Chhattisgar Encounter: नक्षलवाद्यांविरोधात मोठी कारवाई:छत्तीसगडमध्ये 12 नक्षलवादी ठार, 3 जवान शहीद!

Chhattisgarh Encounter : छत्तीसगडमध्ये नक्षलवाद्यांविरुद्धच्या लढ्यात सुरक्षा दलांना मोठे यश मिळाले आहे. दंतेवाडा आणि बीजापूर सीमेवर झालेल्या एका मोठ्या चकमकीत जवानांनी १२ नक्षलवाद्यांना ठार केले आहे.

सर्व ठार झालेल्या नक्षलवाद्यांचे मृतदेह ताब्यात घेण्यात आले असून, त्यांची संख्या वाढण्याची शक्यता आहे. मात्र, या चकमकीत DRG (जिल्हा राखीव गट) चे ३ शूर जवान शहीद झाले असून, २ जवान जखमी झाले आहेत. बस्तर रेंजचे आयजी सुंदरराज पी. यांनी या घटनेला दुजोरा दिला आहे.

शहीदांमध्ये या जवानांचा समावेश!

या चकमकीत बीजापूर DRG चे खालील जवान शहीद झाले. हेड कॉन्स्टेबल मोनू वडारी, हेड कॉन्स्टेबल रमेश सोडी, कॉन्स्टेबल दुकारू गोंडे यांचा समावेश आहे. आयजी सुंदरराज पी. यांनी सांगितले की, गंगालूर पोलिस ठाण्याच्या हद्दीतील जंगलात जवानांचे पथक सातत्याने शोधमोहीम राबवत असताना ही चकमक झाली.

ऑपरेशन आणि चकमक

एस पी जितेंद्र यादव यांनी दिलेल्या माहितीनुसार, DRG, STF (विशेष कृती दल), COBRA आणि CRPF (केंद्रीय राखीव पोलीस दल) च्या संयुक्त पथकाने बुधवारी सकाळी ९ वाजल्यापासून बीजापूर-दंतेवाडा सीमेवरील वेस्ट बस्तर डिव्हिजन परिसरात शोधमोहीम सुरू केली होती. जंगलात शोधमोहीम सुरू असताना नक्षलवाद्यांनी अचानक गोळीबार सुरू केला. जवानांनी दिलेल्या प्रत्युत्तरादाखल कारवाईत १२ नक्षलवादी ठार झाले.

शस्त्रसाठा जप्त

जवानांनी घटनास्थळावरून एसएलआर रायफल (SLR Rifle), ३०३ रायफल आणि मोठ्या प्रमाणात दारूगोळा देखील जप्त केला आहे. ठार झालेल्या नक्षलवाद्यांची ओळख पटवण्याचे काम सुरू आहे. घटनास्थळी शोधमोहीम अजूनही सुरू असून, संपूर्ण परिसर सील करण्यात आला आहे.

राजकीय प्रतिक्रिया!

मुख्यमंत्री विष्णुदेव साय: "आपल्या जवानांचे बलिदान व्यर्थ जाणार नाही. शूर जवानांना मी विनम्र श्रद्धांजली अर्पण करतो."

गृहमंत्री विजय शर्मा: "आज आपल्या शूर जवानांच्या शौर्याने इतिहास लिहिला जात आहे. नक्षलवाद अखेरच्या घटका मोजत आहे." त्यांनी शहीद सैनिकांना श्रद्धांजलीही वाहिली.

नक्षलवाद संपवण्याच्या रणनीतीचे परिणाम!

या मोठ्या कारवाईला नक्षलवाद संपवण्यासाठी आखलेल्या रणनीतीचा परिणाम मानला जात आहे. अवघ्या ४ दिवसांपूर्वी, छत्तीसगडमध्ये पंतप्रधान नरेंद्र मोदी, केंद्रीय गृहमंत्री अमित शाह आणि एनएसए अजित डोवाल यांच्यासह अनेक मान्यवर डीजीपी परिषदेत सहभागी झाले होते. या बैठकीत नक्षलवाद संपवण्यासाठीच्या रणनीतीवर सखोल चर्चा करण्यात आली होती.

केंद्रीय गृहमंत्री अमित शाह यांनी नक्षलवाद संपवण्यासाठी ३१ मार्च २०२६ ही अंतिम मुदत यापूर्वीच निश्चित केली आहे. यापूर्वी १८ नोव्हेंबर रोजी देशातील सर्वात धोकादायक नक्षल कमांडरांपैकी एक असलेला माडवी हिडमा छत्तीसगड-आंध्र प्रदेश सीमेवर झालेल्या एन्काउंटरमध्ये मारला गेला होता.