मुंबईत पावसाचा हाहाकार, अनेक भागांत पाणी साचले; शाळांना सुट्टी, जनजीवन विस्कळीत

मुंबई: गेल्या तीन दिवसांपासून सुरू असलेल्या संततधार पावसामुळे मुंबईचे जनजीवन विस्कळीत झाले आहे. सोमवारीही पावसाचा जोर कायम असल्याने अनेक सखल भागांमध्ये पाणी साचले आहे. यामुळे मुंबईकरांना प्रचंड अडचणींचा सामना करावा लागत आहे.

मुसळधार पावसामुळे वाहतुकीची कोंडी

मुंबईतील कुलाबा, सायन, किंग्ज सर्कल, हिंदमाता, अंधेरी, परळ यांसारख्या सखल भागांमध्ये गुडघाभर पाणी साचले आहे. यामुळे वाहतुकीची मोठी कोंडी झाली असून, नागरिकांना पाण्यातून वाट काढत जावे लागत आहे. पश्चिम उपनगरातही जोरदार पाऊस सुरू असल्याने जे. पी. रोड, मिलन सबवे आणि एल.बी.एस. मार्गावर मोठ्या प्रमाणात पाणी साचले आहे, ज्यामुळे प्रवाशांना मनस्ताप सहन करावा लागत आहे.

लोकल ट्रेनवरही परिणाम

पावसाचा जोर वाढल्याने रेल्वेमार्गांवरही पाणी साचायला सुरुवात झाली आहे. कुर्ला आणि दादर रेल्वे स्थानकातील रुळांवर पाणी जमा झाल्याने मध्य आणि हार्बर रेल्वे मार्गावरील लोकल ट्रेन सुमारे १५ ते २० मिनिटे उशिराने धावत आहेत. येत्या काही तासांत पाऊस असाच सुरू राहिल्यास रेल्वे वाहतूक ठप्प होण्याची शक्यता आहे. मात्र, पश्चिम रेल्वे मार्गावरील वाहतूक सध्या सुरळीत असली तरी, पावसाचा जोर पाहता ती कधीही विस्कळीत होऊ शकते, अशी भीती व्यक्त केली जात आहे.

शाळांना सुट्टी जाहीर

सकाळपासून सुरू असलेल्या मुसळधार पावसामुळे मुंबईतील सर्व शाळांना सुट्टी जाहीर करण्यात आली आहे. मुंबईचे पालकमंत्री आशिष शेलार यांनी प्रशासनाला सकाळच्या सत्रातील विद्यार्थ्यांना सुरक्षितपणे घरी पोहोचवण्याचे निर्देश दिले आहेत.

प्रशासन सतर्क, नागरिकांना काळजी घेण्याचे आवाहन

पावसाची हीच स्थिती कायम राहण्याची शक्यता असल्याने प्रशासनाने नागरिकांना अत्यावश्यक कामाशिवाय घराबाहेर न पडण्याचे आवाहन केले आहे. पालिकेची यंत्रणा सतर्क झाली असून, सखल भागांमध्ये जमा झालेले पाणी पंपांच्या मदतीने बाहेर काढण्याचे काम सुरू आहे. पोलिसांनीही नागरिकांना काळजी घेण्याचे आणि मदतीसाठी आपत्कालीन क्रमांकावर संपर्क साधण्याचे आवाहन केले आहे.

नवी मुंबईतही पाणी साचले

मुंबईप्रमाणेच नवी मुंबईतही पावसाने जोरदार हजेरी लावली आहे. एपीएमसी मार्केट आणि वाशीतील रस्त्यांवर एक ते दीड फूट पाणी साचले आहे, ज्यामुळे जनजीवन प्रभावित झाले आहे.