विश्वचषकात उलटफेर! श्रीलंकेने ऑस्ट्रेलियाला हरवलं! सुपर-8 साठी कांगारुचे भविष्य 'या' संघावर अवलंबून

T20 World Cup 2026 : टी-२० विश्वचषक २०२६ मध्ये यजमान श्रीलंकेने आपला दबदबा कायम राखत बलाढ्य ऑस्ट्रेलियाचा ८ गडी राखून पराभव केला आहे. सोमवारी पल्लेकेले इंटरनॅशनल स्टेडियमवर झालेल्या या सामन्यात श्रीलंकेने केवळ विजयच मिळवला नाही, तर ऑस्ट्रेलियाला स्पर्धेतून बाहेर होण्याच्या उंबरठ्यावर आणून सोडले आहे. या विजयासह श्रीलंकेने 'सुपर-८' फेरीच्या दिशेने भक्कम पाऊल टाकले आहे.

पथुम निसंकाचे ऐतिहासिक शतक

१८२ धावांच्या आव्हानात्मक लक्ष्याचा पाठलाग करताना श्रीलंकेचा सलामीवीर पथुम निसंकाने अविस्मरणीय खेळी केली. निसंकाने ऑस्ट्रेलियन गोलंदाजांचा समाचार घेत या विश्वचषकातील पहिले शतक झळकावले. त्याला कुसल मेंडिसने मोलाची साथ दिली. या दोघांच्या शतकीय भागीदारीमुळे श्रीलंकेने १८ व्या षटकातच १८४ धावा करत विजय मिळवला.

ऑस्ट्रेलियाची दमदार सुरुवात, पण मध्यक्रम गडगडला

नाणेफेक हारल्यानंतर प्रथम फलंदाजी करताना ऑस्ट्रेलियाने ट्रेविस हेड आणि कर्णधार मिचेल मार्श यांच्या अर्धशतकांच्या जोरावर मोठी धावसंख्या उभारण्याचे संकेत दिले होते. मात्र, श्रीलंकेच्या गोलंदाजांनी मधल्या षटकांत टिच्चून मारा करत ऑस्ट्रेलियन फलंदाजीला खिंडार पाडले. परिणामी, मोठी धावसंख्या उभारेल असे वाटणारा ऑस्ट्रेलियन संघ २० षटकांत १८१ धावांतच मर्यादित राहिला.

कांगारूंचे भविष्य आता आयर्लंडच्या हातात!

या पराभवानंतर ऑस्ट्रेलियाचे स्पर्धेतील भवितव्य आता आयरलँड विरुद्ध झिम्बाब्वे या सामन्यावर अवलंबून आहे.

झिम्बाब्वेचे वर्चस्व: सिकंदर रझाच्या नेतृत्वाखालील जिम्बाब्वे संघ सध्या जबरदस्त फॉर्ममध्ये आहे. त्यांनी आधीच ऑस्ट्रेलियाला २३ धावांनी हरवून सर्वांना चकित केले आहे.

सुपर-८ चे गणित: जर जिम्बाब्वेने आज आयर्लंडला हरवले, तर त्यांचे ६ गुण होतील आणि ते थेट सुपर-८ साठी पात्र ठरतील. अशा स्थितीत ऑस्ट्रेलिया स्पर्धेतून बाहेर पडण्याची दाट शक्यता आहे.

ऑस्ट्रेलियाची प्रार्थना: ऑस्ट्रेलियाचे खेळाडू आणि चाहते आता आयर्लंडने जिम्बाब्वेला हरवावे यासाठी प्रार्थना करत आहेत, जेणेकरून कांगारूंच्या सुपर-८ मधील आशा जिवंत राहतील.

पल्लेकेलेची खेळपट्टी आणि फिरकीपटूंचे आव्हान

आजच्या महत्त्वाच्या सामन्यात पल्लेकेलेच्या खेळपट्टीवर फिरकीपटूंची भूमिका महत्त्वाची ठरेल. जिम्बाब्वे कडे सिकंदर रझा आणि वेलिंगटन मसाकाद्जा सारखे अनुभवी पर्याय आहेत, तर आयर्लंडला हॅरी टेक्टर आणि कर्णधार लॉर्कन टकरकडून मोठ्या कामगिरीची अपेक्षा आहे.

हेही वाचा : IND vs PAK : पाकिस्तानविरुद्ध भारत का जिंकला? 'ही' आहेत विजयाची 5 कारणे; हे खेळाडू विजयाचे शिलेदार

हेही वाचा : T20 World Cup 2026 : झिम्बाब्वेचा ऐतिहासिक उलटफेर; ऑस्ट्रेलियाचा 23 धावांनी पराभव! हे कसं घडलं? वाचा