हिंदी सिनेमा सर्व चित्रपटसृष्टींचा बाप, सुनील शेट्टींच मोठं विधान

दुबईमध्ये पार पडलेल्या 'News9 Global Summit 2025' या बहुचर्चित कार्यक्रमात बॉलिवूड अभिनेते सुनील शेट्टी यांनी उपस्थिती लावली आणि भारतीय सिनेविश्वाबाबत केलेल्या परखड वक्तव्यामुळे सर्वांचे लक्ष वेधून घेतले. या समिटमध्ये त्यांनी हिंदी सिनेसृष्टीच्या भविष्या‌बाबत, सर्जनशीलतेविरोधातील धोक्यांविषयी आणि लोकप्रिय चित्रपट मालिका 'हेरा फेरी 3'विषयी आपली मते स्पष्टपणे मांडली.

हिंदी सिनेमा म्हणजे मूळ सिनेइंडस्ट्री - सुनील शेट्टी

समिटदरम्यान हिंदी चित्रपटसृष्टीच्या सध्याच्या परिस्थितीवर भाष्य करताना सुनील शेट्टी म्हणाले, "हिंदी सिनेमा हा प्रत्येक चित्रपटसृष्टीचा बाप आहे. ही एक अशी भाषा आहे जी देशभर बोलली जाते आणि समजली जाते. त्यामुळे हिंदी सिनेमा हा एक राष्ट्रीय चित्रपट माध्यम आहे, आणि तो इतर सर्व सिनेइंडस्ट्रींना जोडणारा पूल आहे."

त्यांनी स्पष्ट केलं की देशात अनेक भाषांमध्ये दर्जेदार चित्रपट बनत असले तरी हिंदी सिनेमा हा संपूर्ण भारताला जोडणाऱ्या कथानकांचा आधार बनतो. "आज आपण जागतिक चित्रपटसृष्टीशी स्पर्धा करत आहोत. त्यामुळे हे केवळ 'बॉलीवूड' न राहता भारतीय सिनेमा आहे," असंही त्यांनी सांगितलं.

एक्सेल शीट्सवरून सर्जनशीलता ठरतेय, ही चिंतेची बाब

चित्रपट सर्जनशीलतेबाबत बोलताना सुनील शेट्टी म्हणाले, "जर कोणत्याही सिनेउद्योगात लेखकांपेक्षा मार्केटिंग एक्सेल शीट्सवरून निर्णय घेतले जात असतील, तर ती खूपच चिंताजनक बाब आहे. सर्जनशील लोकांना बाजूला करून फक्त आकड्यांवर आधारित निर्णय घेतले जात असतील, तर त्यामुळे खऱ्या दर्जेदार कलाकृतींवर परिणाम होतो."

ब्रँडवर प्रेक्षकांचा अधिक विश्वास

सध्याच्या सिनेमा बाजारात ब्रँडचे वर्चस्व असल्याचे सांगत सुनील शेट्टी म्हणाले,"जर तुमचा ब्रँड मोठा असेल, तर लोकं तुमच्यावर विश्वास ठेवतात. याचा अर्थ असा की तुमच्या गुणवत्ता किंवा कंटेंटपेक्षा ब्रँड वैभवाला प्राधान्य दिलं जातं. ही प्रवृत्ती दीर्घकालीन सर्जनशीलतेसाठी हितकारक नाही."

'हेरा फेरी 3' यशस्वी होईल, पण एकट्यामुळे नाही

गेल्या काही काळात चर्चेत असलेल्या 'हेरा फेरी 3' या चित्रपटाविषयी विचारल्यावर सुनील शेट्टी म्हणाले, "हा सिनेमा लोकांना निश्चितच आवडेल. पण हे यश फक्त माझ्यामुळे मिळणार नाही. ही एक मजबूत फ्रेंचायझी आहे आणि तिचं यश हे तीन मुख्य पात्रांच्या जबरदस्त संयोजनामुळेच घडेल."

त्यांनी 'हेरा फेरी 3' सध्या कोणत्या टप्प्यावर आहे याविषयी स्पष्ट उत्तर दिलं नाही, पण त्यांनी प्रेक्षकांची अपेक्षा ठेवण्यासारखी आशा दिली.

अन्य सेलिब्रिटींचीही उपस्थिती

या समिटमध्ये विवेक ओबेरॉय, विनीत कुमार सिंह, रिद्धी डोगरा आणि साइरस बरोचा यांनी देखील सहभाग घेतला. विविध सत्रांमध्ये सिनेमा, ओटीटी, तंत्रज्ञान आणि मीडिया यांच्या भविष्यासंदर्भात विचारमंथन करण्यात आले.