चित्रपटसृष्टीवर शोककळा; माधुरीसह नाना पाटेकरांना स्टार बनवणारे दिग्दर्शक पार्थो घोष यांचे निधन..!

filmmaker partho ghosh passed away : चित्रपट विश्वातून अतिशय दु:खद बातमी समोर आली आहे. चित्रपट निर्माते पार्थो घोष यांचे निधन झाले आहे. ते 75 वर्षांचे होते. हृदयविकाराच्या झटक्याने त्यांचे निधन झाले.

पार्थो घोष यांनी त्यांच्या कारकिर्दीत अनेक संस्मरणीय चित्रपटांची निर्मिती केली. यामध्ये जॅकी श्रॉफ आणि माधुरी दीक्षित अभिनित '१०० डेज' आणि नाना पाटेकर अभिनित 'अग्नि साक्षी' सारखे चित्रपट समाविष्ट आहेत. पार्थो घोष हे त्यांच्या पत्नी गौरी घोषसोबत मुंबईतील मड आयलंड परिसरात राहत होते.

पार्थो घोष यांच्या निधनाच्या बातमीने चित्रपटसृष्टीत शोककळा पसरली आहे. अनेक कलाकारांनी सोशल मीडियावर त्यांना श्रद्धांजली वाहिली आहे. त्याच वेळी, अभिनेत्री ऋतुपर्णा सेनगुप्ता यांनीही पार्थो घोष यांच्या निधनावर शोक व्यक्त केला. म्हणाल्या, "आम्ही एक प्रतिभावान कलाकार, दूरदर्शी दिग्दर्शक आणि एक चांगला माणूस गमावला आहे. पार्थो दा, तुम्ही चित्रपटांमधून पसरवलेली जादू आम्हाला नेहमीच आठवेल. देव तुमच्या आत्म्याला शांती देवो."

हिंदीपूर्वी त्यांनी बंगाली चित्रपटांची केली निर्मिती

हिंदी चित्रपटसृष्टीत येण्यापूर्वी पार्थो घोष यांनी बंगाली चित्रपटसृष्टीतही काम केले होते. 1985 मध्ये त्यांनी हिंदी चित्रपटांमध्ये सहाय्यक दिग्दर्शक म्हणून कारकिर्दीला सुरुवात केली. पण 1991 मध्ये आलेल्या '100 डेज' या चित्रपटातून पार्थो घोष यांना विशेष ओळख मिळाली.

या चित्रपटात जॅकी श्रॉफ, माधुरी दीक्षित, मुनमुन सेन आणि जावेद जाफरी सारखे कलाकार होते. चित्रपटाची कथा एका महिलेभोवती फिरते जिला भविष्यातील घटनांची पूर्वसूचना असते.

हा चित्रपट 1984 च्या तमिळ चित्रपट 'नूरवथु नाल' चा रिमेक होता. जो 1977 च्या इटालियन चित्रपट 'सेट्टे नॉटे इन नीरो' पासून प्रेरित होता.

1992 मध्ये पार्थो घोष यांनी अविनाश वाधवान आणि दिव्या भारती यांच्यासोबत 'गीत' हा चित्रपट बनवला. 1993 मध्ये त्यांचा 'दलाल' हा चित्रपटही बॉक्स ऑफिसवर यशस्वी झाला. मिथुन चक्रवर्ती, आयशा झुल्का, राज बब्बर, टिनू आनंद आणि शक्ती कपूर सारख्या कलाकारांनी यात काम केलेले आहे.

समाजावर भाष्य करणाऱ्या चित्रपटांची निर्मिती

पार्थो घोष अनेकदा त्यांच्या चित्रपटांमध्ये समाजाशी संबंधित मुद्द्यांवर बोलण्याचा प्रयत्न करत असत. त्यांनी बनवलेल्या चित्रपटांच्या यादीत 'दलाल' (1993) सारखा चित्रपट देखील समाविष्ट आहे, ज्यामध्ये मिथुन चक्रवर्ती मुख्य भूमिकेत होते. पार्थो घोष यांनी त्यांच्या चित्रपट कारकिर्दीत कमी चित्रपट केले असले तरी, 90 च्या दशकात त्यांनी बनवलेले चित्रपट अजूनही लोकांच्या स्मरणात राहणारे आहेत.

नाना पाटेकर यांच्यासोबत अनेक चित्रपट केले

'१०० डेज' नंतर, पार्थो घोष यांनी आणखी बरेच चांगले चित्रपट केले. त्यांचा 'अग्नि साक्षी' (1996) हा चित्रपट मनीषा कोइराला आणि नाना पाटेकर यांच्या उत्कृष्ट अभिनयासाठी ओळखला जातो, या चित्रपटात मनीषाने घरगुती हिंसाचाराला बळी पडलेल्या महिलेची आव्हानात्मक भूमिका साकारली होती.

हा चित्रपट बॉक्स ऑफिसवरही यशस्वी झाला आणि मनीषा कोइरालाला तिच्या अभिनयाबद्दल खूप कौतुक मिळाले. 'गुलाम-ए-मुस्तफा' (1997) मध्ये त्यांनी पुन्हा एकदा नाना पाटेकर यांना वेगळ्या शैलीत सादर केले, जे प्रेक्षकांना खूप भावले.