Budget 2026: सर्वसामान्यांच्या खिशाला कात्री लागणार? बजेटनंतर 'हे' पदार्थ महागण्याची शक्यता

Budget 2026: केंद्रीय अर्थमंत्री निर्मला सीतारामन १ फेब्रुवारी २०२६ रोजी देशाचा अर्थसंकल्प सादर करणार आहेत. हे त्यांचे सलग नववे बजेट असून, संपूर्ण देशाचे लक्ष याकडे लागले आहे. मात्र, या बजेटपूर्वीच महागाईचे सावट गडद होताना दिसत आहे. तज्ज्ञांच्या मते, २०२६ मध्ये खाद्यपदार्थांच्या किमतीत मोठी वाढ होण्याची शक्यता असून, यामुळे गृहिणींचे बजेट कोलमडू शकते.

महागाई वाढण्याचे मुख्य कारण काय?

२०२५ मध्ये महागाईचा दर नीचांकी पातळीवर होता, मात्र २०२६ मध्ये ही परिस्थिती बदलताना दिसत आहे. रुपयाचे घसरते मूल्य, आयातीवरील अवलंबित्व आणि जागतिक बाजारपेठेतील अस्थिरता यामुळे खाद्यतेल, डाळी आणि इतर जीवनावश्यक वस्तूंच्या किमती वाढण्याची शक्यता आहे. 'क्रिसिल' आणि 'आयसीआरए' सारख्या संस्थांच्या मते, भांडवली खर्च वाढल्याने बाजारात मागणी वाढेल, परिणामी किमतीत वाढ होईल.

काय महागणार? (संभाव्य दरवाढ)

बजेट २०२६ नंतर खालील वस्तूंच्या किमतीत वाढ होण्याचा अंदाज वर्तवण्यात आला आहे.

डाळी: १० ते १५% महागण्याची शक्यता (कॅनडा आणि ऑस्ट्रेलियातून होणारी आयात महागणार).

खाद्यतेल: ८ ते १२% वाढ (इंडोनेशिया आणि मलेशियातील जागतिक किमतींचा परिणाम).

दूध आणि दुग्धजन्य पदार्थ: ५ ते ८% वाढ (चाऱ्याच्या वाढत्या किमतीमुळे).

भाज्या आणि फळे: १५ ते २०% पर्यंत वाढ (हवामान बदल आणि वाहतूक खर्चामुळे).

सिमेंट: ६ ते ७% महाग (ज्याचा परिणाम घरांच्या किमतीवर होईल).

२०२५ विरुद्ध २०२६: तुलना

२०२५ च्या बजेटमध्ये महागाई नियंत्रणावर भर होता आणि अन्नधान्य महागाईचा दर १.६१% ते २.०७% दरम्यान होता. मात्र, २०२६ मध्ये हा दर ४% पर्यंत जाण्याचा अंदाज आहे. विशेषतः खाद्यतेलाच्या किमतीत मागील वर्षापासून सुरू असलेली दरवाढ यावर्षीही कायम राहू शकते. तज्ज्ञांच्या मते, सरकार ग्रीन एनर्जी आणि इन्फ्रास्ट्रक्चरवर भर देणार असले तरी, सर्वसामान्यांसाठी अन्नधान्य महागाई हे मोठे आव्हान ठरेल.