शरद पवारांच्या प्रतिक्रियेने भुवया उंचावल्या; म्हणाले, मला कल्पनाचं नाही ! नेमकं काय घडतयं?

राज्याचे उपमुख्यमंत्री अजित पवार यांच्या आकस्मिक निधनाने महाराष्ट्राच्या राजकारणात मोठी पोकळी
निर्माण झाली असतानाच, आता त्यांच्या उत्तराधिकारावरून वेगवान हालचाली सुरू झाल्या आहेत. अजित पवार यांच्या पत्नी सुनेत्रा पवार आज उपमुख्यमंत्रीपदाची शपथ घेणार असल्याची चर्चा असून, यावर ज्येष्ठ नेते शरद पवार यांनी आपली भूमिका स्पष्ट केली आहे.

"तो त्यांच्या पक्षाचा निर्णय" - शरद पवार

सुनेत्रा पवार यांच्या संभाव्य शपथविधीबाबत विचारले असता शरद पवार यांनी कमालीचे अंतर राखल्याचे दिसून आले. माध्यमांशी बोलताना ते म्हणाले, "सुनेत्रा पवार यांच्याशी माझी कोणतीही चर्चा झालेली नाही. आज त्यांचा शपथविधी आहे, याची मला कल्पना नाही."

• पक्षाचा अधिकार: "प्रफुल्ल पटेल, सुनील तटकरे हे त्यांच्या पक्षाचे नेते आहेत. राष्ट्रवादी काँग्रेसने (AP गट) काय निर्णय घ्यावा, हा त्यांचा अंतर्गत अधिकार आहे."
• संवाद खुंटला: विलीनीकरणाबाबत सकारात्मक चर्चा सुरू होती, मात्र अजित पवारांच्या निधनामुळे त्यात आता खंड पडल्याचेही त्यांनी आवर्जून नमूद केले.

देवगिरीवर रात्रीत हालचाली

अजित पवारांच्या निधनानंतर संपूर्ण पवार कुटुंब एकत्र आले होते. मात्र, त्यानंतर शरद पवारांशी कोणतीही चर्चा न करता सुनेत्रा पवार मुलगा पार्थ पवार यांच्यासह रात्री उशिरा मुंबईतील 'देवगिरी' बंगल्यावर दाखल झाल्या. यामुळे राजकीय वर्तुळात भुवया उंचावल्या आहेत.

आजच्या दिवसाचे संभाव्य वेळापत्रक

• दुपारी २:०० वाजता: पक्षाच्या प्रमुख नेत्यांची महत्त्वपूर्ण बैठक.
• संध्याकाळी ५:०० वाजता: सुनेत्रा पवार यांचा उपमुख्यमंत्री म्हणून शपथविधी होण्याची शक्यता.
• पार्थ पवार: पार्थ पवार यांना राज्यसभेवर पाठवण्यासाठी हालचाली सुरू असून, भाजप या प्रस्तावाबाबत सकारात्मक असल्याचे समजते.

अजित पवारांच्या निधनाचे दुःख ताजे असतानाच, सत्तासंघर्ष आणि पक्षीय निर्णयांच्या या वेगवान घडामोडींमुळे राज्याच्या राजकारणात नवी समीकरणे तयार होताना दिसत आहेत.