बीडकरांचे रेल्वे प्रवासाचे स्वप्न साकार! अहिल्यानगर - बीड रेल्वेसेवा 'या' दिवशी सुरु होणार

Ahilyanagar Beed Parli Railway update : बीड जिल्ह्याच्या विकासासाठी अत्यंत महत्त्वाचा असलेला 'अहिल्यानगर-बीड-परळी वैजनाथ' या नवीन रेल्वेमार्ग प्रकल्पासाठी राज्य सरकारने आणखी १५० कोटी रुपयांचा निधी मंजूर केला आहे. बीड जिल्ह्याचे पालकमंत्री आणि राज्याचे उपमुख्यमंत्री अजित पवार यांनी मराठवाडा मुक्ती संग्राम दिनाच्या (१७ सप्टेंबर) मुहूर्तावर ही खास भेट दिली आहे. या निधीमुळे रेल्वेमार्गाच्या कामाला आणखी गती मिळणार असून, १७ सप्टेंबर रोजी 'बीड-अहिल्यानगर' या टप्प्यावर रेल्वेसेवा सुरू होणार आहे.

'अहिल्यानगर-बीड-परळी वैजनाथ' हा रेल्वेमार्ग सुमारे 261 किलोमीटर लांबीचा असून, त्याचा एकूण खर्च 4 हजार 805 कोटी रुपये इतका आहे. त्यातील 50 टक्के म्हणजे 2 हजार 402 कोटी रुपये राज्य शासनाचा वाटा आहे. आजपर्यंत शासनाने तब्बल 2 हजार 91 कोटी 23 लाख रुपये उपलब्ध करून दिले आहेत. त्यात आता आणखी 150 कोटींची भर घालण्यात आली असून या निधीचे वितरण आज 15 सप्टेंबर 2025 रोजी) करण्यात आले आहे.

मराठवाडा मुक्ती संग्राम दिनाच्या दोन दिवस आधी वितरीत करण्यात आलेल्या या निधीमुळे या प्रकल्पाच्या विकासाला गती येणार आहे. या निधीचा उपयोग 2025-26 या आर्थिक वर्षात रेल्वे विभागाला राज्य सरकारचा हिस्सा देण्यासाठी होणार आहे.

काय म्हणाले अजित पवार!

"अहिल्यानगर-बीड-परळी वैजनाथ रेल्वेमार्ग म्हणजे बीड, अहिल्यानगर आणि परळी वैजनाथ भागातील शेतकरी, विद्यार्थी, उद्योजक, व्यापारी आणि सामान्य जनतेसाठी विकासाला नवी गती देणारा प्रकल्प आहे. या मार्गामुळे जिल्ह्यातील गुंतवणूक वाढेल, रोजगारनिर्मिती होईल आणि वाहतूक सुलभ होईल. बीड जिल्ह्याचा सर्वांगीण विकास साधण्यासाठी हा प्रकल्प गतीमान करण्याचा माझा सातत्यपूर्ण प्रयत्न आहे. बीड जिल्ह्याचा चेहरा बदलणाऱ्या या प्रकल्पामुळे बीडकरांच्या आयुष्यात नवा विकासप्रवास सुरू होईल," असा विश्वासही उपमुख्यमंत्री अजित पवार यांनी व्यक्त केला आहे.

प्रकल्पाची सद्यस्थिती

एकूण लांबी: २६१ किलोमीटर

एकूण खर्च: ४,८०५ कोटी रुपये

राज्याचा वाटा: ५०% (२,४०२ कोटी रुपये)

आजपर्यंत वितरित निधी: २,०९१ कोटी रुपये (नवीन १५० कोटी रुपयांसह)

या नवीन निधीचा उपयोग २०२५-२६ या आर्थिक वर्षात रेल्वे विभागाला राज्याचा हिस्सा देण्यासाठी केला जाईल. उपमुख्यमंत्री अजित पवार यांनी जिल्ह्याचे पालकमंत्रीपद स्वीकारल्यापासून या प्रकल्पावर विशेष लक्ष दिले आहे, ज्यामुळे कामाला वेग आला आहे.

बीड जिल्ह्यासाठी का महत्वाची आहे रेल्वे?

हा रेल्वेमार्ग केवळ एक वाहतुकीचा पर्याय नाही, तर तो बीड जिल्ह्याच्या विकासाला नवी दिशा देणारा 'गेम चेंजर' प्रकल्प ठरेल.

आर्थिक विकास: शेतकरी, उद्योजक आणि व्यापाऱ्यांसाठी वाहतूक सुलभ होईल, ज्यामुळे गुंतवणुकीला चालना मिळेल.

रोजगारनिर्मिती: प्रकल्पामुळे स्थानिक पातळीवर रोजगाराच्या संधी निर्माण होतील.

कनेक्टिव्हिटी: बीड, अहिल्यानगर (अहमदनगर) आणि परळी वैजनाथ ही शहरे रेल्वेने जोडली जातील, ज्यामुळे प्रवाशांचा वेळ वाचेल.

उपमुख्यमंत्री अजित पवार यांनी विश्वास व्यक्त केला आहे की, या प्रकल्पामुळे बीडकरांच्या आयुष्यात विकासाचा एक नवा अध्याय सुरू होईल आणि जिल्ह्याचा चेहरामोहरा बदलेल.