वैयक्तिक दुःख बाजूला सारून रिंकू सिंग 'कर्तव्य'पथावर; वडिलांच्या निधनानंतर 24 तासांतच मैदानात उतरला!

Rinku Singh emotional return : भारतीय क्रिकेटमध्ये अनेक खेळाडूंनी आपल्या संघर्षाने चाहत्यांची मने जिंकली आहेत, पण रिंकू सिंगने जे करून दाखवले आहे ते केवळ खेळाप्रती असलेले प्रेम नाही, तर देशाप्रती असलेली सर्वोच्च निष्ठा आहे. वडिलांच्या निधनाचे अतीव दुःख उराशी बाळगून, डोळ्यांत अश्रू असतानाही रिंकू सिंग देशासाठी मैदानात परतला आहे.

वडिलांना अखेरचा निरोप आणि देशासाठी धावून येणे

रिंकू सिंगचे वडील खानचंद सिंग गेल्या अनेक काळापासून 'स्टेज ४' कर्करोगाशी झुंज देत होते. शुक्रवारी (२७ फेब्रुवारी) सकाळी ग्रेटर नोएडा येथील रुग्णालयात त्यांनी अखेरचा श्वास घेतला. आपल्या वडिलांच्या पार्थिवाला खांदा देताना आणि अलीगडमध्ये त्यांच्यावर अंत्यसंस्कार करताना रिंकू पूर्णपणे खचलेला होता. मात्र, ज्या वडिलांनी त्याला इथपर्यंत पोहोचताना पाहिले, त्यांच्याच स्वप्नासाठी रिंकूने अवघ्या २४ तासांत पुन्हा बॅट हातात धरली आहे.

शनिवारी सकाळी तो थेट कोलकाता येथे भारतीय संघात सामील झाला. बीसीसीआयचे सचिव देवजित सैकिया यांनी या वृत्ताला दुजोरा दिला असून, रविवारी वेस्ट इंडिजविरुद्ध होणाऱ्या महत्त्वाच्या सामन्यासाठी रिंकू निवडीसाठी उपलब्ध असेल.

ईडन गार्डन्स: जिथे 'सुपरस्टार' जन्मला, तिथेच आता अग्निपरीक्षा

उद्याचा सामना कोलकात्याच्या ऐतिहासिक ईडन गार्डन्स मैदानावर होणार आहे. हे तेच मैदान आहे जिथे आयपीएलमध्ये 'केकेआर'कडून खेळताना रिंकूने पाच चेंडूत पाच षटकार मारून इतिहास रचला होता. आज तोच रिंकू आपल्या आयुष्यातील सर्वात कठीण काळात याच मैदानावर उभा आहे. चाहत्यांना खात्री आहे की, रिंकू उद्याच्या सामन्यात एक संस्मरणीय खेळी करून आपल्या दिवंगत वडिलांना खरी श्रद्धांजली अर्पण करेल.

भारतासाठी 'करो या मरो'ची स्थिती

२०२६ च्या टी२० विश्वचषकातील भारताचा प्रवास आता एका निर्णायक वळणावर आहे. वेस्ट इंडिजविरुद्धची ही 'व्हर्च्युअल क्वार्टर फायनल' असून, उपांत्य फेरीत पोहोचण्यासाठी भारताला हा सामना जिंकणे अनिवार्य आहे. अशा परिस्थितीत रिंकूच्या येण्याने भारतीय मधली फळी अधिक मजबूत झाली आहे.

कर्णधार सूर्याचा विश्वास: रिंकूने या स्पर्धेत अद्याप मोठी खेळी केली नसली तरी, कर्णधार सूर्यकुमार यादव आणि प्रशिक्षकांना त्याच्या फिनिशिंग क्षमतेवर पूर्ण विश्वास आहे. रिंकूचे हे पाऊल सिद्ध करते की त्याच्यासाठी 'तिरंगा' आणि देश सर्वात आधी येतो.

"मैदानावर धावताना कदाचित रिंकूचे पाय जड असतील आणि मन वडिलांच्या आठवणीत असेल, पण जेव्हा तो फलंदाजीला येईल, तेव्हा त्याच्या बॅटमधून निघणारा प्रत्येक फटका त्याच्या जिद्दीची साक्ष देईल.

रिंकू सिंगचे हे समर्पण पाहून संपूर्ण देश त्याला सलाम करत आहे. उद्या तो प्लेइंग इलेव्हनमध्ये असेल की नाही, हे टॉसच्या वेळी समजेलच, पण त्याने मैदान गाठून आधीच कोट्यवधी भारतीयांची मने जिंकली आहेत.