शरद पवारांनी फडणवीसांना कशामुळे फटकारलं, सुनेत्रा पवारांच्या शपथविधीवर दिली 'ही' प्रतिक्रिया!

Sharad pawar press conference : राष्ट्रवादी काँग्रेसचे (शरदचंद्र पवार) अध्यक्ष शरद पवार यांनी आज बारामतीत पत्रकारांशी संवाद साधताना राज्यातील चालू राजकीय घडामोडींवर आपली रोखठोक मते मांडली. अजित पवार यांच्या निधनानंतर राष्ट्रवादीच्या दोन्ही गटांच्या विलीनीकरणाबाबत मुख्यमंत्री देवेंद्र फडणवीस यांनी केलेल्या दाव्याचा पवारांनी खरपूस समाचार घेतला, तर सुनेत्रा पवार यांच्या उपमुख्यमंत्रीपदाच्या शपथविधीवरही महत्त्वाचे भाष्य केले.

१. देवेंद्र फडणवीसांना थेट प्रत्युत्तर: "त्यांचा संबंध काय?"

अजित पवार आणि शरद पवार यांच्यात विलीनीकरणाची कोणतीही चर्चा नव्हती, असे विधान देवेंद्र फडणवीस यांनी केले होते. यावर बोलताना शरद पवार म्हणाले, "विलीनीकरणाची चर्चा ही अजित पवार आणि जयंत पाटील यांच्यात सुरू होती. या चर्चेत देवेंद्र फडणवीस कुठेही नव्हते. ज्या चर्चेत ते सहभागीच नव्हते, त्याबद्दल त्यांना भाष्य करण्याचा अधिकार काय? त्यांना यात कोणी बोलावले होते?" अशा शब्दांत पवारांनी फडणवीसांचा समाचार घेतला.

२. सुनेत्रा पवारांचा शपथविधी: "आनंद आणि समाधान"

अजित पवारांच्या निधनानंतर त्यांच्या पत्नी सुनेत्रा पवार यांनी उपमुख्यमंत्रीपदाची शपथ घेतली. या निवडीबद्दल शरद पवार यांनी सकारात्मक भूमिका मांडली. "सुनेत्रा पवार यांना उपमुख्यमंत्री म्हणून काम करण्याची संधी मिळाली, ही आनंदाची आणि समाधानाची गोष्ट आहे. अजित पवारांचे काम पुढे नेण्यासाठी कोणीतरी जबाबदारी घेणे आवश्यक होते," असे पवार म्हणाले. तसेच, "त्या माझ्या कुटुंबातील सदस्य आहेत आणि त्यांना संधी मिळाली याचा मला आनंदच आहे," असेही त्यांनी स्पष्ट केले.

३. बजेट आणि ५८ वर्षांचा विक्रम मोडला

पवार यांनी यावेळी भावूक होत सांगितले की, मागील ५८ वर्षांच्या संसदीय कारकिर्दीत पहिल्यांदाच ते बजेटच्या दिवशी संसदेत अनुपस्थित राहिले. "कुटुंबातील दुःखद घटनेमुळे मला दिल्लीत जाता आले नाही, याचे शल्य आहे. मात्र, बजेटमध्ये सर्वसामान्यांसाठी काही कठीण कर लावण्यात आले आहेत, जे चिंतेचे आहेत," असे त्यांनी नमूद केले.

हेही वाचा : सुनेत्रा पवारांकडे अजितदादांची 3 खाती, पण 'अर्थ' खात्याला मुख्यमंत्र्यांचा ब्रेक; नेमकं कारण काय?

हेही वाचा : आधी टोकाचा नकार, मग 'त्या' एका कारणाने दिला सुनेत्रा पवारांनी DCMसाठी होकार: वाचा 'इनसाईड स्टोरी'

हेही वाचा : शरद पवारांच्या प्रतिक्रियेने भुवया उंचावल्या; म्हणाले, मला कल्पनाचं नाही ! नेमकं काय घडतयं?