राज्याच्या राजकारणात नव्या समीकरणांची चर्चा; दानवेंच्या वक्तव्याने शिंदे-ठाकरे गट एकत्र येणार?

महाराष्ट्राच्या राजकारणातील अस्थिरता आणि बदलांचे वारे जोरदार वाहत आहेत. नुकतेच, राज ठाकरे आणि उद्धव ठाकरे तब्बल १८ वर्षांनंतर एकाच व्यासपीठावर एकत्र आले, ज्यामुळे अनेकांच्या भुवया उंचावल्या. आता याच पार्श्वभूमीवर, शिवसेनेचे दोन प्रमुख गट एकनाथ शिंदे गट आणि उद्धव ठाकरे गट यांच्या संभाव्य एकजुटीची चर्चा जोर धरू लागली आहे.

सध्या दोन्ही गटांमधील संबंध ताणलेले असले, तरी विधान परिषदेचे विरोधी पक्षनेते अंबादास दानवे यांच्या एका वक्तव्याने या चर्चेला बळ दिले आहे. नुकत्याच झालेल्या त्यांच्या सत्कार समारंभात उपमुख्यमंत्री एकनाथ शिंदे आणि उद्धव ठाकरे यांनी एकमेकांकडे पाहिलेही नसतानाही, दानवेंच्या वक्तव्याने राजकीय वर्तुळात अनेक तर्कवितर्क लावले जात आहेत.

शिवसेनेची फूट दानवे यांच्या जिव्हारी

शिवसेना (उद्धव बाळासाहेब ठाकरे) गटाचे नेते अंबादास दानवे यांना पक्षातील ही फूट अत्यंत वेदनादायी वाटते. एका मजबूत पक्षाची अशी विभागणी होणे दुर्दैवी असल्याची त्यांची भावना आहे. ही फूट त्यांच्या मनाला लागली असून, दोन्ही गटांनी पुन्हा एकदा एकत्र यावे अशी त्यांची प्रामाणिक इच्छा आहे.

'पीटीआय' या वृत्तसंस्थेनुसार, दानवे यांनी पक्षातील फुटीबद्दल बोलताना म्हटले आहे की, "आम्ही काही केवळ सत्तेसाठी जन्माला आलेलो नाही. सत्ता येत-जाते, पण संघटनेची एकजूटता हीच खरी ताकद आहे. कुणाची तरी शिवसेनेला दृष्ट लागली आणि पक्ष फुटला. हा घाव, ही जखम भरायला हवी. तो घाव भरून निघायला हवा." एकजूटता हीच शिवसेनेची ओळख आणि ताकद होती, असे नमूद करत त्यांनी सर्व शिवसैनिकांना पुन्हा एकत्र येण्याचे आवाहन केले आहे.

२०२२ चा राजकीय भूकंप आणि त्याचे पडसाद

२०२२ मध्ये महाराष्ट्राच्या राजकारणात मोठा राजकीय भूकंप झाला. एकनाथ शिंदे यांच्या नेतृत्वाखाली ३९ आमदारांनी बंडखोरी करत वेगळा गट स्थापन केला. यानंतर, शिंदे यांनी भाजपसोबत राज्यात सरकार स्थापन केले आणि पुढे राष्ट्रवादी काँग्रेसचा अजित पवार यांच्या नेतृत्वाखालील गटही या सरकारमध्ये सामील झाला. पुलाखालून बरेच पाणी वाहून गेले, महाविकास आघाडीनंतर जनतेने राज्यात महायुतीचा प्रयोग पाहिला. पण शिवसेनेतील ही उभी फूट आजही अनेक निष्ठावान शिवसैनिकांच्या मनात कायम घर करून आहे, हे दानवे यांच्या वक्तव्यातून स्पष्ट होते.

'शिवसेना पुन्हा मजबूत करा' - दानवेंची आर्त हाक

अंबादास दानवे यांनी सर्व शिवसैनिकांना एकत्र येऊन पक्ष पुन्हा मजबूत करण्याचे आवाहन केले आहे. एक शिवसैनिक म्हणून शिवसेना पुन्हा शक्तिशाली होऊन पुढे यावी, अशी त्यांची इच्छा आहे. 'एकतेची आशा करणे काही वाईट नाही,' असे सांगत त्यांनी भविष्यात शिवसेना पुन्हा एकसंघ होण्याची शक्यता व्यक्त केली आहे.

या वक्तव्यामुळे राज्याच्या राजकारणात खरोखरच 'कूस' बदलणार का, की हा फक्त सदिच्छेचा भाग आहे, हे पाहणे महत्त्वाचे ठरेल.