Budget 2025: शिक्षण क्षेत्रासाठी अर्थमंत्री निर्मला सीतारमण यांच्या 7 मोठ्या घोषणा, वाचा सविस्तर

Education Budget 2025: केंद्रीय अर्थसंकल्प 2025 सादर करताना अर्थमंत्री निर्मला सीतारमण यांनी भारताची शिक्षण व्यवस्था मजबूत करण्यासाठी अनेक महत्त्वाच्या घोषणा केल्या आहेत. शिक्षणाच्या पायाभूत सुविधा सुधारण्यासाठी सरकार 500 कोटी रुपये गुंतवण्याची योजना आखत आहे.

या अर्थसंकल्पात पाच राष्ट्रीय कौशल्य केंद्रे स्थापन करणे, आयआयटी आणि वैद्यकीय महाविद्यालयांचा विस्तार करणे, तांत्रिक आणि आरोग्य क्षेत्रात सुधारणा करणे अशी प्रमुख पावले उचलण्यात आली आहेत.

शिक्षण क्षेत्रासाठी महत्त्वाच्या घोषणा

आयआयटीचा विस्तार

सरकार पाच आयआयटींचा विस्तार करण्याची योजना आखत आहे. यामध्ये 6,500 नवीन जागा निर्माण केल्या जाणार आहेत. याशिवाय, आयआयटी पटना येथे पायाभूत सुविधांमध्ये सुधारणा केली जाईल, जेणेकरून अधिकाधिक विद्यार्थ्यांना चांगल्या सुविधा मिळू शकतील.

वैद्यकीय शिक्षणाचा विस्तार

आरोग्य क्षेत्रात सुधारणा करण्यासाठी पुढील वर्षी 10,000 नवीन वैद्यकीय जागा निर्माण केल्या जाणार आहेत. आरोग्यसेवेतील कुशल डॉक्टर आणि इतर व्यावसायिकांची कमतरता दूर करण्यासाठी पाच वर्षांत वैद्यकीय जागांची संख्या 75,000 पर्यंत वाढवण्याचे सरकारचे उद्दिष्ट आहे.

शाळा आणि आरोग्य केंद्रांमध्ये ब्रॉडबँड कनेक्टिव्हिटी

देशातील सर्व सरकारी माध्यमिक शाळा आणि प्राथमिक आरोग्य केंद्रांना ब्रॉडबँड कनेक्टिव्हिटी प्रदान करण्याची योजना देखील अर्थसंकल्पात समाविष्ट आहे. यामुळे शिक्षण आणि आरोग्य सेवांमध्ये डिजिटल प्रवेश सुधारेल.

50,000 अटल टिंकरिंग लॅब्स

वैज्ञानिक आणि तांत्रिक नवोपक्रमांना प्रोत्साहन देण्यासाठी पुढील पाच वर्षांत 50,000 अटल टिंकरिंग लॅब स्थापन केल्या जातील. या प्रयोगशाळांद्वारे विद्यार्थ्यांना विज्ञान, तंत्रज्ञान आणि अभियांत्रिकी व्यावहारिकदृष्ट्या शिकण्याची संधी मिळेल.

भारतीय भाषा पुस्तक योजना

या योजनेअंतर्गत शाळा आणि विद्यापीठांमध्ये भारतीय भाषांमधील पुस्तके डिजिटल स्वरूपात उपलब्ध करून दिली जातील. शिक्षण सर्वांना उपलब्ध करून देणे आणि प्रादेशिक भाषांना प्रोत्साहन देणे हे या योजनेचे उद्दिष्ट आहे.

राष्ट्रीय कौशल्य उत्कृष्टता केंद्र

सरकार पाच राष्ट्रीय कौशल्य केंद्रे स्थापन करणार आहे. याठिकाणी विद्यार्थ्यांना विशेष व्यावसायिक प्रशिक्षण दिले जाईल. येत्या काळात बदलत्या नोकरीच्या मागण्या लक्षात घेऊन ही केंद्रे जागतिक स्तरावरील तज्ज्ञता प्रदान करतील.

पीएम रिसर्च फेलोशिप

आयआयटी आणि आयआयएससी बंगळुरूच्या विद्यार्थ्यांना 10,000 रुपये पंतप्रधान संशोधन फेलोशिप दिल्या जाणार आहे. ही फेलोशिप विज्ञान आणि तंत्रज्ञानाच्या क्षेत्रात संशोधनाला चालना देण्यासाठी आर्थिक मदत करेल.

हा अर्थसंकल्प शिक्षण अधिक सुलभ, आधुनिक आणि तांत्रिकदृष्ट्या समृद्ध करण्याच्या दिशेने सरकारचे हे एक मोठे पाऊल मानले जात आहे.