संजूच्या संघर्षात क्रिकेटचा देव धावून आला! सचिनचा काॅल अन् मैदानात षटकारांचा पाऊस वाचा 'तो' किस्सा

Ind vs nz t20 world cup final sachin tendulkar masterstroke : रविवारी अहमदाबादच्या नरेंद्र मोदी स्टेडियमवर भारतीय संघाने न्यूझीलंडचा धुव्वा उडवत तिसऱ्यांदा टी-२० वर्ल्ड कपवर आपले नाव कोरले. या विजयाचे नायक जरी संजू सॅमसन आणि अभिषेक शर्मा ठरले असले, तरी विजयानंतर एका अशा गुपिताचा खुलासा झाला आहे, ज्याने क्रिकेट चाहत्यांना भावूक केले आहे. भारताच्या या ऐतिहासिक विजयामागे साक्षात 'क्रिकेटचा देव' सचिन तेंडुलकर यांचा मोठा हात असल्याचे समोर आले आहे.

जेव्हा संजू संघात नव्हता, तेव्हा सचिन बनला आधार

विजयाचा शिल्पकार आणि 'मॅन ऑफ द मॅच' ठरलेल्या संजू सॅमसनने सामन्यानंतर एक खळबळजनक खुलासा केला. संजू म्हणाला, "जेव्हा मी संघात स्थान मिळवण्यासाठी धडपडत होतो आणि कठीण काळातून जात होतो, तेव्हा मी सचिन सरांशी संपर्क साधला. त्यांनी केवळ मला मार्गदर्शनच केले नाही, तर माझा आत्मविश्वासही वाढवला. फायनलच्या आदल्या दिवशीही त्यांनी मला फोन करून माझ्या तयारीबद्दल विचारपूस केली होती. या विजयाचे श्रेय त्यांच्या मार्गदर्शनालाही जाते."

अभिषेक आणि संजूची वादळी फटकेबाजी

सचिनच्या सल्ल्याचा प्रभाव मैदानात स्पष्ट दिसला. संजू सॅमसनने अवघ्या ४६ चेंडूत ८९ धावांची आक्रमक खेळी केली (५ चौकार, ८ षटकार). तो आता वर्ल्ड कपच्या सेमीफायनल आणि फायनल अशा दोन्ही सामन्यांत अर्धशतक झळकावणारा जगातील तिसरा फलंदाज ठरला आहे. दुसरीकडे, अभिषेक शर्माने १८ चेंडूत सर्वात वेगवान अर्धशतक ठोकून सचिनने त्याच्यावर दाखवलेला विश्वास सार्थ ठरवला.

अहमदाबादमध्ये विक्रमांचा पाऊस

भारताने न्यूझीलंडसमोर २५५/५ धावांचा डोंगर उभा केला, जो वर्ल्ड कप फायनलच्या इतिहासातील सर्वोच्च स्कोअर आहे. पॉवरप्लेमध्ये ९२ धावा कुटून टीम इंडियाने नवा विक्रम प्रस्थापित केला. संजू आणि अभिषेक यांच्यातील ९८ धावांच्या सलामी भागीदारीने किवी गोलंदाजांची कंबरच तोडली. शेवटी शिवम दुबेने ८ चेंडूत २६ धावा करत भारताला सुरक्षित धावसंख्येपर्यंत पोहोचवले.