मुंबई-नाशिक थेट लोकलसेवा लवकरच सुरू होणार! प्रवाशांसाठी आहे 'हा' मोठा फायदा! वाचा मार्गाची वैशिष्टे

Mumbai to nashik direct local train service update : मुंबई आणि उत्तर महाराष्ट्रातील लाखो प्रवाशांसाठी एक मोठी आनंदाची बातमी समोर आली आहे. मुंबई ते नासिक दरम्यानची बहुप्रतिक्षित थेट लोकल सेवा लवकरच प्रत्यक्षात उतरणार आहे. राज्याचे मंत्री आणि भाजप नेते गिरीश महाजन यांनी या महत्त्वपूर्ण प्रकल्पाची माहिती दिली असून, यामुळे मुंबई-नाशिक प्रवासाचे समीकरण पूर्णपणे बदलणार आहे. केवळ लोकलच नाही, तर हा प्रवास सह्याद्रीच्या घाटमाथ्यातून १८ बोगद्यांमधून अतिशय वेगवान आणि सुरक्षित होणार आहे.

प्रवाशांसाठी काय आहे खास?

सध्या मुंबईहून नाशिकला जाण्यासाठी प्रवाशांना कसारापर्यंत लोकल आणि त्यानंतर एसटी बस किंवा खासगी वाहनांचा आधार घ्यावा लागतो. मात्र, नवीन प्रकल्पानुसार आता कल्याण ते थेट नाशिक रोडपर्यंत लोकल धावणार आहे. यामुळे नोकरीनिमित्त ये-जा करणारे कर्मचारी, विद्यार्थी आणि व्यापाऱ्यांचा प्रवासाचा वेळ वाचणार असून त्यांना रेल्वेच्या स्वस्त दरात आरामदायी प्रवासाची सुविधा मिळणार आहे.

प्रकल्पाची ठळक वैशिष्ट्ये

तिसरी आणि चौथी लाईन: कसारा आणि मनमाड दरम्यान रेल्वे मार्गाची तिसरी आणि चौथी लाईन विकसित केली जात आहे.

सह्याद्रीतून १८ बोगदे: हा मार्ग सह्याद्रीच्या पर्वतरांगांमधून जाणार असून, त्यासाठी १८ नवीन बोगदे तयार केले जातील, ज्यामुळे ट्रेनचा वेग वाढेल.

प्रमुख स्थानकांचा कायापालट: कल्याण, कसारा, इगतपुरी, देवलाली आणि नाशिक रोड या स्थानकांचा 'मेगा डेव्हलपमेंट' अंतर्गत विकास केला जाणार आहे.

आधुनिक सुविधा: स्थानकांवर आधुनिक विश्रामगृह, डिजिटल तिकीट प्रणाली, पार्किंग आणि उन्नत वेटिंग रूम्सची सोय असेल.

आर्थिक आणि औद्योगिक क्रांती

मुंबई आणि नाशिक ही दोन्ही मोठी औद्योगिक केंद्रे आहेत. थेट लोकल सेवेमुळे या दोन शहरांमधील व्यावसायिक देवाणघेवाण वाढणार आहे. जमिनीच्या अधिग्रहणाची (Land Acquisition) प्रक्रिया आधीच सुरू झाली असून रेल्वे प्रशासनाने या कामाला वेग दिला आहे. भविष्यात ही सेवा उत्तर महाराष्ट्रातील इतर शहरांपर्यंतही वाढवण्याचा रेल्वेचा मानस आहे.