाचे आहे.

(Image Source : @RusEmbIndia)

परराष्ट्र मंत्र्यांचा रशिया दौरा

भारताचे परराष्ट्र मंत्री एस. जयशंकर यांनी नुकताच रशियाचा तीन दिवसांचा दौरा केला. या दौऱ्यात त्यांनी मंटुरोव्ह यांच्यासोबत आंतर-सरकारी आयोगाचे सह-अध्यक्षपद भूषवले. या बैठकीत केवळ ऊर्जाच नाही, तर इतर अनेक क्षेत्रांमध्येही सहकार्यावर चर्चा झाली. शांततापूर्ण अणुऊर्जा क्षेत्रात सहकार्य वाढवण्याची आशाही मंटुरोव्ह यांनी व्यक्त केली. त्यांनी कुडनकुलम अणुऊर्जा प्रकल्प प्रकल्पाच्या यशस्वी अनुभवाचा उल्लेख केला, ज्यामुळे भविष्यातील सहकार्याचा मार्ग अधिक सोपा होईल.

🇮🇳🤝🇷🇺 #Jaishankar and Russia's Deputy PM #Manturov seen at #Russia-#India intergovernmental commission meeting#dosty #russiaIndia pic.twitter.com/Ka6Su6oDSx

— Russia in India 🇷🇺 (@RusEmbIndia) August 20, 2025

राष्ट्रीय चलनांमध्ये व्यापार

भारत-रशिया संबंधातील आणखी एक महत्त्वाचा पैलू म्हणजे दोन्ही देशांनी 90 टक्क्यांहून अधिक व्यापार आपल्या राष्ट्रीय चलनांमध्ये करायला सुरुवात केली आहे. यामुळे आंतरराष्ट्रीय व्यापारात डॉलरच्या वर्चस्वावर अवलंबून राहण्याची गरज कमी झाली आहे.

मंटुरोव्ह म्हणाले, "सध्याच्या परिस्थितीत, परस्पर समज आणि अखंडता टिकवणे हे एक महत्त्वाचे काम आहे." या निर्णयामुळे दोन्ही देशांमधील व्यापार अधिक सुरक्षित आणि स्थिर झाला आहे.

एस जयशंकर यांनीही दिली माहिती?

जयशंकर यांनीही बैठकीनंतर सोशल मीडियावर पोस्ट करून माहिती दिली. त्यांनी लिहिले की, "व्यापार, अर्थव्यवस्था, शेती, ऊर्जा, उद्योग, कौशल्य विकास, शिक्षण आणि संस्कृती यांसारख्या विविध क्षेत्रांमध्ये आम्ही सविस्तर चर्चा केली." ते म्हणाले की, वार्षिक शिखर परिषदेची तयारी सुरू असताना, या बैठकीचे निकाल भारत-रशिया भागीदारीला आणखी मजबूत करतील.

जयशंकर आणि मंटुरोव्ह यांनी IRIGC-TEC सत्रांच्या प्रोटोकॉलवर स्वाक्षरी केली. लवकरच दोन्ही देशांची सरकारे या करारातील तपशील जाहीर करतील. या घडामोडींवरून स्पष्ट होते की, जागतिक राजकारणात निर्माण झालेल्या दबावाला न जुमानता भारत आणि रशिया आपले संबंध अधिक घट्ट करत आहेत.