Ind vs Nz Final: टीम इंडियाचा 'विराट' अवतार! संजू-अभिषेक-ईशानच्या वादळापुढे न्यूझीलंड पालापाचोळा

IND vs NZ T20 World Cup 2026 final score : T-20 विश्वचषक 2026 च्या अंतिम सामन्यात भारतीय फलंदाजांनी क्रिकेट इतिहासातील सर्वात भीषण फटकेबाजीचे प्रदर्शन केले आहे. अहमदाबादच्या नरेंद्र मोदी स्टेडियमवर झालेल्या या महामुकाबल्यात भारताने न्यूझीलंडसमोर विजयासाठी तब्बल २५६ धावांचे डोंगरासारखे लक्ष्य ठेवले आहे. संजू सॅमसन, अभिषेक शर्मा आणि ईशान किशन यांच्या त्रिकुटाने किवी गोलंदाजीचे अक्षरशः लचके तोडले.

संजू सॅमसनचा नवा जागतिक विक्रम; सॅम्युअल्सला टाकले मागे

या डावाचा खरा हिरो ठरला तो म्हणजे संजू सॅमसन. सुरुवातीपासूनच आक्रमक पवित्र्यात असलेल्या संजूने ८९ धावांची झंझावाती खेळी केली. या खेळीसह त्याने एका मोठ्या विक्रमाला गवसणी घातली आहे.

टी-२० विश्वचषकाच्या अंतिम सामन्यात सर्वाधिक वैयक्तिक धावा करण्याचा मान आता संजूच्या नावावर आहे. त्याने वेस्ट इंडिजच्या मार्लन सॅम्युअल्सचा ८५ धावांचा (२०१६ च्या फायनलमधील) जुना विक्रम मोडीत काढला.

अभिषेक आणि ईशानची 'अर्धशतकी' धमाका

सलामीवीर अभिषेक शर्माने सुरुवातीलाच न्यूझीलंडच्या गोलंदाजांचा आत्मविश्वास खच्ची केला. त्याने अवघ्या १८ चेंडूत विश्वचषकातील सर्वात जलद अर्धशतक ठोकले.

त्याला तोलामोलाची साथ देत ईशान किशननेही मैदानावर चौफेर फटकेबाजी करत आपले अर्धशतक पूर्ण केले. या तिघांच्या धडाक्यामुळे भारताने टी-२० क्रिकेटमधील आपली सर्वोच्च धावसंख्या गाठली.

भारतीय डावातील ऐतिहासिक विक्रम

भारतीय संघाने आज केवळ धावा केल्या नाहीत, तर विक्रमांचे पुस्तकही बदलले.

जलद १०० धावा: टीम इंडियाने केवळ ७.२ षटकांत १०० धावांचा टप्पा पार केला. टी-२० विश्वचषक नॉकआउट फेरीतील ही सर्वात जलद शतकी धावसंख्या ठरली.

पॉवरप्लेचा 'पॉवर' शो : भारताने पॉवरप्लेमध्ये (पहिल्या ६ षटकांत) ९२ पेक्षा अधिक धावा करत स्वतःचाच २०२४ मधील ९२/१ हा विक्रम मोडला आणि विश्वचषकातील पॉवरप्लेमधील सर्वोच्च धावसंख्या नोंदवली.

हार्दिकची विकेट आणि जिमी नीशमचा संघर्ष

डावाच्या उत्तरार्धात धावगती कायम ठेवण्याच्या प्रयत्नात भारताने काही विकेट्स गमावल्या. १९ व्या षटकात हार्दिक पंड्या १३ चेंडूत १८ धावा करून बाद झाला. मॅट हेन्रीने टाकलेल्या स्लो ऑफ-कटरवर मोठा फटका मारण्याच्या नादात हार्दिकने मिचेल सँटनरकडे सोपा झेल दिला. न्यूझीलंडकडून जिमी नीशमने ३ बळी घेत भारतीय धावसंख्येला काहीसा लगाम लावण्याचा प्रयत्न केला, तरीही धावसंख्या २५० च्या पार गेलीच.

अंतिम धावसंख्या कार्ड

• भारत: २५५/५ (२० षटके)
• संजू सॅमसन: ८९ धावा
• अभिषेक शर्मा & ईशान किशन: अर्धशतकी खेळी
• न्यूझीलंड गोलंदाजी: जिमी नीशम (३ विकेट्स), मॅट हेन्री (१ विकेट)

न्यूझीलंडसमोर अशक्यप्राय आव्हान

अंतिम सामन्यात २५६ धावांचा पाठलाग करणे हे कोणत्याही संघासाठी हिमालय चढण्यासारखे कठीण आव्हान आहे. आता संपूर्ण मदार भारतीय गोलंदाजांवर आहे. जसप्रीत बुमराह आणि वरुण चक्रवर्तीची फिरकी न्यूझीलंडला किती धावांत रोखते, याकडे संपूर्ण जगाचे लक्ष लागले आहे. टीम इंडिया सलग दुसऱ्यांदा विश्वविजेतेपदावर नाव कोरण्याच्या अगदी जवळ पोहोचली आहे.