वडिलांनंतर आता मुलाचा धुमाकूळ! संजय गायकवाडांच्या मुलाची कारच्या बोनटवर चढून गुंडगिरी?

आमदार संजय गायकवाड यांच्या वादग्रस्त विधानांची चर्चा अद्याप शमलेली नसतानाच, आता त्यांचे पुत्र कुणाल गायकवाड एका जुन्या प्रकरणाच्या कथित व्हिडिओमुळे पुन्हा एकदा वादाच्या भोवऱ्यात सापडले आहेत. सोशल मीडियावर सध्या वेगाने पसरत असलेल्या या व्हिडिओमध्ये कुणाल गायकवाड यांचा आक्रमक आणि आक्षेपार्ह अवतार पाहायला मिळत असून, राजकीय वर्तुळातून त्यावर तीव्र संताप व्यक्त होत आहे.

मिळालेल्या माहितीनुसार, हा व्हिडिओ बुलढाणा नगर परिषद निवडणुकीच्या निकालांनंतरचा असल्याचे सांगण्यात येत आहे. या निवडणुकीत प्रभाग क्रमांक सहामधून कुणाल गायकवाड यांनी विजय मिळवला होता. मात्र, विजयाचा जल्लोष करताना त्यांनी मर्यादा ओलांडल्याचे या कथित चित्रफितीतून दिसून येते. त्यांचे राजकीय विरोधक आणि काँग्रेस नेते दत्ता काकस यांच्या घरासमोर कुणाल गायकवाड यांनी केवळ फटाके फोडून डान्सच केला नाही, तर चक्क कारच्या बोनटवर चढून काकस यांना अत्यंत खालच्या भाषेत शिवीगाळ केल्याचा आरोप या व्हिडिओच्या आधारे केला जात आहे. विजयाची ही पद्धत लोकशाहीला आणि सामाजिक शिष्टाचाराला धरून नसल्याची टीका आता सर्व स्तरांतून होत आहे. वनइंडिया मराठी या व्हिडिओची पुष्टी करत नाही.

विशेष म्हणजे, कुणाल गायकवाड यांचा वादांशी असलेला संबंध केवळ या व्हिडिओपुरता मर्यादित नाही. निवडणुकीच्या काळात त्यांच्यावर गंभीर गुन्हे दाखल झाले होते. एका बोगस मतदाराला पोलिसांच्या ताब्यातून पळवून लावण्यास मदत केल्याचा ठपका ठेवत त्यांच्यावर आणि त्यांच्या नातेवाईकांवर विविध कलमांखाली गुन्हे नोंदवण्यात आले होते. वडिलांनी नुकतेच एका पुस्तक प्रकाशकाला दिलेल्या धमकीच्या ऑडिओ क्लिपमुळे गायकवाड कुटुंबीय आधीच चर्चेत होते, त्यातच आता मुलाच्या या कथित पराक्रमाने भर घातली आहे. हा व्हिडिओ सध्या सोशल मीडियावर वाऱ्यासारखा पसरत असला तरी, अधिकृतरीत्या याची पुष्टी अद्याप झालेली नाही. मात्र, यामुळे बुलढाण्यातील राजकीय वातावरण चांगलेच तापले आहे.