अमेरिकेची इराणभोवती 'तटबंदी'; F-22 अन् F-35 विमाने तैनात, इराणकडून 'NOTAM' घोषित

US Iran tensions 2026 : मध्य पूर्वेतील तणावाने आता धोक्याची पातळी ओलांडलेली आहे. अमेरिकेने इराणच्या नाकेबंदीसाठी आपली सर्वात संहारक युद्धनौका आणि लढाऊ विमाने तैनात केल्यानंतर, इराणने संपूर्ण देशाला 'नो-फ्लाय झोन' घोषित केले आहे.

या घडामोडींमुळे अमेरिका आणि इराणमध्ये कोणत्याही क्षणी थेट लष्करी संघर्षाला सुरुवात होण्याची शक्यता निर्माण झाली आहे. या संपूर्ण प्रकरणामुळे जगभरात चिंता व्यक्त केली जात आहे.

इराणची मोठी घोषणा: संपूर्ण देशात 'NOTAM' लागू

अमेरिकेच्या संभाव्य हल्ल्याची कुणकुण लागताच इराणने देशभर NOTAM (Notice to Air Missions) जारी केला आहे.

नो-फ्लाय झोन : या आदेशामुळे इराणचे आकाश आता सर्व प्रकारच्या व्यावसायिक उड्डाणांसाठी बंद झाले असून, इराणने याला 'रॉकेट चाचणी'चे नाव दिले आहे.

युद्धसज्जता : प्रत्यक्षात हा शत्रूच्या विमानांना रोखण्यासाठी आणि आपल्या संरक्षण प्रणालीला सक्रिय करण्यासाठी उचललेले पाऊल असल्याचे तज्ज्ञांचे मत आहे.

अमेरिकेची 'घेराबंदी': सर्वात घातक विमाने तैनात

वॉल स्ट्रीट जर्नलच्या वृत्तानुसार, अमेरिकेने इराणला तीनही बाजूंनी घेरले आहे. अमेरिकेची ही लष्करी तयारी थक्क करणारी आहे:

F-35 आणि F-22 रॅप्टर : जगातील सर्वात शक्तिशाली मानली जाणारी ही स्टेल्थ लढाऊ विमाने इराणच्या सीमेजवळ तैनात करण्यात आली आहेत.

दोन एअरक्राफ्ट कॅरियर : इराणच्या अगदी जवळ USS अब्राहम लिंकन ही युद्धनौका तैनात आहे, तर USS जेराल्ड आर. देखील मध्य पूर्वेत दाखल झाली आहे.

दीर्घकालीन युद्धाचे संकेत : अ‍ॅक्सिओसच्या अहवालानुसार, ही कारवाई केवळ एक सर्जिकल स्ट्राईक नसून, अनेक आठवडे चालणाऱ्या मोठ्या युद्धाची नांदी असू शकते.

मुत्सद्देगिरी अपयशी; ट्रम्प यांच्या भूमिकेकडे जगाचे लक्ष

१७ फेब्रुवारी रोजी जिनेव्हा येथे झालेली अमेरिका-इराण चर्चेची दुसरी फेरी निष्फळ ठरली आहे. अमेरिकेचे उपाध्यक्ष जेडी व्हान्स यांनी स्पष्ट केले की, इराण अध्यक्ष डोनाल्ड ट्रम्प यांच्या अटी स्वीकारण्यास तयार नाही.

अध्यक्ष ट्रम्प यांनी इराणच्या अणू कार्यक्रमावर आणि आयातुल्ला खामेनी यांच्या नेतृत्वाखालील सरकारवर तीव्र नाराजी व्यक्त केली आहे. आता ट्रम्प प्रत्यक्ष हल्ल्याचे आदेश देतात की आर्थिक निर्बंधांमधून कोंडी करतात, याकडे संपूर्ण जगाचे लक्ष लागले आहे.

खामेनी यांचा इशारा: "हल्ला केल्यास जोरदार प्रत्युत्तर देऊ"

इराणचे सर्वोच्च नेते आयातुल्ला खामेनी यांनी १ फेब्रुवारी रोजीच अमेरिकेला इशारा दिला होता. त्यांनी स्पष्ट केले की, "इराण कोणत्याही युद्धासाठी पुढाकार घेणार नाही, पण जर आमच्यावर हल्ला झाला, तर इराणी जनता त्याला जोरदार प्रत्युत्तर देईल.

अमेरिकेच्या धमक्यांना आम्ही घाबरत नाही." जर या आठवड्याच्या अखेरीस अमेरिकेने तेहरानवर हल्ला केला, तर त्याचे परिणाम केवळ मध्य पूर्वेपुरते मर्यादित राहणार नाहीत.

जागतिक तेल संकट: कच्च्या तेलाच्या किमतीत मोठी वाढ होऊ शकते.

प्रादेशिक अस्थिरता : इस्रायल, लेबनॉन आणि सीरिया यांसारखे देशही या युद्धात ओढले जाण्याची शक्यता आहे.

आर्थिक मंदी : जागतिक बाजारपेठेवर युद्धाचे सावट आल्यास अर्थव्यवस्था कोलमडू शकते.