भारत-इस्रायल मैत्रीचे नवे पर्व: PM मोदींचा तेल अवीव दौरा अन् इस्लामिक जगतात अस्वस्थता, नेमकं काय घडल

PM Narendra Modi Israel Visit 2026 : जागतिक राजकारणाच्या सारीपाटावर भारत आणि इस्रायलमधील संबंधांनी आता एक निर्णायक वळण घेतले आहे. पंतप्रधान नरेंद्र मोदी दोन दिवसांच्या ऐतिहासिक दौऱ्यासाठी बुधवारी इस्रायलमध्ये दाखल झाले.

मध्य पूर्वेत युद्धाचे ढग दाटलेले असताना आणि इराण-अमेरिका यांच्यातील तणाव शिगेला पोहोचलेला असताना, मोदींची ही भेट केवळ द्विपक्षीय नसून जागतिक रणनीतीच्या दृष्टीने अत्यंत महत्त्वाची मानली जात आहे.

पंतप्रधान मोदींचे इस्रायलमध्ये जोरदार स्वागत

इस्रायलमध्ये पोहोचल्यानंतर पंतप्रधान मोदींचे भव्य स्वागत करण्यात आले. यावेळी मोदी म्हणाले, "द्विपक्षीय चर्चेतून आणि भारत-इस्रायल मैत्री मजबूत करून अर्थपूर्ण निकालांची मला आशा आहे." विशेष म्हणजे, या दौऱ्यात पंतप्रधान मोदी इस्रायली संसद म्हणजेच 'नेसेट'ला संबोधित करणार आहेत. असा मान मिळवणारे ते पहिले भारतीय पंतप्रधान ठरतील. याशिवाय ते भारतीय समुदायाशी संवाद साधतील आणि प्रगत तंत्रज्ञान प्रदर्शनालाही भेट देणार आहेत.

Had an excellent meeting with Prime Minister Netanyahu. Expressed gratitude to him for the warm welcome earlier in the day. It is a delight to be back in Israel after 9 years. We discussed a wide range of subjects aimed at boosting bilateral ties. Sectors such as technology,… pic.twitter.com/uh1cyL411c

— Narendra Modi (@narendramodi) February 25, 2026

नेतान्याहूंचे 'षटकोनी आघाडी' विधान आणि मुस्लिम देशांची भीती

या भेटीपूर्वी इस्रायलचे पंतप्रधान बेंजामिन नेतान्याहू यांनी केलेल्या एका विधानाने संपूर्ण इस्लामिक जगतात खळबळ उडवून दिली आहे. नेतान्याहू यांनी कट्टरपंथी 'शिया आणि सुन्नी अक्षांना' जगासाठी धोका असल्याचे म्हटले.

त्यांनी भारत, ग्रीस, सायप्रस आणि काही निवडक अरब, आशियाई व आफ्रिकन देशांना एकत्र घेऊन एक 'गट' तयार करण्याचे संकेत दिले आहेत. या संभाव्य आघाडीमुळे विशेषतः पाकिस्तान आणि इराणसारख्या देशांमध्ये भीतीचे वातावरण आहे. मंगळवारी (२४ फेब्रुवारी २०२६) पाकिस्तानच्या संसदेने नेतान्याहू यांच्या विधानाविरुद्ध निषेधाचा ठरावही मंजूर केला आहे.

पाकिस्तान का घाबरला आहे?

पाकिस्तानी मीडियामध्ये या भेटीची चर्चा केवळ राजनैतिक दौरा म्हणून नाही, तर 'धोक्याची घंटा' म्हणून केली जात आहे. पाकिस्तानच्या भीतीची मुख्य कारणे खालीलप्रमाणे आहेत.

संरक्षण रणनीती: पाकिस्तानी वृत्तपत्र 'डॉन'नुसार, गेल्या वर्षी 'ऑपरेशन सिंदूर' दरम्यान इस्रायलने पाकिस्तानविरुद्ध ड्रोन तंत्रज्ञानाचा वापर करून भारताला मदत केली होती.

दहशतवादाविरुद्ध एकजूट : भारत आणि इस्रायल दोन्ही देश इस्लामिक दहशतवादाला समान शत्रू मानतात. पाकिस्तानला भीती आहे की, या भेटीमुळे भारताची लष्करी क्षमता आणि गुप्तचर यंत्रणा अधिक मजबूत होईल.

जिओ न्यूजची प्रतिक्रिया : पाकिस्तानच्या 'जिओ न्यूज'ने तर या भेटीला थेट "पाकिस्तानसाठी धोक्याची घंटा" असे संबोधले आहे.

भारताचे बदललेले परराष्ट्र धोरण: पॅलेस्टाईन आणि इस्रायलमध्ये संतुलन

'द मिडल ईस्ट मॉनिटर' आणि 'अल जझीरा' सारख्या आंतरराष्ट्रीय माध्यमांनी भारताच्या बदलत्या भूमिकेवर प्रकाश टाकला आहे.

स्वतंत्र भूमिका : २०१८ पासून भारताने इस्रायलशी असलेले संबंध पॅलेस्टाईनच्या मुद्द्यापासून वेगळे केले आहेत (De-hyphenation policy).

मानवतावादी दृष्टिकोन : भारत जरी गाझामध्ये मानवतावादी मदत आणि युद्धबंदीची मागणी करत असला, तरी संयुक्त राष्ट्रांच्या अशा ठरावांपासून भारताने स्वतःला दूर ठेवले आहे जे इस्रायलला पूर्णपणे दोषी धरतात.

आर्थिक महाशक्ती : चीननंतर आशियात भारत हा इस्रायलचा दुसरा सर्वात मोठा व्यापारी भागीदार आहे. नरेंद्र मोदींच्या नेतृत्वाखाली भारत ही इस्रायलची सर्वात मोठी 'राजनैतिक संपत्ती' बनली आहे.